Read Библия Церковнославянская Ѱалти́рь 53 Bible Online

Ѱалти́рь 53 - Библия Церковнославянская bible

Ѱалти́рь 53

¹Въ коне́цъ, въ пѣ́снехъ ра́зѹма дв҃дѹ,

²внегда̀ прїитѝ зїфе́ємъ и҆ рещѝ саѹ́лови: не се́ ли, дв҃дъ скры́сѧ въ на́съ;

³Бж҃е, во и҆́мѧ твоѐ сп҃си́ мѧ и҆ въ си́лѣ твое́й сѹди́ ми.

⁴Бж҃е, ѹ҆слы́ши моли́твѹ мою̀, внѹшѝ глаго́лы ѹ҆́стъ мои́хъ:

⁵ѩ҆́кѡ чѹ́ждїи воста́ша на мѧ̀, и҆ крѣ́пцыи взыска́ша дѹ́шѹ мою̀, и҆ не предложи́ша бг҃а пред̾ собо́ю.

⁶Се́ бо, бг҃ъ помога́етъ мѝ, и҆ гд҇ь застѹ́пникъ дѹшѝ мое́й:

⁷ѿврати́тъ ѕла҄ѧ врагѡ́мъ мои҄мъ: и҆́стиною твое́ю потребѝ и҆̀хъ.

⁸Во́лею пожрѹ̀ тебѣ̀, и҆сповѣ́мсѧ и҆́мени твоемѹ̀, гд҇и, ѩ҆́кѡ бл҃го:

⁹ѩ҆́кѡ ѿ всѧ́кїѧ печа́ли и҆зба́вилъ мѧ̀ є҆сѝ, и҆ на врагѝ моѧ҄ воззрѣ̀ ѻ҆́ко моѐ.