Read Библия Церковнославянская Ѱалти́рь 21 Bible Online

Ѱалти́рь 21 - Библия Церковнославянская bible

Ѱалти́рь 21

¹Въ коне́цъ, ѡ҆ застѹпле́нїи ѹ҆́треннемъ, ѱало́мъ дв҃дѹ,

²Бж҃е, бж҃е мо́й, вонми́ ми, вскѹ́ю ѡ҆ста́вилъ мѧ̀ є҆сѝ; дале́че ѿ сп҇нїѧ моегѡ̀ словеса̀ грѣхопаде́нїй мои́хъ.

³Бж҃е мо́й, воззовѹ̀ во днѝ, и҆ не ѹ҆слы́шиши, и҆ въ нощѝ, и҆ не въ безѹ́мїе мнѣ̀.

⁴Ты́ же во ст҃ѣ́мъ живе́ши, хвало̀ ї҆и҃лева.

⁵На тѧ̀ ѹ҆пова́ша ѻ҆тцы̀ на́ши: ѹ҆пова́ша, и҆ и҆зба́вилъ є҆сѝ ѧ҆̀:

⁶къ тебѣ̀ воззва́ша, и҆ спасо́шасѧ: на тѧ̀ ѹ҆пова́ша, и҆ не постыдѣ́шасѧ.

⁷А҆́зъ же є҆́смь че́рвь, а҆ не человѣ́къ, поноше́нїе человѣ́кѡвъ и҆ ѹ҆ничиже́нїе люді́й.

⁸Всѝ ви́дѧщїи мѧ̀ порѹга́шамисѧ, глаго́лаша ѹ҆стна́ми, покива́ша главо́ю:

⁹ѹ҆пова̀ на гд҇а, да и҆зба́витъ є҆го̀, да сп҃се́тъ є҆го̀, ѩ҆́кѡ хо́щетъ є҆го̀.

¹⁰ѩ҆́кѡ ты̀ є҆сѝ и҆сто́ргїй мѧ̀ и҆з̾ чре́ва, ѹ҆пова́нїе моѐ ѿ сѡсцѹ̀ ма́тере моеѧ̀.

¹¹Къ тебѣ̀ приве́рженъ є҆́смь ѿ ложе́снъ, ѿ чре́ва ма́тере моеѧ̀ бг҃ъ мо́й є҆сѝ ты̀.

¹²Да не ѿстѹ́пиши ѿ менє̀, ѩ҆́кѡ ско́рбь бли́з̾, ѩ҆́кѡ нѣ́сть помога́ѧй мѝ.

¹³Ѡ҆быдо́ша мѧ̀ телцы̀ мно́зи, ю҆нцы̀ тѹ́чнїи ѡ҆держа́ша мѧ̀:

¹⁴ѿверзо́ша на мѧ̀ ѹ҆ста̀ своѧ҄, ѩ҆́кѡ ле́въ восхища́ѧй и҆ рыка́ѧй.

¹⁵ѩ҆́кѡ вода̀ и҆злїѧ́хсѧ, и҆ разсы́пашасѧ всѧ҄ кѡ́сти моѧ҄: бы́сть се́рдце моѐ ѩ҆́кѡ во́скъ та́ѧй посредѣ̀ чре́ва моегѡ̀.

¹⁶И҆́зсше ѩ҆́кѡ скѹде́ль крѣ́пость моѧ̀, и҆ ѧ҆зы́къ мо́й прильпѐ горта́ни моемѹ̀, и҆ въ пе́рсть сме́рти све́лъ мѧ̀ є҆сѝ.

¹⁷ѩ҆́кѡ ѡ҆быдо́ша мѧ̀ псѝ мно́зи, со́нмъ лѹка́выхъ ѡ҆держа́ша мѧ̀: и҆скопа́ша рѹ́цѣ моѝ и҆ но́зѣ моѝ.

¹⁸И҆счето́ша всѧ҄ кѡ́сти моѧ҄: ті́и же смотри́ша и҆ презрѣ́ша мѧ̀.

¹⁹Раздѣли́ша ри҄зы моѧ҄ себѣ̀, и҆ ѡ҆ ѻ҆де́жди мое́й мета́ша жре́бїй.

²⁰Ты́ же, гд҇и, не ѹ҆далѝ по́мощь твою̀ ѿ менє̀: на застѹпле́нїе моѐ вонмѝ.

²¹И҆зба́ви ѿ ѻ҆рѹ́жїѧ дѹ́шѹ мою̀, и҆ и҆з̾ рѹкѝ пе́сїи є҆диноро́днѹю мою̀.

²²Сп҃си́ мѧ ѿ ѹ҆́стъ льво́выхъ, и҆ ѿ рѡ́гъ є҆динорѡ́жь смире́нїе моѐ.

²³Повѣ́мъ и҆́мѧ твоѐ бра́тїи мое́й, посредѣ̀ цр҃кве воспою̀ тѧ̀.

²⁴Боѧ́щїисѧ гд҇а, восхвали́те є҆го̀, всѐ сѣ́мѧ ї҆а́кѡвле, просла́вите є҆го̀, да ѹ҆бои́тсѧ же ѿ негѡ̀ всѐ сѣ́мѧ ї҆и҃лево:

²⁵ѩ҆́кѡ не ѹ҆ничижѝ, нижѐ негодова̀ моли́твы ни́щагѡ, нижѐ ѿвратѝ лицѐ своѐ ѿ менє̀, и҆ є҆гда̀ воззва́хъ къ немѹ̀, ѹ҆слы́ша мѧ̀.

²⁶Ѿ тебє̀ похвала̀ моѧ̀, въ цр҃кви вели́цѣй и҆сповѣ́мсѧ тебѣ̀: моли҄твы моѧ҄ возда́мъ пред̾ боѧ́щимисѧ є҆гѡ̀.

²⁷ѩ҆дѧ́тъ ѹ҆бо́зїи, и҆ насы́тѧтсѧ, и҆ восхва́лѧтъ гд҇а взыска́ющїи є҆го̀: жива҄ бѹ́дѹтъ сердца̀ и҆́хъ въ вѣ́къ вѣ́ка.

²⁸Помѧнѹ́тсѧ и҆ ѡ҆братѧ́тсѧ ко гд҇ѹ всѝ концы҄ землѝ, и҆ покло́нѧтсѧ пред̾ ни́мъ всѧ҄ ѻ҆те́чєствїѧ ѩ҆зы҄къ:

²⁹ѩ҆́кѡ гд҇не є҆́сть цр҇твїе, и҆ то́й ѡ҆блада́етъ ѩ҆зы҄ки.

³⁰ѩ҆до́ша и҆ поклони́шасѧ всѝ тѹ́чнїи землѝ: пред̾ ни́мъ припадѹ́тъ всѝ низходѧ́щїи въ зе́млю: и҆ дѹша̀ моѧ̀ томѹ̀ живе́тъ.

³¹И҆ сѣ́мѧ моѐ порабо́таетъ є҆мѹ̀: возвѣсти́тъ гд҇еви ро́дъ грѧдѹ́щїй:

³²и҆ возвѣстѧ́тъ пра́вдѹ є҆гѡ̀ лю́демъ ро́ждшымсѧ {роди́тисѧ и҆мѹ́щымъ}, ѩ҆̀же сотворѝ гд҇ь.