Read Библия Церковнославянская Ѱалти́рь 148 Bible Online

Ѱалти́рь 148 - Библия Церковнославянская bible

Ѱалти́рь 148

¹ Хвали́те гд҇а съ нб҃съ, хвали́те є҆го̀ въ вы́шнихъ.

²Хвали́те є҆го̀ всѝ а҆́гг҃ли є҆гѡ̀: хвали́те є҆го̀, всѧ҄ си҄лы є҆гѡ̀.

³Хвали́те є҆го̀, со́лнце и҆ лѹна̀: хвали́те є҆го̀ всѧ҄ ѕвѣ́зды и҆ свѣ́тъ.

⁴Хвали́те є҆го̀, нб҃са̀ нб҃съ и҆ вода̀, ѩ҆́же превы́ше небе́съ.

⁵Да восхва́лѧтъ и҆́мѧ гд҇не: ѩ҆́кѡ то́й речѐ, и҆ бы́ша: то́й повелѣ̀, и҆ созда́шасѧ.

⁶Поста́ви ѧ҆̀ въ вѣ́къ и҆ въ вѣ́къ вѣ́ка: повелѣ́нїе положѝ, и҆ не ми́мѡ и҆́детъ.

⁷Хвали́те гд҇а ѿ землѝ, ѕмі́еве и҆ всѧ҄ бє́здны:

⁸ѻ҆́гнь, гра́дъ, снѣ́гъ, го́лоть, дѹ́хъ бѹ́ренъ, творѧ҄щаѧ сло́во є҆гѡ̀:

⁹го́ры и҆ всѝ хо́лми, древа̀ плодонѡ́сна и҆ всѝ ке́дри:

¹⁰ѕвѣ́рїе и҆ всѝ ско́ти, га́ди и҆ пти҄цы перна҄ты:

¹¹ца́рїе зе́мстїи и҆ всѝ лю́дїе, кнѧ҄зи и҆ всѝ сѹдїи҄ зе́мстїи:

¹²ю҆́нѡши и҆ дѣ҄вы, ста́рцы съ ю҆́нотами.

¹³Да восхва́лѧтъ и҆́мѧ гд҇не: ѩ҆́кѡ вознесе́сѧ и҆́мѧ тогѡ̀ є҆ди́нагѡ, и҆сповѣ́данїе є҆гѡ̀ на землѝ и҆ на нб҃сѝ.

¹⁴И҆ вознесе́тъ ро́гъ люді́й свои́хъ: пѣ́снь всѣ҄мъ прпдбнымъ є҆гѡ̀, сыновѡ́мъ ї҆и҃лєвымъ, лю́демъ приближа́ющымсѧ є҆мѹ̀.