Read Библия Церковнославянская Ѱалти́рь 60 Bible Online

Ѱалти́рь 60 - Библия Церковнославянская bible

Ѱалти́рь 60

¹Въ коне́цъ, въ пѣ́снехъ, дв҃дѹ ѱало́мъ,

²Ѹ҆слы́ши, бж҃е, моле́нїе моѐ, вонмѝ моли́твѣ мое́й:

³ѿ конє́цъ землѝ къ тебѣ̀ воззва́хъ, внегда̀ ѹ҆ны̀ се́рдце моѐ: на ка́мень возне́слъ мѧ̀ є҆сѝ, наста́вилъ мѧ̀ є҆сѝ,

⁴ѩ҆́кѡ бы́лъ є҆сѝ ѹ҆пова́нїе моѐ, сто́лпъ крѣ́пости ѿ лица̀ вра́жїѧ.

⁵Вселю́сѧ въ селе́нїи твое́мъ во вѣ́ки, покры́юсѧ въ кро́вѣ кри́лъ твои́хъ.

⁶ѩ҆́кѡ ты̀, бж҃е, ѹ҆слы́шалъ є҆сѝ моли҄твы моѧ҄, да́лъ є҆сѝ достоѧ́нїе боѧ́щымсѧ и҆́мене твоегѡ̀.

⁷Дни҄ на дни҄ царє́вы приложи́ши, лѣ҄та є҆гѡ̀ до днѐ ро́да и҆ ро́да.

⁸Пребѹ́детъ въ вѣ́къ пред̾ бг҃омъ: мл҇ть и҆ и҆́стинѹ є҆гѡ̀ кто̀ взы́щетъ;

⁹Та́кѡ воспою̀ и҆́мени твоемѹ̀ во вѣ́ки, возда́ти мѝ моли҄твы моѧ҄ де́нь ѿ днѐ.