Read Библия Церковнославянская Ѱалти́рь 34 Bible Online

Ѱалти́рь 34 - Библия Церковнославянская bible

Ѱалти́рь 34

¹ Сѹдѝ, гд҇и, ѡ҆би́дѧщыѧ мѧ̀, поборѝ борю́щыѧ мѧ̀.

²Прїимѝ ѻ҆рѹ́жїе и҆ щи́тъ и҆ воста́ни въ по́мощь мою̀:

³и҆зсѹ́ни ме́чь и҆ заключѝ сопроти́въ гонѧ́щихъ мѧ̀: рцы̀ дѹшѝ мое́й: сп҇нїе твоѐ є҆́смь а҆́зъ.

⁴Да постыдѧ́тсѧ и҆ посра́мѧтсѧ и҆́щѹщїи дѹ́шѹ мою̀, да возвратѧ́тсѧ вспѧ́ть и҆ постыдѧ́тсѧ мы́слѧщїи мѝ ѕла҄ѧ.

⁵Да бѹ́дѹтъ ѩ҆́кѡ пра́хъ пред̾ лице́мъ вѣ́тра, и҆ а҆́гг҃лъ гд҇ень ѡ҆скорблѧ́ѧ и҆̀хъ:

⁶да бѹ́детъ пѹ́ть и҆́хъ тма̀ и҆ по́лзокъ, и҆ а҆́гг҃лъ гд҇ень погонѧ́ѧй и҆̀хъ:

⁷ѩ҆́кѡ тѹ́не скры́ша мѝ па́гѹбѹ сѣ́ти своеѧ̀, всѹ́е поноси́ша дѹшѝ мое́й.

⁸Да прїи́детъ є҆мѹ̀ сѣ́ть, ю҆́же не вѣ́сть, и҆ лови́тва, ю҆́же скры̀, да ѡ҆бы́метъ и҆̀, и҆ въ сѣ́ть да впаде́тъ въ ню̀.

⁹Дѹша́ же моѧ̀ возра́дѹетсѧ ѡ҆ гд҇ѣ, возвесели́тсѧ ѡ҆ сп҇нїи є҆гѡ̀.

¹⁰Всѧ҄ кѡ́сти моѧ҄ рекѹ́тъ: гд҇и, гд҇и, кто̀ подо́бенъ тебѣ̀; и҆збавлѧ́ѧй ни́ща и҆з̾ рѹкѝ крѣ́пльшихъ є҆гѡ̀, и҆ ни́ща, и҆ ѹ҆бо́га ѿ расхища́ющихъ є҆го̀.

¹¹Воста́вше на мѧ̀ свидѣ́телє непра́веднїи, ѩ҆̀же не вѣ́дѧхъ, вопроша́хѹ мѧ̀.

¹²Возда́ша мѝ лѹка҄ваѧ воз̾ бл҃га҄ѧ, и҆ безча́дїе дѹшѝ мое́й.

¹³А҆́зъ же, внегда̀ ѻ҆нѝ стѹжа́хѹ мѝ, ѡ҆блача́хсѧ во вре́тище и҆ смирѧ́хъ посто́мъ дѹ́шѹ мою̀, и҆ моли́тва моѧ̀ въ нѣ́дро моѐ возврати́тсѧ.

¹⁴ѩ҆́кѡ бли́жнемѹ, ѩ҆́кѡ бра́тѹ на́шемѹ, та́кѡ ѹ҆гожда́хъ: ѩ҆́кѡ пла́чѧ и҆ сѣ́тѹѧ, та́кѡ смирѧ́хсѧ.

¹⁵И҆ на мѧ̀ возвесели́шасѧ и҆ собра́шасѧ: собра́шасѧ на мѧ̀ ра҄ны, и҆ не позна́хъ: раздѣли́шасѧ, и҆ не ѹ҆мили́шасѧ.

¹⁶И҆скѹси́ша мѧ̀, подражни́ша мѧ̀ подражне́нїемъ, поскрежета́ша на мѧ̀ зѹбы̀ свои́ми.

¹⁷Гд҇и, когда̀ ѹ҆́зриши; ѹ҆стро́й дѹ́шѹ мою̀ ѿ ѕлодѣ́йства и҆́хъ, ѿ лє́въ є҆диноро́днѹю мою̀.

¹⁸И҆сповѣ́мсѧ тебѣ̀ въ цр҃кви мно́зѣ, въ лю́дехъ тѧ́жцѣхъ восхвалю́ тѧ.

¹⁹Да не возра́дѹютсѧ ѡ҆ мнѣ̀ враждѹ́ющїи мѝ непра́веднѡ, ненави́дѧщїи мѧ̀ тѹ́не и҆ помиза́ющїи ѻ҆чи́ма:

²⁰ѩ҆́кѡ мнѣ̀ ѹ҆́бѡ ми҄рнаѧ глаго́лахѹ, и҆ на гнѣ́въ лє́сти помышлѧ́хѹ.

²¹Разшири́ша на мѧ̀ ѹ҆ста̀ своѧ҄, рѣ́ша: бла́гоже, бла́гоже, ви́дѣша ѻ҆́чи на́ши.

²²Ви́дѣлъ є҆сѝ, гд҇и, да не премолчи́ши: гд҇и, не ѿстѹпѝ ѿ менє̀.

²³Воста́ни, гд҇и, и҆ вонмѝ сѹдѹ̀ моемѹ̀, бж҃е мо́й и҆ гд҇и мо́й, на прю̀ мою̀.

²⁴Сѹди́ ми, гд҇и, по пра́вдѣ твое́й, гд҇и бж҃е мо́й, и҆ да не возра́дѹютсѧ ѡ҆ мнѣ̀.

²⁵Да не рекѹ́тъ въ сердца́хъ свои́хъ: бла́гоже, бла́гоже дѹшѝ на́шей: нижѐ да рекѹ́тъ: пожро́хомъ є҆го̀.

²⁶Да постыдѧ́тсѧ и҆ посра́мѧтсѧ вкѹ́пѣ ра́дѹющїисѧ ѕлѡ́мъ мои҄мъ: да ѡ҆блекѹ́тсѧ въ стѹ́дъ и҆ сра́мъ велерѣ́чѹющїи на мѧ̀.

²⁷Да возра́дѹютсѧ и҆ возвеселѧ́тсѧ хотѧ́щїи пра́вды моеѧ̀: и҆ да рекѹ́тъ вы́нѹ, да возвели́читсѧ гд҇ь, хотѧ́щїи ми́ра рабѹ̀ є҆гѡ̀.

²⁸И҆ ѧ҆зы́къ мо́й поѹчи́тсѧ пра́вдѣ твое́й, ве́сь де́нь хвалѣ̀ твое́й.