Read Библия Церковнославянская Ѱалти́рь 18 Bible Online

Ѱалти́рь 18 - Библия Церковнославянская bible

Ѱалти́рь 18

¹Въ коне́цъ, ѱало́мъ дв҃дѹ,

²Небеса̀ повѣ́даютъ сла́вѹ бж҃їю, творе́нїе же рѹкѹ̀ є҆гѡ̀ возвѣща́етъ тве́рдь.

³Де́нь днѝ ѿрыга́етъ глаго́лъ, и҆ но́щь но́щи возвѣща́етъ ра́зѹмъ.

⁴Не сѹ́ть рѣ҄чи, нижѐ словеса̀, и҆́хже не слы́шатсѧ гла́си и҆́хъ.

⁵Во всю̀ зе́млю и҆зы́де вѣща́нїе и҆́хъ, и҆ въ концы҄ вселе́нныѧ глаго́лы и҆́хъ: въ со́лнцѣ положѝ селе́нїе своѐ:

⁶и҆ то́й ѩ҆́кѡ жени́хъ и҆сходѧ́й ѿ черто́га своегѡ̀, возра́дѹетсѧ ѩ҆́кѡ и҆споли́нъ тещѝ пѹ́ть.

⁷Ѿ кра́ѧ небесѐ и҆схо́дъ є҆гѡ̀, и҆ срѣ́тенїе є҆гѡ̀ до кра́ѧ небесѐ: и҆ нѣ́сть, и҆́же ѹ҆кры́етсѧ теплоты̀ є҆гѡ̀.

⁸Зако́нъ гд҇ень непоро́ченъ, ѡ҆браща́ѧй дѹ́шы: свидѣ́телство гд҇не вѣ́рно, ѹ҆мѹдрѧ́ющее младе́нцы.

⁹Ѡ҆правда҄нїѧ гд҇нѧ пра҄ва, веселѧ҄щаѧ се́рдце: за́повѣдь гд҇нѧ свѣтла̀, просвѣща́ющаѧ ѻ҆́чи.

¹⁰Стра́хъ гд҇ень чи́стъ, пребыва́ѧй въ вѣ́къ вѣ́ка: сѹдбы҄ гд҇ни и҆́стинны, ѡ҆правда҄нны вкѹ́пѣ,

¹¹вожделѣ҄нны па́че зла́та и҆ ка́мене че́стна мно́га, и҆ сла́ждшѧ па́че ме́да и҆ со́та.

¹²И҆́бо ра́бъ тво́й храни́тъ ѧ҆̀: внегда̀ сохрани́ти ѧ҆̀, воздаѧ́нїе мно́го.

¹³Грѣхопадє́нїѧ кто̀ разѹмѣ́етъ; ѿ та́йныхъ мои́хъ ѡ҆ч҇ти мѧ̀,

¹⁴и҆ ѿ чѹжди́хъ пощадѝ раба̀ твоего̀: а҆́ще не ѡ҆блада́ютъ мно́ю, тогда̀ непоро́ченъ бѹ́дѹ, и҆ ѡ҆чи́щѹсѧ ѿ грѣха̀ вели́ка.

¹⁵И҆ бѹ́дѹтъ во бл҃говоле́нїе словеса̀ ѹ҆́стъ мои́хъ, и҆ поѹче́нїе се́рдца моегѡ̀ пред̾ тобо́ю вы́нѹ, гд҇и, помо́щниче мо́й и҆ и҆зба́вителю мо́й.