Read Библия Церковнославянская Ѱалти́рь 42 Bible Online

Ѱалти́рь 42 - Библия Церковнославянская bible

Ѱалти́рь 42

¹ Сѹди́ ми, бж҃е, и҆ разсѹдѝ прю̀ мою̀: ѿ ѩ҆зы́ка не преподо́бна, ѿ человѣ́ка непра́ведна и҆ льсти́ва и҆зба́ви мѧ̀.

²Занѐ ты̀ є҆сѝ, бж҃е, крѣ́пость моѧ̀, вскѹ́ю ѿри́нѹлъ мѧ̀ є҆сѝ; и҆ вскѹ́ю сѣ́тѹѧ хождѹ̀, внегда̀ ѡ҆скорблѧ́етъ вра́гъ;

³Послѝ свѣ́тъ тво́й и҆ и҆́стинѹ твою̀: та҄ мѧ̀ наста́виста, и҆ введо́ста мѧ̀ въ го́рѹ ст҃ѹ́ю твою̀ и҆ въ селє́нїѧ твоѧ҄.

⁴И҆ вни́дѹ къ же́ртвенникѹ бж҃їю, къ бг҃ѹ веселѧ́щемѹ ю҆́ность мою̀: и҆сповѣ́мсѧ тебѣ̀ въ гѹ́слехъ, бж҃е, бж҃е мо́й.

⁵Вскѹ́ю приско́рбна є҆сѝ, дѹшѐ моѧ̀; и҆ вскѹ́ю смѹща́еши мѧ̀; ѹ҆пова́й на бг҃а, ѩ҆́кѡ и҆сповѣ́мсѧ є҆мѹ̀, сп҃се́нїе лица̀ моегѡ̀ и҆ бг҃ъ мо́й.