Read Библия Церковнославянская Ѱалти́рь 24 Bible Online

Ѱалти́рь 24 - Библия Церковнославянская bible

Ѱалти́рь 24

¹ Къ тебѣ̀, гд҇и, воздвиго́хъ дѹ́шѹ мою̀, бж҃е мо́й, на тѧ̀ ѹ҆пова́хъ, да не постыжѹ́сѧ во вѣ́къ, нижѐ да посмѣю́тмисѧ вразѝ моѝ:

²и҆́бо всѝ терпѧ́щїи тѧ̀ не постыдѧ́тсѧ.

³Да постыдѧ́тсѧ беззако́ннѹющїи вотщѐ.

⁴Пѹти҄ твоѧ҄, гд҇и, скажи́ ми и҆ стезѧ́мъ твои҄мъ наѹчи́ мѧ.

⁵Наста́ви мѧ̀ на и҆́стинѹ твою̀ и҆ наѹчи́ мѧ: ѩ҆́кѡ ты̀ є҆сѝ бг҃ъ сп҃съ мо́й, и҆ тебѐ терпѣ́хъ ве́сь де́нь.

⁶Помѧнѝ щедрѡ́ты твоѧ҄, гд҇и, и҆ мл҇ти твоѧ҄, ѩ҆́кѡ ѿ вѣ́ка сѹ́ть.

⁷Грѣ҄хъ ю҆́ности моеѧ̀ и҆ невѣ́дѣнїѧ моегѡ̀ не помѧнѝ: по мл҇ти твое́й помѧни́ мѧ ты̀, ра́ди бл҃гости твоеѧ̀, гд҇и.

⁸Бл҃гъ и҆ пра́въ гд҇ь, сегѡ̀ ра́ди законоположи́тъ согрѣша́ющымъ на пѹтѝ.

⁹Наста́витъ крѡ́ткїѧ на сѹ́дъ, наѹчи́тъ крѡ́ткїѧ пѹтє́мъ свои҄мъ.

¹⁰Всѝ пѹтїѐ гд҇ни мл҇ть и҆ и҆́стина, взыска́ющымъ завѣ́та є҆гѡ̀ и҆ свидѣ́нїѧ є҆гѡ̀.

¹¹Ра́ди и҆́мене твоегѡ̀, гд҇и, и҆ ѡ҆ч҇ти грѣ́хъ мо́й, мно́гъ бо є҆́сть.

¹²Кто́ є҆сть человѣ́къ боѧ́йсѧ гд҇а; законоположи́тъ є҆мѹ̀ на пѹтѝ, є҆го́же и҆зво́ли.

¹³Дѹша̀ є҆гѡ̀ во благи́хъ водвори́тсѧ, и҆ сѣ́мѧ є҆гѡ̀ наслѣ́дитъ зе́млю.

¹⁴Держа́ва гд҇ь боѧ́щихсѧ є҆гѡ̀, и҆ завѣ́тъ є҆гѡ̀ ѩ҆ви́тъ и҆̀мъ.

¹⁵Ѻ҆́чи моѝ вы́нѹ ко гд҇ѹ, ѩ҆́кѡ то́й и҆сто́ргнетъ ѿ сѣ́ти но́зѣ моѝ.

¹⁶При́зри на мѧ̀ и҆ поми́лѹй мѧ̀, ѩ҆́кѡ є҆диноро́дъ и҆ ни́щь є҆́смь а҆́зъ.

¹⁷Скѡ́рби се́рдца моегѡ̀ ѹ҆мно́жишасѧ, ѿ нѹ́ждъ мои́хъ и҆зведи́ мѧ.

¹⁸Ви́ждь смире́нїе моѐ и҆ трѹ́дъ мо́й, и҆ ѡ҆ста́ви всѧ҄ грѣхѝ моѧ҄.

¹⁹Ви́ждь врагѝ моѧ҄, ѩ҆́кѡ ѹ҆мно́жишасѧ, и҆ ненавидѣ́нїемъ непра́веднымъ возненави́дѣша мѧ̀.

²⁰Сохранѝ дѹ́шѹ мою̀ и҆ и҆зба́ви мѧ̀, да не постыжѹ́сѧ, ѩ҆́кѡ ѹ҆пова́хъ на тѧ̀.

²¹Неѕло́бивїи и҆ пра́вїи прилѣплѧ́хѹсѧ мнѣ̀, ѩ҆́кѡ потерпѣ́хъ тѧ̀, гд҇и.

²²И҆зба́ви, бж҃е, ї҆и҃лѧ ѿ всѣ́хъ скорбе́й є҆гѡ̀.