Read Библия Церковнославянская Ѱалти́рь 36 Bible Online

Ѱалти́рь 36 - Библия Церковнославянская bible

Ѱалти́рь 36

¹ Не ревнѹ́й лѹка́внѹющымъ, нижѐ зави́ди творѧ́щымъ беззако́нїе.

²Занѐ ѩ҆́кѡ трава̀ ско́рѡ и҆́зсшѹтъ, и҆ ѩ҆́кѡ ѕе́лїе ѕла́ка ско́рѡ ѿпадѹ́тъ.

³Ѹ҆пова́й на гд҇а и҆ творѝ бл҃госты́ню: и҆ населѝ зе́млю, и҆ ѹ҆пасе́шисѧ въ бога́тствѣ є҆ѧ̀.

⁴Наслади́сѧ гд҇еви, и҆ да́стъ тѝ прошє́нїѧ се́рдца твоегѡ̀.

⁵Ѿкры́й ко гд҇ѹ пѹ́ть тво́й и҆ ѹ҆пова́й на него̀, и҆ то́й сотвори́тъ.

⁶И҆ и҆зведе́тъ ѩ҆́кѡ свѣ́тъ пра́вдѹ твою̀ и҆ сѹдбѹ̀ твою̀ ѩ҆́кѡ полѹ́дне.

⁷Повини́сѧ гд҇еви и҆ ѹ҆молѝ є҆го̀. Не ревнѹ́й спѣ́ющемѹ въ пѹтѝ свое́мъ, человѣ́кѹ творѧ́щемѹ законопрестѹпле́нїе.

⁸Преста́ни ѿ гнѣ́ва и҆ ѡ҆ста́ви ѩ҆́рость: не ревнѹ́й, є҆́же лѹка́вновати,

⁹занѐ лѹка́внѹющїи потребѧ́тсѧ, терпѧ́щїи же гд҇а, ті́и наслѣ́дѧтъ зе́млю.

¹⁰И҆ є҆щѐ ма́лѡ, и҆ не бѹ́детъ грѣ́шника: и҆ взы́щеши мѣ́сто є҆гѡ̀ и҆ не ѡ҆брѧ́щеши.

¹¹Кро́тцыи же наслѣ́дѧтъ зе́млю и҆ насладѧ́тсѧ ѡ҆ мно́жествѣ ми́ра.

¹²Назира́етъ грѣ́шный првднаго и҆ поскреже́щетъ на́нь зѹбы̀ свои́ми:

¹³гд҇ь же посмѣе́тсѧ є҆мѹ̀, занѐ прозира́етъ, ѩ҆́кѡ прїи́детъ де́нь є҆гѡ̀.

¹⁴Ме́чь и҆звлеко́ша грѣ҄шницы, напрѧго́ша лѹ́къ сво́й, низложи́ти ѹ҆бо́га и҆ ни́ща, закла́ти пра҄выѧ се́рдцемъ.

¹⁵Ме́чь и҆́хъ да вни́детъ въ сердца̀ и҆́хъ, и҆ лѹ́цы и҆́хъ да сокрѹша́тсѧ.

¹⁶Лѹ́чше ма́лое првдникѹ, па́че бога́тства грѣ́шныхъ мно́га.

¹⁷Занѐ мы҄шцы грѣ́шныхъ сокрѹша́тсѧ, ѹ҆твержда́етъ же првдныѧ гд҇ь.

¹⁸Вѣ́сть гд҇ь пѹти҄ непоро́чныхъ, и҆ достоѧ́нїе и҆́хъ въ вѣ́къ бѹ́детъ.

¹⁹Не постыдѧ́тсѧ во вре́мѧ лю́тое и҆ во дне́хъ гла́да насы́тѧтсѧ, ѩ҆́кѡ грѣ҄шницы поги́бнѹтъ.

²⁰Врази́ же гд҇ни, кѹ́пнѡ просла́витисѧ и҆̀мъ и҆ вознести́сѧ, и҆зчеза́юще ѩ҆́кѡ ды́мъ и҆зчезо́ша.

²¹Зае́млетъ грѣ́шный и҆ не возврати́тъ: првдный же ще́дритъ и҆ дае́тъ.

²²ѩ҆́кѡ благословѧ́щїи є҆го̀ наслѣ́дѧтъ зе́млю, кленѹ́щїи же є҆го̀ потребѧ́тсѧ.

²³Ѿ гд҇а стѡпы̀ человѣ́кѹ и҆справлѧ́ютсѧ, и҆ пѹтѝ є҆гѡ̀ восхо́щетъ ѕѣлѡ̀.

²⁴Є҆гда̀ паде́тъ, не разбїе́тсѧ, ѩ҆́кѡ гд҇ь подкрѣплѧ́етъ рѹ́кѹ є҆гѡ̀.

²⁵Ю҆нѣ́йшїй бы́хъ, и҆́бо состарѣ́хсѧ, и҆ не ви́дѣхъ првдника ѡ҆ста́влена, нижѐ сѣ́мене є҆гѡ̀ просѧ́ща хлѣ́бы.

²⁶Ве́сь де́нь ми́лѹетъ и҆ взаи́мъ дае́тъ првдный, и҆ сѣ́мѧ є҆гѡ̀ во бл҃гослове́нїе бѹ́детъ.

²⁷Ѹ҆клони́сѧ ѿ ѕла̀ и҆ сотворѝ бл҃го, и҆ всели́сѧ въ вѣ́къ вѣ́ка.

²⁸ѩ҆́кѡ гд҇ь лю́битъ сѹ́дъ и҆ не ѡ҆ста́витъ прпдбныхъ свои́хъ: во вѣ́къ сохранѧ́тсѧ: беззакѡ́нницы же и҆зженѹ́тсѧ, и҆ сѣ́мѧ нечести́выхъ потреби́тсѧ.

²⁹Првдницы же наслѣ́дѧтъ зе́млю и҆ вселѧ́тсѧ въ вѣ́къ вѣ́ка на не́й.

³⁰Ѹ҆ста̀ првднагѡ поѹча́тсѧ премдрости, и҆ ѧ҆зы́къ є҆гѡ̀ возглаго́летъ сѹ́дъ.

³¹Зако́нъ бг҃а є҆гѡ̀ се́рдцы є҆гѡ̀, и҆ не за́пнѹтсѧ стѡпы̀ є҆гѡ̀.

³²Сматрѧ́етъ грѣ́шный првднаго и҆ и҆́щетъ є҆́же ѹ҆мертви́ти є҆го̀:

³³гд҇ь же не ѡ҆ста́витъ є҆гѡ̀ въ рѹкѹ̀ є҆гѡ̀, нижѐ ѡ҆сѹ́дитъ є҆го̀, є҆гда̀ сѹ́дитъ є҆мѹ̀.

³⁴Потерпѝ гд҇а и҆ сохранѝ пѹ́ть є҆гѡ̀, и҆ вознесе́тъ тѧ̀ є҆́же наслѣ́дити зе́млю: внегда̀ потреблѧ́тисѧ грѣ́шникѡмъ, ѹ҆́зриши.

³⁵Ви́дѣхъ нечести́ваго превозносѧ́щасѧ и҆ вы́сѧщасѧ ѩ҆́кѡ ке́дры лїва҄нскїѧ:

³⁶и҆ ми́мѡ и҆до́хъ, и҆ сѐ, не бѣ̀, и҆ взыска́хъ є҆го̀, и҆ не ѡ҆брѣ́тесѧ мѣ́сто є҆гѡ̀.

³⁷Хранѝ неѕло́бїе и҆ ви́ждь правотѹ̀, ѩ҆́кѡ є҆́сть ѡ҆ста́нокъ человѣ́кѹ ми́рнѹ.

³⁸Беззакѡ́нницы же потребѧ́тсѧ вкѹ́пѣ: ѡ҆ста́нцы же нечести́выхъ потребѧ́тсѧ.

³⁹Сп҃се́нїе же првдныхъ ѿ гд҇а, и҆ защи́титель и҆́хъ є҆́сть во вре́мѧ ско́рби:

⁴⁰и҆ помо́жетъ и҆̀мъ гд҇ь и҆ и҆зба́витъ и҆̀хъ, и҆ и҆́зметъ и҆̀хъ ѿ грѣ҄шникъ и҆ сп҃се́тъ и҆̀хъ, ѩ҆́кѡ ѹ҆пова́ша на него̀.