Read Библия Церковнославянская Ѱалти́рь 29 Bible Online

Ѱалти́рь 29 - Библия Церковнославянская bible

Ѱалти́рь 29

¹Ѱало́мъ пѣ́сни ѡ҆бновле́нїѧ до́мѹ дв҃дова,

²Вознесѹ́ тѧ, гд҇и, ѩ҆́кѡ под̾ѧ́лъ мѧ̀ є҆сѝ, и҆ не возвесели́лъ є҆сѝ врагѡ́въ мои́хъ ѡ҆ мнѣ̀.

³Гд҇и бж҃е мо́й, воззва́хъ къ тебѣ̀, и҆ и҆зцѣли́лъ мѧ̀ є҆сѝ.

⁴Гд҇и, возве́лъ є҆сѝ ѿ а҆́да дѹ́шѹ мою̀, сп҃слъ мѧ̀ є҆сѝ ѿ низходѧ́щихъ въ ро́въ.

⁵По́йте гд҇еви, прпдбнїи є҆гѡ̀, и҆ и҆сповѣ́дайте па́мѧть ст҃ы́ни є҆гѡ̀:

⁶ѩ҆́кѡ гнѣ́въ въ ѩ҆́рости є҆гѡ̀, и҆ живо́тъ въ во́ли є҆гѡ̀: ве́черъ водвори́тсѧ пла́чь, и҆ заѹ́тра ра́дость.

⁷А҆́зъ же рѣ́хъ во ѻ҆би́лїи мое́мъ: не подви́жѹсѧ во вѣ́къ.

⁸Гд҇и, во́лею твое́ю пода́ждь добро́тѣ мое́й си́лѹ: ѿврати́лъ же є҆сѝ лицѐ твоѐ, и҆ бы́хъ смѹще́нъ.

⁹Къ тебѣ̀, гд҇и, воззовѹ̀, и҆ къ бг҃ѹ моемѹ̀ помолю́сѧ.

¹⁰Ка́ѧ по́льза въ кро́ви мое́й, внегда̀ сходи́ти мѝ во и҆стлѣ́нїе; є҆да̀ и҆сповѣ́стсѧ тебѣ̀ пе́рсть; и҆лѝ возвѣсти́тъ и҆́стинѹ твою̀;

¹¹Слы́ша гд҇ь и҆ поми́лова мѧ̀: гд҇ь бы́сть помо́щникъ мо́й.

¹²Ѡ҆брати́лъ є҆сѝ пла́чь мо́й въ ра́дость мнѣ̀, растерза́лъ є҆сѝ вре́тище моѐ и҆ препоѧ́салъ мѧ̀ є҆сѝ весе́лїемъ,

¹³ѩ҆́кѡ да воспое́тъ тебѣ̀ сла́ва моѧ̀, и҆ не ѹ҆милю́сѧ. Гд҇и бж҃е мо́й, во вѣ́къ и҆сповѣ́мсѧ тебѣ̀.