Read Библия Церковнославянская Ѱалти́рь 32 Bible Online

Ѱалти́рь 32 - Библия Церковнославянская bible

Ѱалти́рь 32

¹ Ра́дѹйтесѧ, првднїи, ѡ҆ гд҇ѣ: пра҄вымъ подоба́етъ похвала̀.

²И҆сповѣ́дайтесѧ гд҇еви въ гѹ́слехъ, во ѱалти́ри десѧтострѹ́ннѣмъ по́йте є҆мѹ̀:

³воспо́йте є҆мѹ̀ пѣ́снь но́вѹ, до́брѣ по́йте є҆мѹ̀ со восклица́нїемъ:

⁴ѩ҆́кѡ пра́во сло́во гд҇не, и҆ всѧ҄ дѣла̀ є҆гѡ̀ въ вѣ́рѣ.

⁵Лю́битъ мл҇тыню и҆ сѹ́дъ гд҇ь, мл҇ти гд҇ни и҆спо́лнь землѧ̀.

⁶Сло́вомъ гд҇нимъ небеса̀ ѹ҆тверди́шасѧ, и҆ дх҃омъ ѹ҆́стъ є҆гѡ̀ всѧ̀ си́ла и҆́хъ:

⁷собира́ѧй ѩ҆́кѡ мѣ́хъ во́ды морскї҄ѧ, полага́ѧй въ сокро́вищихъ бе́здны.

⁸Да ѹ҆бои́тсѧ гд҇а всѧ̀ землѧ̀, ѿ негѡ́же да подви́жѹтсѧ всѝ живѹ́щїи по вселе́ннѣй:

⁹ѩ҆́кѡ то́й речѐ, и҆ бы́ша: то́й повелѣ̀, и҆ созда́шасѧ.

¹⁰Гд҇ь разорѧ́етъ совѣ́ты ѩ҆зы́кѡвъ, ѿмета́етъ же мы҄сли люді́й и҆ ѿмета́етъ совѣ́ты кнѧзе́й.

¹¹Совѣ́тъ же гд҇ень во вѣ́къ пребыва́етъ, помышлє́нїѧ срдца є҆гѡ̀ въ ро́дъ и҆ ро́дъ.

¹²Бл҃же́нъ ѩ҆зы́къ, є҆мѹ́же є҆́сть гд҇ь бг҃ъ є҆гѡ̀, лю́дїе, ѩ҆̀же и҆збра̀ въ наслѣ́дїе себѣ̀.

¹³Съ нб҃сѐ призрѣ̀ гд҇ь, ви́дѣ всѧ҄ сы́ны человѣ́чєскїѧ:

¹⁴ѿ гото́вагѡ жили́ща своегѡ̀ призрѣ̀ на всѧ҄ живѹ́щыѧ на землѝ:

¹⁵созда́вый на є҆ди́нѣ сердца̀ и҆́хъ, разѹмѣва́ѧй на всѧ҄ дѣла̀ и҆́хъ.

¹⁶Не спаса́етсѧ ца́рь мно́гою си́лою, и҆ и҆споли́нъ не спасе́тсѧ мно́жествомъ крѣ́пости своеѧ̀.

¹⁷Ло́жь ко́нь во спасе́нїе, во мно́жествѣ же си́лы своеѧ̀ не спасе́тсѧ.

¹⁸Сѐ, ѻ҆́чи гд҇ни на боѧ́щыѧсѧ є҆гѡ̀, ѹ҆пова́ющыѧ на мл҇ть є҆гѡ̀:

¹⁹и҆зба́вити ѿ сме́рти дѹ́шы и҆́хъ, и҆ препита́ти ѧ҆̀ въ гла́дъ.

²⁰Дѹша́ же на́ша ча́етъ гд҇а, ѩ҆́кѡ помо́щникъ и҆ защи́титель на́шъ є҆́сть:

²¹ѩ҆́кѡ ѡ҆ не́мъ возвесели́тсѧ се́рдце на́ше, и҆ во и҆́мѧ ст҃о́е є҆гѡ̀ ѹ҆пова́хомъ.

²²Бѹ́ди, гд҇и, мл҇ть твоѧ̀ на на́съ, ѩ҆́коже ѹ҆пова́хомъ на тѧ̀.