Read Библия Церковнославянская Ѱалти́рь 49 Bible Online

Ѱалти́рь 49 - Библия Церковнославянская bible

Ѱалти́рь 49

¹ Бг҃ъ богѡ́въ гд҇ь гл҃а, и҆ призва̀ зе́млю ѿ востѡ́къ со́лнца до за҄падъ.

²Ѿ сїѡ́на бл҃голѣ́пїе красоты̀ є҆гѡ̀:

³бг҃ъ ѩ҆́вѣ прїи́детъ, бг҃ъ на́шъ, и҆ не премолчи́тъ: ѻ҆́гнь пред̾ ни́мъ возгори́тсѧ, и҆ ѡ҆́крестъ є҆гѡ̀ бѹ́рѧ ѕѣ́лна.

⁴Призове́тъ не́бо свы́ше, и҆ зе́млю, разсѹди́ти лю́ди своѧ҄.

⁵Собери́те є҆мѹ̀ прпдбныѧ є҆гѡ̀, завѣща́ющыѧ завѣ́тъ є҆гѡ̀ ѡ҆ же́ртвахъ.

⁶И҆ возвѣстѧ́тъ нб҃са̀ пра́вдѹ є҆гѡ̀: ѩ҆́кѡ бг҃ъ сѹдїѧ̀ є҆́сть.

⁷Ѹ҆слы́шите, лю́дїе моѝ, и҆ возгл҃ю ва́мъ, ї҆и҃лю, и҆ засвидѣ́телствѹю тебѣ̀: бг҃ъ, бг҃ъ тво́й є҆́смь а҆́зъ.

⁸Не ѡ҆ же́ртвахъ твои́хъ ѡ҆бличѹ̀ тѧ̀, всесожжє́нїѧ же твоѧ҄ предо мно́ю сѹ́ть вы́нѹ:

⁹не прїимѹ̀ ѿ до́мѹ твоегѡ̀ телцє́въ, нижѐ ѿ ста́дъ твои́хъ козлѡ́въ.

¹⁰ѩ҆́кѡ моѝ сѹ́ть всѝ ѕвѣ́рїе дѹбра́внїи, ско́ти въ гора́хъ и҆ воло́ве:

¹¹позна́хъ всѧ҄ пти҄цы небє́сныѧ, и҆ красота̀ се́лнаѧ со мно́ю є҆́сть.

¹²А҆́ще вза́лчѹ, не рекѹ̀ тебѣ̀: моѧ́ бо є҆́сть вселе́ннаѧ и҆ и҆сполне́нїе є҆ѧ̀.

¹³Є҆да̀ ѩ҆́мъ мѧса̀ ю҆́нча; и҆лѝ кро́вь козлѡ́въ пїю̀;

¹⁴Пожрѝ бг҃ови же́ртвѹ хвалы̀ и҆ возда́ждь вы́шнемѹ моли҄твы твоѧ҄:

¹⁵и҆ призови́ мѧ въ де́нь ско́рби твоеѧ̀, и҆ и҆змѹ́ тѧ, и҆ просла́виши мѧ̀.

¹⁶Грѣ́шникѹ же речѐ бг҃ъ: вскѹ́ю ты̀ повѣ́даеши ѡ҆правда҄нїѧ моѧ҄ и҆ воспрїе́млеши завѣ́тъ мо́й ѹ҆сты̀ твои́ми;

¹⁷Ты́ же возненави́дѣлъ є҆сѝ наказа́нїе и҆ ѿве́рглъ є҆сѝ словеса̀ моѧ҄ вспѧ́ть.

¹⁸А҆́ще ви́дѣлъ є҆сѝ та́тѧ, те́клъ є҆сѝ съ ни́мъ, и҆ съ прелюбодѣ́емъ ѹ҆ча́стїе твоѐ полага́лъ є҆сѝ:

¹⁹ѹ҆ста̀ твоѧ҄ ѹ҆мно́жиша ѕло́бѹ, и҆ ѧ҆зы́къ тво́й сплета́ше льщє́нїѧ:

²⁰сѣдѧ̀ на бра́та твоего̀ клевета́лъ є҆сѝ и҆ на сы́на ма́тере твоеѧ̀ полага́лъ є҆сѝ собла́знъ.

²¹Сїѧ҄ сотвори́лъ є҆сѝ, и҆ ѹ҆молча́хъ, вознепщева́лъ є҆сѝ беззако́нїе, ѩ҆́кѡ бѹ́дѹ тебѣ̀ подо́бенъ: ѡ҆бличѹ́ тѧ и҆ предста́влю пред̾ лице́мъ твои́мъ грѣхѝ твоѧ҄.

²²Разѹмѣ́йте ѹ҆́бѡ сїѧ҄, забыва́ющїи бг҃а, да не когда̀ похи́титъ, и҆ не бѹ́детъ и҆збавлѧ́ѧй.

²³Же́ртва хвалы̀ просла́витъ мѧ̀, и҆ та́мѡ пѹ́ть, и҆́мже ѩ҆влю̀ є҆мѹ̀ сп҃се́нїе моѐ.