Read Библия Церковнославянская Ѱалти́рь 147 Bible Online

Ѱалти́рь 147 - Библия Церковнославянская bible

Ѱалти́рь 147

¹ Похвалѝ, ї҆ер҇ли́ме, гд҇а, хвалѝ бг҃а твоего̀, сїѡ́не:

²ѩ҆́кѡ ѹ҆крѣпѝ верєѝ вра́тъ твои́хъ, блг҇вѝ сы́ны твоѧ҄ въ тебѣ̀.

³Полага́ѧй предѣ́лы твоѧ҄ ми́ръ, и҆ тѹ́ка пшени́чна насыща́ѧй тѧ̀:

⁴посыла́ѧй сло́во своѐ землѝ, до ско́рости тече́тъ сло́во є҆гѡ̀,

⁵даю́щагѡ снѣ́гъ сво́й ѩ҆́кѡ во́лнѹ, мглѹ̀ ѩ҆́кѡ пе́пелъ посыпа́ющагѡ,

⁶мета́ющагѡ го́лоть сво́й ѩ҆́кѡ хлѣ́бы: проти́вѹ лица̀ мра́за є҆гѡ̀ кто̀ постои́тъ;

⁷По́слетъ сло́во своѐ, и҆ и҆ста́етъ ѧ҆̀: дхне́тъ дѹ́хъ є҆гѡ̀, и҆ потекѹ́тъ во́ды.

⁸Возвѣща́ѧй сло́во своѐ ї҆а́кѡвѹ, ѡ҆правда҄нїѧ и҆ сѹдбы҄ своѧ҄ ї҆и҃леви:

⁹не сотворѝ та́кѡ всѧ́комѹ ѩ҆зы́кѹ, и҆ сѹдбы҄ своѧ҄ не ѩ҆вѝ и҆̀мъ.