Read Библия Церковнославянская Ѱалти́рь 47 Bible Online

Ѱалти́рь 47 - Библия Церковнославянская bible

Ѱалти́рь 47

¹Ѱало́мъ пѣ́сни сынѡ́въ коре́овыхъ, вторы́ѧ сѹббѡ́ты,

²Ве́лїй гд҇ь и҆ хва́ленъ ѕѣлѡ̀ во гра́дѣ бг҃а на́шегѡ, въ горѣ̀ ст҃ѣ́й є҆гѡ̀,

³бл҃гокоре́ннымъ ра́дованїемъ всеѧ̀ землѝ: го́ры сїѡ́нскїѧ, ре́бра сѣ́верѡва, гра́дъ цр҃ѧ̀ вели́кагѡ.

⁴Бг҃ъ въ тѧ́жестѣхъ {во хра́мѣхъ} є҆гѡ̀ зна́емь є҆́сть, є҆гда̀ застѹпа́етъ и҆̀.

⁵ѩ҆́кѡ сѐ, ца́рїе зе́мстїи собра́шасѧ, снидо́шасѧ вкѹ́пѣ:

⁶ті́и ви́дѣвше та́кѡ, ѹ҆диви́шасѧ, смѧто́шасѧ, подвиго́шасѧ:

⁷тре́петъ прїѧ́тъ ѧ҆̀ та́мѡ, бѡлѣ́зни ѩ҆́кѡ ражда́ющїѧ.

⁸Дѹ́хомъ бѹ́рнымъ сокрѹши́ши корабли҄ ѳарсї҄йскїѧ.

⁹ѩ҆́коже слы́шахомъ, та́кѡ и҆ ви́дѣхомъ во гра́дѣ гд҇а си́лъ, во гра́дѣ бг҃а на́шегѡ: бг҃ъ ѡ҆снова̀ и҆ въ вѣ́къ.

¹⁰Прїѧ́хомъ, бж҃е, мл҇ть твою̀ посредѣ̀ люді́й твои́хъ.

¹¹По и҆́мени твоемѹ̀, бж҃е, та́кѡ и҆ хвала̀ твоѧ̀ на конца́хъ землѝ: пра́вды и҆спо́лнь десни́ца твоѧ̀.

¹²Да возвесели́тсѧ гора̀ сїѡ́нскаѧ, и҆ да возра́дѹютсѧ дщє́ри ї҆ѹдє́йскїѧ, сѹде́бъ ра́ди твои́хъ, гд҇и.

¹³Ѡ҆быди́те сїѡ́нъ и҆ ѡ҆быми́те є҆го̀, повѣ́дите въ столпѣ́хъ є҆гѡ̀:

¹⁴положи́те сердца̀ ва҄ша въ си́лѹ є҆гѡ̀, и҆ раздѣли́те до́мы є҆гѡ̀, ѩ҆́кѡ да повѣ́сте въ ро́дѣ и҆нѣ́мъ.

¹⁵ѩ҆́кѡ то́й є҆́сть бг҃ъ на́шъ во вѣ́къ и҆ въ вѣ́къ вѣ́ка: то́й ѹ҆пасе́тъ на́съ во вѣ́ки.