Read Библия Церковнославянская Ѱалти́рь 74 Bible Online

Ѱалти́рь 74 - Библия Церковнославянская bible

Ѱалти́рь 74

¹Въ коне́цъ, да не растли́ши, ѱало́мъ пѣ́сни а҆са́фѹ,

²И҆сповѣ́мысѧ тебѣ̀, бж҃е, и҆сповѣ́мысѧ тебѣ̀ и҆ призове́мъ и҆́мѧ твоѐ: повѣ́мъ всѧ҄ чѹдеса̀ твоѧ҄.

³Є҆гда̀ прїимѹ̀ вре́мѧ, а҆́зъ правѡты̀ возсѹждѹ̀.

⁴Раста́ѧсѧ землѧ̀ и҆ всѝ живѹ́щїи на не́й, а҆́зъ ѹ҆тверди́хъ столпы̀ є҆ѧ̀.

⁵Рѣ́хъ беззако́ннѹющымъ, не беззако́ннѹйте: и҆ согрѣша́ющымъ, не возноси́те ро́га.

⁶Не воздвиза́йте на высотѹ̀ ро́га ва́шегѡ и҆ не глаго́лите на бг҃а непра́вдѹ:

⁷ѩ҆́кѡ нижѐ ѿ и҆схѡ́дъ, нижѐ и҆ за҄падъ, нижѐ ѿ пѹсты́хъ го́ръ.

⁸ѩ҆́кѡ бг҃ъ сѹдїѧ̀ є҆́сть: сего̀ смирѧ́етъ, и҆ сего̀ возно́ситъ.

⁹ѩ҆́кѡ ча́ша въ рѹцѣ̀ гд҇ни, вїна̀ нерастворе́на и҆спо́лнь растворе́нїѧ, и҆ ѹ҆клонѝ ѿ сеѧ̀ въ сїю̀: ѻ҆ба́че дро́ждїе є҆гѡ̀ не и҆стощи́сѧ, и҆спїю́тъ всѝ грѣ́шнїи землѝ.

¹⁰А҆́зъ же возра́дѹюсѧ въ вѣ́къ, воспою̀ бг҃ѹ ї҆а́кѡвлю:

¹¹и҆ всѧ҄ ро́ги грѣ́шныхъ сломлю̀, и҆ вознесе́тсѧ ро́гъ првднагѡ.