Read Библия Церковнославянская Ѱалти́рь 56 Bible Online

Ѱалти́рь 56 - Библия Церковнославянская bible

Ѱалти́рь 56

¹Въ коне́цъ, да не растли́ши, дв҃дѹ въ столпописа́нїе, внегда̀ є҆мѹ̀ ѿбѣга́ти ѿ лица̀ саѹ́лова въ пеще́рѹ,

²Поми́лѹй мѧ̀, бж҃е, поми́лѹй мѧ̀: ѩ҆́кѡ на тѧ̀ ѹ҆пова̀ дѹша̀ моѧ̀, и҆ на сѣ́нь крилѹ҄ твоє́ю надѣ́юсѧ, до́ндеже пре́йдетъ беззако́нїе.

³Воззовѹ̀ къ бг҃ѹ вы́шнемѹ, бг҃ѹ бл҃годѣ́ѧвшемѹ мнѣ̀.

⁴Посла̀ съ нб҃сѐ и҆ сп҃се́ мѧ, дадѐ въ поноше́нїе попира́ющыѧ мѧ̀: посла̀ бг҃ъ мл҇ть свою̀ и҆ и҆́стинѹ свою̀,

⁵и҆ и҆зба́ви дѹ́шѹ мою̀ ѿ среды̀ скѵ́мнѡвъ. Поспа́хъ смѹще́нъ: сы́нове человѣ́честїи, зѹ́бы и҆́хъ ѻ҆рѹ҄жїѧ и҆ стрѣ́лы, и҆ ѧ҆зы́къ и҆́хъ ме́чь ѻ҆́стръ.

⁶Вознеси́сѧ на нб҃са̀, бж҃е, и҆ по все́й землѝ сла́ва твоѧ̀.

⁷Сѣ́ть ѹ҆гото́ваша нога́мъ мои҄мъ, и҆ слѧко́ша дѹ́шѹ мою̀: и҆скопа́ша пред̾ лице́мъ мои́мъ ѩ҆́мѹ, и҆ впадо́ша въ ню̀.

⁸Гото́во се́рдце моѐ, бж҃е, гото́во се́рдце моѐ: воспою̀ и҆ пою̀ во сла́вѣ мое́й.

⁹Воста́ни, сла́ва моѧ̀, воста́ни, ѱалти́рю и҆ гѹ́сли: воста́нѹ ра́нѡ.

¹⁰И҆сповѣ́мсѧ тебѣ̀ въ лю́дехъ, гд҇и, воспою̀ тебѣ̀ во ѩ҆зы́цѣхъ:

¹¹ѩ҆́кѡ возвели́чисѧ до нб҃съ мл҇ть твоѧ̀ и҆ да́же до ѡ҆́блакъ и҆́стина твоѧ̀.

¹²Вознеси́сѧ на нб҃са̀, бж҃е, и҆ по все́й землѝ сла́ва твоѧ̀.