Read Библия Церковнославянская Ѱалти́рь 33 Bible Online

Ѱалти́рь 33 - Библия Церковнославянская bible

Ѱалти́рь 33

¹Ѱало́мъ дв҃дѹ, внегда̀ и҆змѣнѝ лицѐ своѐ пред̾ а҆вїмеле́хомъ: и҆ ѿпѹстѝ є҆го̀, и҆ ѿи́де,

²Благословлю̀ гд҇а на всѧ́кое вре́мѧ, вы́нѹ хвала̀ є҆гѡ̀ во ѹ҆стѣ́хъ мои́хъ.

³Ѡ҆ гд҇ѣ похва́литсѧ дѹша̀ моѧ̀: да ѹ҆слы́шатъ кро́тцыи и҆ возвеселѧ́тсѧ.

⁴Возвели́чите гд҇а со мно́ю, и҆ вознесе́мъ и҆́мѧ є҆гѡ̀ вкѹ́пѣ.

⁵Взыска́хъ гд҇а, и҆ ѹ҆слы́ша мѧ̀ и҆ ѿ всѣ́хъ скорбе́й мои́хъ и҆зба́ви мѧ̀.

⁶Пристѹпи́те къ немѹ̀ и҆ просвѣти́тесѧ, и҆ ли́ца ва҄ша не постыдѧ́тсѧ.

⁷Се́й ни́щїй воззва̀, и҆ гд҇ь ѹ҆слы́ша и҆̀, и҆ ѿ всѣ́хъ скорбе́й є҆гѡ̀ сп҃сѐ и҆̀.

⁸Ѡ҆полчи́тсѧ а҆́гг҃лъ гд҇ень ѡ҆́крестъ боѧ́щихсѧ є҆гѡ̀ и҆ и҆зба́витъ и҆̀хъ.

⁹Вкѹси́те и҆ ви́дите, ѩ҆́кѡ бл҃гъ гд҇ь: бл҃же́нъ мѹ́жъ, и҆́же ѹ҆пова́етъ на́нь.

¹⁰Бо́йтесѧ гд҇а, всѝ ст҃і́и є҆гѡ̀, ѩ҆́кѡ нѣ́сть лише́нїѧ боѧ́щымсѧ є҆гѡ̀.

¹¹Бога́тїи ѡ҆бнища́ша и҆ взалка́ша: взыска́ющїи же гд҇а не лиша́тсѧ всѧ́кагѡ бла́га.

¹²Прїиди́те, ча҄да, послѹ́шайте менє̀, стра́хѹ гд҇ню наѹчѹ̀ ва́съ.

¹³Кто́ є҆сть человѣ́къ хотѧ́й живо́тъ, любѧ́й дни҄ ви́дѣти бла́ги;

¹⁴Ѹ҆держѝ ѧ҆зы́къ тво́й ѿ ѕла̀ и҆ ѹ҆стнѣ̀ твоѝ, є҆́же не глаго́лати льстѝ.

¹⁵Ѹ҆клони́сѧ ѿ ѕла̀ и҆ сотворѝ бла́го: взыщѝ ми́ра и҆ поженѝ и҆̀.

¹⁶Ѻ҆́чи гд҇ни на првдныѧ, и҆ ѹ҆́ши є҆гѡ̀ въ моли́твѹ и҆́хъ.

¹⁷Лице́ же гд҇не на творѧ́щыѧ ѕла҄ѧ, є҆́же потреби́ти ѿ землѝ па́мѧть и҆́хъ.

¹⁸Воззва́ша првднїи, и҆ гд҇ь ѹ҆слы́ша и҆̀хъ и҆ ѿ всѣ́хъ скорбе́й и҆́хъ и҆зба́ви и҆̀хъ.

¹⁹Бли́з̾ гд҇ь сокрѹше́нныхъ се́рдцемъ, и҆ смирє́нныѧ дѹ́хомъ сп҃се́тъ.

²⁰Мнѡ́ги скѡ́рби првднымъ, и҆ ѿ всѣ́хъ и҆́хъ и҆зба́витъ ѧ҆̀ гд҇ь.

²¹Храни́тъ гд҇ь всѧ҄ кѡ́сти и҆́хъ, ни є҆ди́на ѿ ни́хъ сокрѹши́тсѧ.

²²Сме́рть грѣ́шникѡвъ люта̀, и҆ ненави́дѧщїи првднаго прегрѣша́тъ.

²³И҆зба́витъ гд҇ь дѹ́шы ра҄бъ свои́хъ, и҆ не прегрѣша́тъ всѝ ѹ҆пова́ющїи на него̀.