Read Библия Церковнославянская Ѱалти́рь 70 Bible Online

Ѱалти́рь 70 - Библия Церковнославянская bible

Ѱалти́рь 70

¹ На тѧ̀, гд҇и, ѹ҆пова́хъ, да не постыжѹ́сѧ въ вѣ́къ.

²Пра́вдою твое́ю и҆зба́ви мѧ̀ и҆ и҆зми́ мѧ: приклонѝ ко мнѣ̀ ѹ҆́хо твоѐ и҆ сп҃си́ мѧ.

³Бѹ́ди мѝ въ бг҃а защи́тителѧ и҆ въ мѣ́сто крѣ́пко сп҇ти́ мѧ: ѩ҆́кѡ ѹ҆твержде́нїе моѐ и҆ прибѣ́жище моѐ є҆сѝ ты̀.

⁴Бж҃е мо́й, и҆зба́ви мѧ̀ и҆з̾ рѹкѝ грѣ́шнагѡ, и҆з̾ рѹкѝ законопрестѹ́пнагѡ и҆ ѡ҆би́дѧщагѡ:

⁵ѩ҆́кѡ ты̀ є҆сѝ терпѣ́нїе моѐ, гд҇и, гд҇и, ѹ҆пова́нїе моѐ ѿ ю҆́ности моеѧ̀.

⁶Въ тебѣ̀ ѹ҆тверди́хсѧ ѿ ѹ҆тро́бы, ѿ чре́ва ма́тере моеѧ̀ ты̀ є҆сѝ мо́й покрови́тель: ѡ҆ тебѣ̀ пѣ́нїе моѐ вы́нѹ.

⁷ѩ҆́кѡ чѹ́до бы́хъ мнѡ́гимъ: и҆ ты̀ помо́щникъ мо́й крѣ́покъ.

⁸Да и҆спо́лнѧтсѧ ѹ҆ста̀ моѧ҄ хвале́нїѧ, ѩ҆́кѡ да воспою̀ сла́вѹ твою̀, ве́сь де́нь великолѣ́пїе твоѐ.

⁹Не ѿве́ржи менє̀ во вре́мѧ ста́рости: внегда̀ ѡ҆скѹдѣва́ти крѣ́пости мое́й, не ѡ҆ста́ви менє̀.

¹⁰ѩ҆́кѡ рѣ́ша вразѝ моѝ мнѣ̀, и҆ стргѹ́щїи дѹ́шѹ мою̀ совѣща́ша вкѹ́пѣ,

¹¹глаго́люще: бг҃ъ ѡ҆ста́вилъ є҆́сть є҆го̀, пожени́те и҆ и҆ми́те є҆го̀, ѩ҆́кѡ нѣ́сть и҆збавлѧ́ѧй.

¹²Бж҃е мо́й, не ѹ҆дали́сѧ ѿ менє̀: бж҃е мо́й, въ по́мощь мою̀ вонмѝ.

¹³Да постыдѧ́тсѧ и҆ и҆зче́знѹтъ ѡ҆клевета́ющїи дѹ́шѹ мою̀, да ѡ҆блекѹ́тсѧ въ стѹ́дъ и҆ сра́мъ и҆́щѹщїи ѕла҄ѧ мнѣ̀.

¹⁴А҆́зъ же всегда̀ воз̾ѹпова́ю на тѧ̀, и҆ приложѹ̀ на всѧ́кѹ похвалѹ̀ твою̀.

¹⁵Ѹ҆ста̀ моѧ҄ возвѣстѧ́тъ пра́вдѹ твою̀, ве́сь де́нь сп҇нїе твоѐ, ѩ҆́кѡ не позна́хъ кни҄жнаѧ.

¹⁶Вни́дѹ въ си́лѣ гд҇ни: гд҇и, помѧнѹ̀ пра́вдѹ тебє̀ є҆ди́нагѡ.

¹⁷Бж҃е мо́й, и҆̀мже наѹчи́лъ мѧ̀ є҆сѝ ѿ ю҆́ности моеѧ̀, и҆ донн҃ѣ возвѣщѹ̀ чѹдеса̀ твоѧ҄.

¹⁸И҆ да́же до ста́рости и҆ престарѣ́нїѧ, бж҃е мо́й, не ѡ҆ста́ви менє̀, до́ндеже возвѣщѹ̀ мы́шцѹ твою̀ ро́дѹ всемѹ̀ грѧдѹ́щемѹ,

¹⁹си́лѹ твою̀ и҆ пра́вдѹ твою̀, бж҃е, да́же до вы́шнихъ, ѩ҆̀же сотвори́лъ мѝ є҆сѝ вели҄чїѧ: бж҃е, кто̀ подо́бенъ тебѣ̀;

²⁰Є҆ли҄ки ѩ҆ви́лъ мѝ є҆сѝ скѡ́рби мнѡ́ги и҆ ѕлы̀; и҆ ѡ҆бра́щьсѧ ѡ҆животвори́лъ мѧ̀ є҆сѝ и҆ ѿ бе́зднъ землѝ возве́лъ мѧ̀ є҆сѝ.

²¹Ѹ҆мно́жилъ є҆сѝ на мнѣ̀ вели́чествїе твоѐ, и҆ ѡ҆бра́щьсѧ ѹ҆тѣ́шилъ мѧ̀ є҆сѝ, и҆ ѿ бе́зднъ землѝ па́ки возве́лъ мѧ̀ є҆сѝ.

²²И҆́бо а҆́зъ и҆сповѣ́мсѧ тебѣ̀ въ лю́дехъ, гд҇и, въ сосѹ́дѣхъ ѱало́мскихъ и҆́стинѹ твою̀, бж҃е: воспою̀ тебѣ̀ въ гѹ́слехъ, ст҃ы́й ї҆и҃левъ.

²³Возра́дѹетѣсѧ ѹ҆стнѣ̀ моѝ, є҆гда̀ воспою̀ тебѣ̀, и҆ дѹша̀ моѧ̀, ю҆́же є҆сѝ и҆зба́вилъ:

²⁴є҆ще́ же и҆ ѧ҆зы́къ мо́й ве́сь де́нь поѹчи́тсѧ пра́вдѣ твое́й, є҆гда̀ постыдѧ́тсѧ и҆ посра́мѧтсѧ и҆́щѹщїй ѕла҄ѧ мнѣ̀.