Read Библия Церковнославянская Ѱалти́рь 43 Bible Online

Ѱалти́рь 43 - Библия Церковнославянская bible

Ѱалти́рь 43

¹Въ коне́цъ, сынѡ́въ коре́овыхъ, въ ра́зѹмъ, ѱало́мъ,

²Бж҃е, ѹ҆ши́ма на́шима ѹ҆слы́шахомъ, и҆ ѻ҆тцы̀ на́ши возвѣсти́ша на́мъ дѣ́ло, є҆́же содѣ́лалъ є҆сѝ во дне́хъ и҆́хъ, во дне́хъ дре́внихъ.

³Рѹка̀ твоѧ̀ ѩ҆зы́ки потребѝ, и҆ насади́лъ ѧ҆̀ є҆сѝ: ѡ҆ѕло́билъ є҆сѝ лю́ди и҆ и҆згна́лъ є҆сѝ ѧ҆̀.

⁴Не бо мече́мъ свои́мъ наслѣ́диша зе́млю, и҆ мы́шца и҆́хъ не спасѐ и҆́хъ, но десни́ца твоѧ̀ и҆ мы́шца твоѧ̀ и҆ просвѣще́нїе лица̀ твоегѡ̀, ѩ҆́кѡ бл҃говоли́лъ є҆сѝ въ ни́хъ.

⁵Ты̀ є҆сѝ са́мъ цр҃ь мо́й и҆ бг҃ъ мо́й, заповѣ́даѧй спасє́нїѧ ї҆а҄кѡвлѧ.

⁶Ѡ҆ тебѣ̀ врагѝ на́шѧ и҆збоде́мъ рѡ́ги, и҆ ѡ҆ и҆́мени твое́мъ ѹ҆ничижи́мъ востаю́щыѧ на ны̀.

⁷Не на лѹ́къ бо мо́й ѹ҆пова́ю, и҆ ме́чь мо́й не спасе́тъ менѐ:

⁸сп҇лъ бо є҆сѝ на́съ ѿ стѹжа́ющихъ на́мъ, и҆ ненави́дѧщихъ на́съ посрами́лъ є҆сѝ.

⁹Ѡ҆ бз҃ѣ похва́лимсѧ ве́сь де́нь, и҆ ѡ҆ и҆́мени твое́мъ и҆сповѣ́мысѧ во вѣ́къ.

¹⁰Нн҃ѣ же ѿри́нѹлъ є҆сѝ и҆ посрами́лъ є҆сѝ на́съ, и҆ не и҆зы́деши, бж҃е, въ си́лахъ на́шихъ.

¹¹Возврати́лъ є҆сѝ на́съ вспѧ́ть при вразѣ́хъ на́шихъ, и҆ ненави́дѧщїи на́съ расхища́хѹ себѣ̀.

¹²Да́лъ є҆сѝ на́съ ѩ҆́кѡ ѻ҆́вцы снѣ́ди, и҆ во ѩ҆зы́цѣхъ разсѣ́ѧлъ ны̀ є҆сѝ.

¹³Ѿда́лъ є҆сѝ лю́ди твоѧ҄ без̾ цѣны̀, и҆ не бѣ̀ мно́жество въ восклица́нїихъ на́шихъ.

¹⁴Положи́лъ є҆сѝ на́съ поноше́нїе сосѣ́дѡмъ на́шымъ, подражне́нїе и҆ порѹга́нїе сѹ́щымъ ѡ҆́крестъ на́съ.

¹⁵Положи́лъ є҆сѝ на́съ въ при́тчѹ во ѩ҆зы́цѣхъ, покива́нїю главы̀ въ лю́дехъ.

¹⁶Ве́сь де́нь сра́мъ мо́й предо мно́ю є҆́сть, и҆ стѹ́дъ лица̀ моегѡ̀ покры́ мѧ,

¹⁷ѿ гла́са поноша́ющагѡ и҆ ѡ҆клевета́ющагѡ, ѿ лица̀ вра́жїѧ и҆ и҆згонѧ́щагѡ.

¹⁸Сїѧ҄ всѧ҄ прїидо́ша на ны̀, и҆ не забы́хомъ тебє̀, и҆ не непра́вдовахомъ въ завѣ́тѣ твое́мъ,

¹⁹и҆ не ѿстѹпѝ вспѧ́ть се́рдце на́ше: и҆ ѹ҆клони́лъ є҆сѝ стезѝ на́шѧ ѿ пѹтѝ твоегѡ̀,

²⁰ѩ҆́кѡ смири́лъ є҆сѝ на́съ на мѣ́стѣ ѡ҆ѕлобле́нїѧ, и҆ прикры́ ны сѣ́нь сме́ртнаѧ.

²¹А҆́ще забы́хомъ и҆́мѧ бг҃а на́шегѡ, и҆ а҆́ще воздѣ́хомъ рѹ́ки на́шѧ къ бо́гѹ чѹжде́мѹ,

²²не бг҃ъ ли взы́щетъ си́хъ; то́й бо вѣ́сть та҄йнаѧ се́рдца.

²³Занѐ тебє̀ ра́ди ѹ҆мерщвлѧ́емсѧ ве́сь де́нь, вмѣни́хомсѧ ѩ҆́кѡ ѻ҆́вцы заколе́нїѧ.

²⁴Воста́ни, вскѹ́ю спи́ши, гд҇и; воскр҇нѝ, и҆ не ѿри́ни до конца̀.

²⁵Вскѹ́ю лицѐ твоѐ ѿвраща́еши; забыва́еши нищетѹ̀ на́шѹ и҆ ско́рбь на́шѹ;

²⁶ѩ҆́кѡ смири́сѧ въ пе́рсть дѹша̀ на́ша, прильпѐ землѝ ѹ҆тро́ба на́ша.

²⁷Воскр҇нѝ, гд҇и, помозѝ на́мъ, и҆ и҆зба́ви на́съ и҆́мене ра́ди твоегѡ̀.