Read Библия Церковнославянская Ѱалти́рь 40 Bible Online

Ѱалти́рь 40 - Библия Церковнославянская bible

Ѱалти́рь 40

¹Въ коне́цъ, ѱало́мъ дв҃дѹ,

²Бл҃же́нъ разѹмѣва́ѧй на ни́ща и҆ ѹ҆бо́га, въ де́нь лю́тъ и҆зба́витъ є҆го̀ гд҇ь.

³Гд҇ь да сохрани́тъ є҆го̀ и҆ живи́тъ є҆го̀, и҆ да ѹ҆бл҃жи́тъ є҆го̀ на землѝ и҆ да не преда́стъ є҆гѡ̀ въ рѹ́ки врагѡ́въ є҆гѡ̀.

⁴Гд҇ь да помо́жетъ є҆мѹ̀ на ѻ҆дрѣ̀ болѣ́зни є҆гѡ̀: всѐ ло́же є҆гѡ̀ ѡ҆брати́лъ є҆сѝ въ болѣ҄зни є҆гѡ̀.

⁵А҆́зъ рѣ́хъ: гд҇и, поми́лѹй мѧ̀, и҆зцѣлѝ дѹ́шѹ мою̀, ѩ҆́кѡ согрѣши́хъ тѝ.

⁶Вразѝ моѝ рѣ́ша мнѣ̀ ѕла҄ѧ: когда̀ ѹ҆́мретъ, и҆ поги́бнетъ и҆́мѧ є҆гѡ̀;

⁷И҆ вхожда́ше ви́дѣти, всѹ́е глаго́лаше се́рдце є҆гѡ̀: собра̀ беззако́нїе себѣ̀, и҆схожда́ше во́нъ и҆ глаго́лаше вкѹ́пѣ.

⁸На мѧ̀ шепта́хѹ всѝ вразѝ моѝ, на мѧ̀ помышлѧ́хѹ ѕла҄ѧ мнѣ̀.

⁹Сло́во законопрестѹ́пное возложи́ша на мѧ̀: є҆да̀ спѧ́й не приложи́тъ воскреснѹ́ти;

¹⁰И҆́бо человѣ́къ ми́ра моегѡ̀, на него́же ѹ҆пова́хъ, ѩ҆ды́й хлѣ́бы моѧ҄, возвели́чи на мѧ̀ запина́нїе.

¹¹Ты́ же, гд҇и, поми́лѹй мѧ̀ и҆ возста́ви мѧ̀, и҆ возда́мъ и҆̀мъ.

¹²Въ се́мъ позна́хъ, ѩ҆́кѡ восхотѣ́лъ мѧ̀ є҆сѝ, ѩ҆́кѡ не возра́дѹетсѧ вра́гъ мо́й ѡ҆ мнѣ̀.

¹³Мене́ же за неѕло́бїе прїѧ́лъ, и҆ ѹ҆тверди́лъ мѧ̀ є҆сѝ пред̾ тобо́ю въ вѣ́къ.

¹⁴Блг҇ве́нъ гд҇ь бг҃ъ ї҆и҃левъ ѿ вѣ́ка и҆ до вѣ́ка: бѹ́ди, бѹ́ди.