Read Библия Церковнославянская Ѱалти́рь 39 Bible Online

Ѱалти́рь 39 - Библия Церковнославянская bible

Ѱалти́рь 39

¹Въ коне́цъ, ѱало́мъ дв҃дѹ,

²Терпѧ̀ потерпѣ́хъ гд҇а, и҆ внѧ́тъ мѝ и҆ ѹ҆слы́ша моли́твѹ мою̀:

³и҆ возведе́ мѧ ѿ ро́ва страсте́й и҆ ѿ бре́нїѧ ти́ны, и҆ поста́ви на ка́мени но́зѣ моѝ и҆ и҆спра́ви стѡпы̀ моѧ҄:

⁴и҆ вложѝ во ѹ҆ста̀ моѧ҄ пѣ́снь но́вѹ, пѣ́нїе бг҃ѹ на́шемѹ. Ѹ҆́зрѧтъ мно́зи и҆ ѹ҆боѧ́тсѧ, и҆ ѹ҆пова́ютъ на гд҇а.

⁵Бл҃же́нъ мѹ́жъ, є҆мѹ́же є҆́сть и҆́мѧ гд҇не ѹ҆пова́нїе є҆гѡ̀, и҆ не призрѣ̀ въ сѹєты̀ и҆ неистовлє́нїѧ лѡ́жнаѧ.

⁶Мнѡ́га сотвори́лъ є҆сѝ ты̀, гд҇и бж҃е мо́й, чѹдеса̀ твоѧ҄, и҆ помышле́нїємъ твои҄мъ нѣ́сть кто̀ ѹ҆подо́битсѧ тебѣ̀: возвѣсти́хъ и҆ глаго́лахъ: ѹ҆мно́жишасѧ па́че числа̀.

⁷Же́ртвы и҆ приноше́нїѧ не восхотѣ́лъ є҆сѝ, тѣ́ло же сверши́лъ мѝ є҆сѝ: всесожже́нїй и҆ ѡ҆ грѣсѣ̀ не взыска́лъ є҆сѝ.

⁸Тогда̀ рѣ́хъ: сѐ, прїидѹ̀: въ глави́знѣ кни́жнѣ пи́сано є҆́сть ѡ҆ мнѣ̀:

⁹є҆́же сотвори́ти во́лю твою̀, бж҃е мо́й, восхотѣ́хъ, и҆ зако́нъ тво́й посредѣ̀ чре́ва моегѡ̀.

¹⁰Благовѣсти́хъ пра́вдѹ въ цр҃кви вели́цѣй, сѐ, ѹ҆стна́мъ мои҄мъ не возбраню̀: гд҇и, ты̀ разѹмѣ́лъ є҆сѝ.

¹¹Пра́вдѹ твою̀ не скры́хъ въ се́рдцы мое́мъ, и҆́стинѹ твою̀ и҆ сп҃се́нїе твоѐ рѣ́хъ, не скры́хъ мл҇ть твою̀ и҆ и҆́стинѹ твою̀ ѿ со́нма мно́га.

¹²Ты́ же, гд҇и, не ѹ҆далѝ щедро́тъ твои́хъ ѿ менє̀: мл҇ть твоѧ̀ и҆ и҆́стина твоѧ̀ вы́нѹ да застѹ́питѣ мѧ̀.

¹³ѩ҆́кѡ ѡ҆держа́ша мѧ̀ ѕла҄ѧ, и҆̀мже нѣ́сть числа̀: постиго́ша мѧ̀ беззакѡ́нїѧ моѧ҄, и҆ не возмого́хъ зрѣ́ти: ѹ҆мно́жишасѧ па́че вла҄съ главы̀ моеѧ̀, и҆ се́рдце моѐ ѡ҆ста́ви мѧ̀.

¹⁴Бл҃говолѝ, гд҇и, и҆зба́вити мѧ̀: гд҇и, во є҆́же помощи́ ми, вонмѝ.

¹⁵Да постыдѧ́тсѧ и҆ посра́мѧтсѧ вкѹ́пѣ и҆́щѹщїи дѹ́шѹ мою̀, и҆з̾ѧ́ти ю҆̀: да возвратѧ́тсѧ вспѧ́ть и҆ постыдѧ́тсѧ хотѧ́щїи мѝ ѕла҄ѧ.

¹⁶Да прїи́мѹтъ а҆́бїе стѹ́дъ сво́й глаго́лющїи мѝ: бла́гоже, бла́гоже.

¹⁷Да возра́дѹютсѧ и҆ возвеселѧ́тсѧ ѡ҆ тебѣ̀ всѝ и҆́щѹщїи тебѐ, гд҇и, и҆ да рекѹ́тъ вы́нѹ, да возвели́читсѧ гд҇ь, лю́бѧщїи сп҃се́нїе твоѐ.

¹⁸А҆́зъ же ни́щъ є҆́смь и҆ ѹ҆бо́гъ, гд҇ь попече́тсѧ ѡ҆ мнѣ̀: помо́щникъ мо́й и҆ защи́титель мо́й є҆сѝ ты̀, бж҃е мо́й, не закоснѝ.