Read Библия Церковнославянская Ѱалти́рь 64 Bible Online

Ѱалти́рь 64 - Библия Церковнославянская bible

Ѱалти́рь 64

¹Въ коне́цъ, ѱало́мъ пѣ́сни дв҃дѹ, пѣ́снь ї҆еремі́ева и҆ ї҆езекі́илева, люді́й преселе́нїѧ, є҆гда̀ хотѧ́хѹ и҆сходи́ти,

²Тебѣ̀ подоба́етъ пѣ́снь, бж҃е, въ сїѡ́нѣ, и҆ тебѣ̀ возда́стсѧ моли́тва во ї҆ер҇ли́мѣ.

³Ѹ҆слы́ши моли́твѹ мою̀: къ тебѣ̀ всѧ́ка пло́ть прїи́детъ.

⁴Словеса̀ беззакѡ́нникъ премого́ша на́съ: и҆ нечє́стїѧ на҄ша ты̀ ѡ҆ч҇тиши.

⁵Бл҃же́нъ, є҆го́же и҆збра́лъ є҆сѝ и҆ прїѧ́лъ, всели́тсѧ во дво́рѣхъ твои́хъ. И҆спо́лнимсѧ во бл҃ги́хъ до́мѹ твоегѡ̀: ст҃ъ хра́мъ тво́й.

⁶Ди́венъ въ пра́вдѣ, ѹ҆слы́ши ны̀, бж҃е, сп҃си́телю на́шъ, ѹ҆пова́нїе всѣ́хъ конце́й землѝ и҆ сѹ́щихъ въ мо́ри дале́че:

⁷ѹ҆готовлѧ́ѧй го́ры крѣ́постїю свое́ю, препоѧ́санъ си́лою:

⁸смѹща́ѧй глѹбинѹ̀ морскѹ́ю, шѹ́мѹ во́лнъ є҆гѡ̀ кто̀ постои́тъ; смѧтѹ́тсѧ ѩ҆зы́цы,

⁹и҆ ѹ҆боѧ́тсѧ живѹ́щїи въ конца́хъ ѿ зна́менїй твои́хъ: и҆схо́ды ѹ҆́тра и҆ ве́чера ѹ҆краси́ши.

¹⁰Посѣти́лъ є҆сѝ зе́млю и҆ ѹ҆пои́лъ є҆сѝ ю҆̀, ѹ҆мно́жилъ є҆сѝ ѡ҆богати́ти ю҆̀: рѣка̀ бж҃їѧ напо́лнисѧ во́дъ: ѹ҆гото́валъ є҆сѝ пи́щѹ и҆̀мъ, ѩ҆́кѡ та́кѡ (є҆́сть) ѹ҆гото́ванїе.

¹¹Бразды҄ є҆ѧ̀ ѹ҆по́й, ѹ҆мно́жи жи҄та є҆ѧ̀: въ ка́плѧхъ є҆ѧ̀ возвесели́тсѧ возсїѧ́ющи {прозѧба́ющи}.

¹²Блг҇ви́ши вѣне́цъ лѣ́та бла́гости твоеѧ̀, и҆ полѧ̀ твоѧ҄ и҆спо́лнѧтсѧ тѹ́ка:

¹³разботѣ́ютъ кра҄снаѧ пѹсты́ни, и҆ ра́достїю хо́лми препоѧ́шѹтсѧ.

¹⁴Ѡ҆дѣ́ѧшасѧ ѻ҆́вни ѻ҆́вчїи, и҆ ѹ҆дѡ́лїѧ ѹ҆мно́жатъ пшени́цѹ: воззовѹ́тъ, и҆́бо воспою́тъ.