Read Библия Церковнославянская Ѱалти́рь 30 Bible Online

Ѱалти́рь 30 - Библия Церковнославянская bible

Ѱалти́рь 30

¹Въ коне́цъ, ѱало́мъ дв҃дѹ, и҆зстѹпле́нїѧ,

²На тѧ̀, гд҇и, ѹ҆пова́хъ, да не постыжѹ́сѧ во вѣ́къ: пра́вдою твое́ю и҆зба́ви мѧ̀ и҆ и҆зми́ мѧ.

³Приклонѝ ко мнѣ̀ ѹ҆́хо твоѐ, ѹ҆скорѝ и҆з̾ѧ́ти мѧ̀: бѹ́ди мѝ въ бг҃а защи́тителѧ и҆ въ до́мъ прибѣ́жища, є҆́же сп҇ти́ мѧ.

⁴ѩ҆́кѡ держа́ва моѧ̀ и҆ прибѣ́жище моѐ є҆сѝ ты̀: и҆ и҆́мене твоегѡ̀ ра́ди наста́виши мѧ̀ и҆ препита́еши мѧ̀.

⁵И҆зведе́ши мѧ̀ ѿ сѣ́ти сеѧ̀, ю҆́же скры́ша мѝ: ѩ҆́кѡ ты̀ є҆сѝ защи́титель мо́й, гд҇и.

⁶Въ рѹ́цѣ твоѝ предложѹ̀ дѹ́хъ мо́й: и҆зба́вилъ мѧ̀ є҆сѝ, гд҇и бж҃е и҆́стины.

⁷Возненави́дѣлъ є҆сѝ хранѧ́щыѧ сѹєты̀ вотщѐ: а҆́зъ же на гд҇а ѹ҆пова́хъ.

⁸Возра́дѹюсѧ и҆ возвеселю́сѧ ѡ҆ мл҇ти твое́й, ѩ҆́кѡ призрѣ́лъ є҆сѝ на смире́нїе моѐ, сп҃слъ є҆сѝ ѿ нѹ́ждъ дѹ́шѹ мою̀

⁹и҆ нѣ́си менѐ затвори́лъ въ рѹка́хъ вра́жїихъ, поста́вилъ є҆сѝ на простра́ннѣ но́зѣ моѝ.

¹⁰Поми́лѹй мѧ̀, гд҇и, ѩ҆́кѡ скорблю̀: смѧте́сѧ ѩ҆́ростїю ѻ҆́ко моѐ, дѹша̀ моѧ̀ и҆ ѹ҆тро́ба моѧ̀.

¹¹ѩ҆́кѡ и҆зчезѐ въ болѣ́зни живо́тъ мо́й, и҆ лѣ҄та моѧ҄ въ воздыха́нїихъ: и҆знемо́же нището́ю крѣ́пость моѧ̀, и҆ кѡ́сти моѧ҄ смѧто́шасѧ.

¹²Ѿ всѣ́хъ вра҄гъ мои́хъ бы́хъ поноше́нїе, и҆ сосѣ́дѡмъ мои҄мъ ѕѣлѡ̀, и҆ стра́хъ зна́ємымъ мои҄мъ: ви́дѧщїи мѧ̀ во́нъ бѣжа́ша ѿ менє̀.

¹³Забве́нъ бы́хъ ѩ҆́кѡ ме́ртвъ ѿ се́рдца: бы́хъ ѩ҆́кѡ сосѹ́дъ погѹбле́нъ.

¹⁴ѩ҆́кѡ слы́шахъ гажде́нїе {ѹ҆коре́нїе} мно́гихъ живѹ́щихъ ѡ҆́крестъ: внегда̀ собра́тисѧ и҆̀мъ вкѹ́пѣ на мѧ̀, прїѧ́ти дѹ́шѹ мою̀ совѣща́ша.

¹⁵А҆́зъ же на тѧ̀, гд҇и, ѹ҆пова́хъ, рѣ́хъ: ты̀ є҆сѝ бг҃ъ мо́й.

¹⁶Въ рѹкѹ̀ твоє́ю жрє́бїи моѝ: и҆зба́ви мѧ̀ и҆з̾ рѹкѝ вра҄гъ мои́хъ и҆ ѿ гонѧ́щихъ мѧ̀.

¹⁷Просвѣтѝ лицѐ твоѐ на раба̀ твоего̀: сп҃си́ мѧ мл҇тїю твое́ю.

¹⁸Гд҇и, да не постыжѹ́сѧ, ѩ҆́кѡ призва́хъ тѧ̀: да постыдѧ́тсѧ нечести́вїи, и҆ сни́дѹтъ во а҆́дъ.

¹⁹Нѣ҄мы да бѹ́дѹтъ ѹ҆стны̀ льсти҄выѧ, глаго́лющыѧ на првднаго беззако́нїе, горды́нею и҆ ѹ҆ничиже́нїемъ.

²⁰Ко́ль мно́гое мно́жество бл҃гости твоеѧ̀, гд҇и, ю҆́же скры́лъ є҆сѝ боѧ́щымсѧ тебє̀, содѣ́лалъ є҆сѝ ѹ҆пова́ющымъ на тѧ̀, пред̾ сы҄ны человѣ́ческими:

²¹скры́еши и҆̀хъ въ та́йнѣ лица̀ твоегѡ̀ ѿ мѧте́жа человѣ́ческа, покры́еши и҆̀хъ въ кро́вѣ ѿ прерѣка́нїѧ ѧ҆зы҄къ.

²²Блг҇ве́нъ гд҇ь, ѩ҆́кѡ ѹ҆дивѝ мл҇ть свою̀ во гра́дѣ ѡ҆гражде́нїѧ.

²³А҆́зъ же рѣ́хъ во и҆зстѹпле́нїи мое́мъ: ѿве́рженъ є҆́смь ѿ лица̀ ѻ҆́чїю твоє́ю: сегѡ̀ ра́ди ѹ҆слы́шалъ є҆сѝ гла́съ моли́твы моеѧ̀, внегда̀ воззва́хъ къ тебѣ̀.

²⁴Возлюби́те гд҇а, всѝ прпдбнїи є҆гѡ̀: ѩ҆́кѡ и҆́стины взыска́етъ гд҇ь и҆ воздае́тъ и҆зли́ше творѧ́щымъ горды́ню.

²⁵Мѹжа́йтесѧ, и҆ да крѣпи́тсѧ се́рдце ва́ше, всѝ ѹ҆пова́ющїи на гд҇а.