Read Библия Церковнославянская Ѱалти́рь 26 Bible Online

Ѱалти́рь 26 - Библия Церковнославянская bible

Ѱалти́рь 26

¹ Гд҇ь просвѣще́нїе моѐ и҆ сп҃си́тель мо́й, когѡ̀ ѹ҆бою́сѧ; гд҇ь защи́титель живота̀ моегѡ̀, ѿ когѡ̀ ѹ҆страшѹ́сѧ;

²Внегда̀ приближа́тисѧ на мѧ̀ ѕло́бѹющымъ, є҆́же снѣ́сти плѡ́ти моѧ҄, ѡ҆скорблѧ́ющїи мѧ̀ и҆ вразѝ моѝ, ті́и и҆знемого́ша и҆ падо́ша.

³А҆́ще ѡ҆полчи́тсѧ на мѧ̀ по́лкъ, не ѹ҆бои́тсѧ се́рдце моѐ: а҆́ще воста́нетъ на мѧ̀ бра́нь, на него̀ а҆́зъ ѹ҆пова́ю.

⁴Є҆ди́но проси́хъ ѿ гд҇а, то̀ взыщѹ̀: є҆́же жи́ти мѝ въ домѹ̀ гд҇ни всѧ҄ дни҄ живота̀ моегѡ̀, зрѣ́ти мѝ красотѹ̀ гд҇ню и҆ посѣща́ти хра́мъ ст҃ы́й є҆гѡ̀.

⁵ѩ҆́кѡ скры́ мѧ въ селе́нїи свое́мъ въ де́нь ѕѡ́лъ мои́хъ, покры́ мѧ въ та́йнѣ селе́нїѧ своегѡ̀, на ка́мень вознесе́ мѧ.

⁶И҆ нн҃ѣ сѐ, вознесѐ главѹ̀ мою̀ на врагѝ моѧ҄: ѡ҆быдо́хъ и҆ пожро́хъ въ селе́нїи є҆гѡ̀ же́ртвѹ хвале́нїѧ и҆ воскликнове́нїѧ: пою̀ и҆ воспою̀ гд҇еви.

⁷Ѹ҆слы́ши, гд҇и, гла́съ мо́й, и҆́мже воззва́хъ, поми́лѹй мѧ̀ и҆ ѹ҆слы́ши мѧ̀.

⁸Тебѣ̀ речѐ се́рдце моѐ: гд҇а взыщѹ̀, взыска̀ тебѐ лицѐ моѐ, лица̀ твоегѡ̀, гд҇и, взыщѹ̀.

⁹Не ѿвратѝ лица̀ твоегѡ̀ ѿ менє̀ и҆ не ѹ҆клони́сѧ гнѣ́вомъ ѿ раба̀ твоегѡ̀: помо́щникъ мо́й бѹ́ди, не ѿри́ни менѐ и҆ не ѡ҆ста́ви менѐ, бж҃е, сп҃си́телю мо́й.

¹⁰ѩ҆́кѡ ѻ҆те́цъ мо́й и҆ ма́ти моѧ̀ ѡ҆ста́виста мѧ̀, гд҇ь же воспрїѧ́тъ мѧ̀.

¹¹Законоположи́ ми, гд҇и, въ пѹтѝ твое́мъ, и҆ наста́ви мѧ̀ на стезю̀ пра́вѹю вра҄гъ мои́хъ ра́ди.

¹²Не преда́ждь менѐ въ дѹ́шы стѹжа́ющихъ мѝ: ѩ҆́кѡ воста́ша на мѧ̀ свидѣ́телє непра́веднїи, и҆ солга̀ непра́вда себѣ̀.

¹³Вѣ́рѹю ви́дѣти бл҃га҄ѧ гд҇нѧ на землѝ живы́хъ.

¹⁴Потерпѝ гд҇а, мѹжа́йсѧ, и҆ да крѣпи́тсѧ се́рдце твоѐ, и҆ потерпѝ гд҇а.