Read Библия Церковнославянская Ѱалти́рь 146 Bible Online

Ѱалти́рь 146 - Библия Церковнославянская bible

Ѱалти́рь 146

¹ Хвали́те гд҇а, ѩ҆́кѡ бл҃гъ ѱало́мъ: бг҃ови на́шемѹ да ѹ҆слади́тсѧ хвале́нїе.

²Зи́ждай ї҆ер҇ли́ма гд҇ь: разсѣ҄ѧнїѧ ї҆и҃лєва собере́тъ:

³и҆зцѣлѧ́ѧй сокрѹшє́нныѧ се́рдцемъ и҆ ѡ҆бѧзѹ́ѧй сокрѹшє́нїѧ и҆́хъ:

⁴и҆зчита́ѧй мно́жество ѕвѣ́здъ, и҆ всѣ҄мъ и҆̀мъ и҆мена̀ нарица́ѧй.

⁵Ве́лїй гд҇ь на́шъ, и҆ ве́лїѧ крѣ́пость є҆гѡ̀, и҆ ра́зѹма є҆гѡ̀ нѣ́сть числа̀.

⁶Прїе́млѧй крѡ́ткїѧ гд҇ь, смирѧ́ѧй же грѣ́шники до землѝ.

⁷Начни́те гд҇еви во и҆сповѣ́данїи, по́йте бг҃ови на́шемѹ въ гѹ́слехъ:

⁸ѡ҆дѣва́ющемѹ не́бо ѡ҆́блаки, ѹ҆готовлѧ́ющемѹ землѝ до́ждь: прозѧба́ющемѹ на гора́хъ травѹ̀ и҆ ѕла́къ на слѹ́жбѹ человѣ́кѡмъ:

⁹даю́щемѹ скотѡ́мъ пи́щѹ и҆́хъ, и҆ птенцє́мъ вра́нѡвымъ призыва́ющымъ є҆го̀.

¹⁰Не въ си́лѣ ко́нстѣй восхо́щетъ, нижѐ въ лы́стѣхъ мѹ́жескихъ бл҃говоли́тъ:

¹¹бл҃говоли́тъ гд҇ь въ боѧ́щихсѧ є҆гѡ̀ и҆ во ѹ҆пова́ющихъ на мл҇ть є҆гѡ̀.