Read Библия Церковнославянская Ѱалти́рь 71 Bible Online

Ѱалти́рь 71 - Библия Церковнославянская bible

Ѱалти́рь 71

¹ Бж҃е, сѹ́дъ тво́й царе́ви да́ждь, и҆ пра́вдѹ твою̀ сы́нѹ царе́вѹ:

²сѹди́ти лю́демъ твои҄мъ въ пра́вдѣ и҆ ни́щымъ твои҄мъ въ сѹдѣ̀.

³Да воспрїи́мѹтъ го́ры ми́ръ лю́демъ и҆ хо́лми пра́вдѹ.

⁴Сѹ́дитъ ни́щымъ людски҄мъ, и҆ спасе́тъ сы́ны ѹ҆бо́гихъ, и҆ смири́тъ клеветника̀.

⁵И҆ пребѹ́детъ съ со́лнцемъ, и҆ пре́жде лѹны̀ ро́да родѡ́въ.

⁶Сни́детъ ѩ҆́кѡ до́ждь на рѹно̀, и҆ ѩ҆́кѡ ка́плѧ ка́плющаѧ на зе́млю.

⁷Возсїѧ́етъ во дне́хъ є҆гѡ̀ пра́вда и҆ мно́жество ми́ра, до́ндеже ѿи́метсѧ лѹна̀.

⁸И҆ ѡ҆блада́етъ ѿ мо́рѧ до мо́рѧ, и҆ ѿ рѣ́къ до конє́цъ вселе́нныѧ.

⁹Пред̾ ни́мъ припадѹ́тъ є҆ѳїо́плѧне, и҆ вразѝ є҆гѡ̀ пе́рсть поли́жѹтъ.

¹⁰Ца́рїе ѳарсі́йстїи и҆ ѻ҆́строви да́ры принесѹ́тъ, ца́рїе а҆ра́встїи и҆ сава̀ да́ры приведѹ́тъ:

¹¹и҆ покло́нѧтсѧ є҆мѹ̀ всѝ ца́рїе зе́мстїи, всѝ ѩ҆зы́цы порабо́таютъ є҆мѹ̀.

¹²ѩ҆́кѡ и҆зба́ви ни́ща ѿ си́льна, и҆ ѹ҆бо́га, є҆мѹ́же не бѣ̀ помо́щника.

¹³Пощади́тъ ни́ща и҆ ѹ҆бо́га, и҆ дѹ́шы ѹ҆бо́гихъ спасе́тъ:

¹⁴ѿ ли́хвы и҆ ѿ непра́вды и҆зба́витъ дѹ́шы и҆́хъ, и҆ че́стно и҆́мѧ є҆гѡ̀ пред̾ ни́ми.

¹⁵И҆ жи́въ бѹ́детъ, и҆ да́стсѧ є҆мѹ̀ ѿ зла́та а҆раві́йска: и҆ помо́лѧтсѧ ѡ҆ не́мъ вы́нѹ, ве́сь де́нь благословѧ́тъ є҆го̀.

¹⁶Бѹ́детъ ѹ҆твержде́нїе на землѝ на версѣ́хъ го́ръ: превознесе́тсѧ па́че лїва́на пло́дъ є҆гѡ̀, и҆ процвѣтѹ́тъ ѿ гра́да ѩ҆́кѡ трава̀ земна́ѧ.

¹⁷Бѹ́детъ и҆́мѧ є҆гѡ̀ благослове́но во вѣ́ки, пре́жде со́лнца пребыва́етъ и҆́мѧ є҆гѡ̀: и҆ благословѧ́тсѧ въ не́мъ всѧ҄ кѡлѣ́на земна́ѧ, всѝ ѩ҆зы́цы ѹ҆блажа́тъ є҆го̀.

¹⁸Блг҇ве́нъ гд҇ь бг҃ъ ї҆и҃левъ, творѧ́й чѹдеса̀ є҆ди́нъ,

¹⁹и҆ блг҇ве́но и҆́мѧ сла́вы є҆гѡ̀ во вѣ́къ и҆ въ вѣ́къ вѣ́ка: и҆ и҆спо́лнитсѧ сла́вы є҆гѡ̀ всѧ̀ землѧ̀: бѹ́ди, бѹ́ди.