Read Библия Церковнославянская Ѱалти́рь 67 Bible Online

Ѱалти́рь 67 - Библия Церковнославянская bible

Ѱалти́рь 67

¹Въ коне́цъ, ѱало́мъ пѣ́сни дв҃дѹ,

²Да воскр҇нетъ бг҃ъ, и҆ расточа́тсѧ вразѝ є҆гѡ̀, и҆ да бѣжа́тъ ѿ лица̀ є҆гѡ̀ ненави́дѧщїи є҆го̀.

³ѩ҆́кѡ и҆зчеза́етъ ды́мъ, да и҆зче́знѹтъ: ѩ҆́кѡ та́етъ во́скъ ѿ лица̀ ѻ҆гнѧ̀, та́кѡ да поги́бнѹтъ грѣ҄шницы ѿ лица̀ бж҃їѧ:

⁴а҆ првдницы да возвеселѧ́тсѧ, да возра́дѹютсѧ пред̾ бг҃омъ, да насладѧ́тсѧ въ весе́лїи.

⁵Воспо́йте бг҃ѹ, по́йте и҆́мени є҆гѡ̀: пѹтесотвори́те возше́дшемѹ на за́пады, гд҇ь и҆́мѧ є҆мѹ̀: и҆ ра́дѹйтесѧ пред̾ ни́мъ.

⁶Да смѧтѹ́тсѧ ѿ лица̀ є҆гѡ̀, ѻ҆ц҃а̀ си́рыхъ и҆ сѹдїѝ вдови́цъ: бг҃ъ въ мѣ́стѣ ст҃ѣ́мъ свое́мъ.

⁷Бг҃ъ вселѧ́етъ є҆диномы́слєнныѧ въ до́мъ, и҆зводѧ̀ ѡ҆кова҄нныѧ мѹ́жествомъ, та́кожде преѡгорчева́ющыѧ живѹ́щыѧ во гробѣ́хъ.

⁸Бж҃е, внегда̀ и҆сходи́ти тебѣ̀ пред̾ людьмѝ твои́ми, внегда̀ мимоходи́ти тебѣ̀ въ пѹсты́ни,

⁹землѧ̀ потрѧсе́сѧ, и҆́бо небеса̀ ка́нѹша ѿ лица̀ бг҃а сїна́ина, ѿ лица̀ бг҃а ї҆и҃лева.

¹⁰До́ждь во́ленъ ѿлѹчи́ши, бж҃е, достоѧ́нїю твоемѹ̀, и҆ и҆знемо́же, ты́ же соверши́лъ є҆сѝ є҆̀.

¹¹Живѡ́тнаѧ твоѧ҄ живѹ́тъ на не́й: ѹ҆гото́валъ є҆сѝ бл҃гостїю твое́ю ни́щемѹ, бж҃е.

¹²Гд҇ь да́стъ глаго́лъ благовѣствѹ́ющымъ си́лою мно́гою:

¹³цр҃ь си́лъ возлю́бленнагѡ, красото́ю {ра́ди красоты̀} до́мѹ раздѣли́ти кѡры́сти.

¹⁴А҆́ще поспитѐ посредѣ̀ предѣ҄лъ, крилѣ҄ голѹби҄нѣ посре́брєнѣ, и҆ междора҄мїѧ є҆ѧ̀ въ блеща́нїи зла́та:

¹⁵внегда̀ ра́знствитъ нб҇ный цари҄ на не́й, ѡ҆снѣжа́тсѧ въ селмѡ́нѣ.

¹⁶Гора̀ бж҃їѧ, гора̀ тѹ́чнаѧ, гора̀ ѹ҆сыре́ннаѧ, гора̀ тѹ́чнаѧ.

¹⁷Вскѹ́ю непщѹ́ете, го́ры ѹ҆сырє́нныѧ; гора̀, ю҆́же бл҃говолѝ бг҃ъ жи́ти въ не́й: и҆́бо гд҇ь всели́тсѧ до конца̀.

¹⁸Колесни́ца бж҃їѧ тма́ми те́мъ, ты́сѧща гобзѹ́ющихъ: гд҇ь въ ни́хъ въ сїна́и во ст҃ѣ́мъ.

¹⁹Возше́лъ є҆сѝ на высотѹ̀, плѣни́лъ є҆сѝ плѣ́нъ: прїѧ́лъ є҆сѝ даѧ҄нїѧ въ человѣ́цѣхъ, и҆́бо не покарѧ́ющыѧсѧ, є҆́же всели́тисѧ.

²⁰Гд҇ь бг҃ъ блг҇ве́нъ, блг҇ве́нъ гд҇ь де́нь днѐ: поспѣши́тъ на́мъ бг҃ъ сп҇нїй на́шихъ.

²¹Бг҃ъ на́шъ бг҃ъ є҆́же сп҃са́ти: и҆ гд҇нѧ, гд҇нѧ и҆схѡ́дища смє́ртнаѧ.

²²Ѻ҆ба́че бг҃ъ сокрѹши́тъ главы҄ врагѡ́въ свои́хъ, ве́рхъ вла҄съ преходѧ́щихъ въ прегрѣше́нїихъ свои́хъ.

²³Речѐ гд҇ь: ѿ васа́на ѡ҆бращѹ̀, ѡ҆бращѹ̀ во глѹбина́хъ морски́хъ:

²⁴ѩ҆́кѡ да ѡ҆мо́читсѧ нога̀ твоѧ̀ въ кро́ви, ѧ҆зы́къ пє́съ твои́хъ ѿ вра҄гъ ѿ негѡ̀.

²⁵Ви҄дѣна бы́ша шє́ствїѧ твоѧ҄, бж҃е, шє́ствїѧ бг҃а моегѡ̀ цр҃ѧ̀, и҆́же во ст҃ѣ́мъ.

²⁶Предвари́ша кнѧ҄зи бли́з̾ пою́щихъ, посредѣ̀ дѣ́въ тѷмпа́нницъ.

²⁷Въ цр҃квахъ благослови́те бг҃а, гд҇а ѿ и҆стѡ́чникъ ї҆и҃левыхъ.

²⁸Та́мѡ венїамі́нъ ю҆нѣ́йшїй во ѹ҆́жасѣ, кнѧ҄зи ї҆ѹ́довы влады́ки и҆́хъ, кнѧ҄зи завѹлѡ҄ни, кнѧ́зи нефѳалї҄мли.

²⁹Заповѣ́ждь, бж҃е, си́лою твое́ю: ѹ҆крѣпѝ, бж҃е, сїѐ, є҆́же содѣ́лалъ є҆сѝ въ на́съ.

³⁰Ѿ хра́ма твоегѡ̀ во ї҆ер҇ли́мъ тебѣ̀ принесѹ́тъ ца́рїе да́ры.

³¹Запретѝ ѕвѣрє́мъ трѡ́стнымъ: со́нмъ ю҆нє́цъ въ ю҆́ницахъ людски́хъ, є҆́же затвори́ти и҆скѹшє́нныѧ сребро́мъ: расточѝ ѩ҆зы́ки хотѧ́щыѧ бра́немъ.

³²Прїи́дѹтъ моли҄твенницы ѿ є҆гѵ́пта: є҆ѳїо́пїа предвари́тъ рѹ́кѹ свою̀ къ бг҃ѹ.

³³Ца҄рства земна҄ѧ, по́йте бг҃ѹ, воспо́йте гд҇еви,

³⁴возше́дшемѹ на нб҃о нб҃сѐ на восто́ки: сѐ, да́стъ гла́сѹ своемѹ̀ гла́съ си́лы.

³⁵Дади́те сла́вѹ бг҃ови: на ї҆и҃ли велелѣ́пота є҆гѡ̀, и҆ си́ла є҆гѡ̀ на ѡ҆́блацѣхъ.

³⁶Ди́венъ бг҃ъ во ст҃ы́хъ свои́хъ: бг҃ъ ї҆и҃левъ, то́й да́стъ си́лѹ и҆ держа́вѹ лю́демъ свои҄мъ. Блг҇ве́нъ бг҃ъ.