Read Библия Церковнославянская Ѱалти́рь 35 Bible Online

Ѱалти́рь 35 - Библия Церковнославянская bible

Ѱалти́рь 35

¹Въ коне́цъ, ѻ҆́трокѹ гд҇ню дв҃дѹ,

²Глаго́летъ пребеззако́нный согрѣша́ти въ себѣ̀: нѣ́сть стра́ха бж҃їѧ пред̾ ѻ҆чи́ма є҆гѡ̀:

³ѩ҆́кѡ ѹ҆льстѝ пред̾ ни́мъ ѡ҆брѣстѝ беззако́нїе своѐ, и҆ возненави́дѣти.

⁴Глаго́лы ѹ҆́стъ є҆гѡ̀ беззако́нїе и҆ ле́сть: не восхотѣ̀ разѹмѣ́ти є҆́же ѹ҆блажи́ти.

⁵Беззако́нїе помы́сли на ло́жи свое́мъ: предста̀ всѧ́комѹ пѹтѝ небла́гѹ, ѡ҆ ѕло́бѣ же не негодова̀.

⁶Гд҇и, на нб҃сѝ мл҇ть твоѧ̀, и҆ и҆́стина твоѧ̀ до ѡ҆́блакъ:

⁷пра́вда твоѧ̀ ѩ҆́кѡ го́ры бж҃їѧ, сѹдбы҄ твоѧ҄ бе́здна мно́га: человѣ́ки и҆ скоты̀ сп҃се́ши, гд҇и.

⁸ѩ҆́кѡ ѹ҆мно́жилъ є҆сѝ мл҇ть твою̀, бж҃е: сы́нове же человѣ́честїи въ кро́вѣ крилѹ҄ твоє́ю надѣ́ѧтисѧ и҆́мѹтъ.

⁹Ѹ҆пїю́тсѧ ѿ тѹ́ка до́мѹ твоегѡ̀, и҆ пото́комъ сла́дости твоеѧ̀ напои́ши ѧ҆̀.

¹⁰ѩ҆́кѡ ѹ҆ тебє̀ и҆сто́чникъ живота̀, во свѣ́тѣ твое́мъ ѹ҆́зримъ свѣ́тъ.

¹¹Проба́ви мл҇ть твою̀ вѣ́дѹщымъ тѧ̀ и҆ пра́вдѹ твою̀ пра҄вымъ се́рдцемъ.

¹²Да не прїи́детъ мнѣ̀ нога̀ горды́ни, и҆ рѹка̀ грѣ́шнича да не подви́житъ менѐ.

¹³Та́мѡ падо́ша всѝ дѣ́лающїи беззако́нїе: и҆зринове́ни бы́ша, и҆ не возмо́гѹтъ ста́ти.