Read Библия Церковнославянская Ѱалти́рь 23 Bible Online

Ѱалти́рь 23 - Библия Церковнославянская bible

Ѱалти́рь 23

¹ Гд҇нѧ землѧ̀, и҆ и҆сполне́нїе є҆ѧ̀, вселе́ннаѧ и҆ всѝ живѹ́щїи на не́й.

²То́й на морѧ́хъ ѡ҆снова́лъ ю҆̀ є҆́сть и҆ на рѣка́хъ ѹ҆гото́валъ ю҆̀ є҆́сть.

³Кто̀ взы́детъ на го́рѹ гд҇ню; и҆лѝ кто̀ ста́нетъ на мѣ́стѣ ст҃ѣ́мъ є҆гѡ̀;

⁴Непови́ненъ рѹка́ма и҆ чи́стъ се́рдцемъ, и҆́же не прїѧ́тъ всѹ́е дѹ́шѹ свою̀ и҆ не клѧ́тсѧ ле́стїю и҆́скреннемѹ своемѹ̀:

⁵се́й прїи́метъ блг҇ве́нїе ѿ гд҇а и҆ мл҇тыню ѿ бг҃а сп҃са своегѡ̀.

⁶Се́й ро́дъ и҆́щѹщихъ гд҇а, и҆́щѹщихъ лицѐ бг҃а ї҆а́кѡвлѧ.

⁷Возми́те врата̀ кнѧ҄зи ва҄ша, и҆ возми́тесѧ врата̀ вѣ҄чнаѧ: и҆ вни́детъ цр҃ь сла́вы.

⁸Кто́ є҆сть се́й цр҃ь сла́вы; гд҇ь крѣ́покъ и҆ си́ленъ, гд҇ь си́ленъ въ бра́ни.

⁹Возми́те врата̀ кнѧ҄зи ва҄шѧ, и҆ возми́тесѧ врата̀ вѣ҄чнаѧ: и҆ вни́детъ цр҃ь сла́вы.

¹⁰Кто́ є҆сть се́й цр҃ь сла́вы; гд҇ь си́лъ, то́й є҆́сть цр҃ь сла́вы.