Read Библия Церковнославянская Ѱалти́рь 77 Bible Online

Ѱалти́рь 77 - Библия Церковнославянская bible

Ѱалти́рь 77

¹ Внемли́те, лю́дїе моѝ, зако́нѹ моемѹ̀, приклони́те ѹ҆́хо ва́ше во глаго́лы ѹ҆́стъ мои́хъ.

²Ѿве́рзѹ въ при́тчахъ ѹ҆ста̀ моѧ҄, провѣща́ю гана҄нїѧ и҆спе́рва.

³Є҆ли҄ка слы́шахомъ и҆ позна́хомъ ѧ҆̀, и҆ ѻ҆тцы̀ на́ши повѣ́даша на́мъ:

⁴не ѹ҆таи́шасѧ ѿ ча҄дъ и҆́хъ въ ро́дъ и҆́нъ, возвѣща́юще хвалы҄ гд҇ни, и҆ си҄лы є҆гѡ̀ и҆ чѹдеса̀ є҆гѡ̀, ѩ҆̀же сотворѝ.

⁵И҆ воздви́же свидѣ́нїе во ї҆а́кѡвѣ, и҆ зако́нъ положѝ во ї҆и҃ли, є҆ли҄ка заповѣ́да ѻ҆тцє́мъ на́шымъ сказа́ти ѧ҆̀ сыновѡ́мъ свои҄мъ,

⁶ѩ҆́кѡ да позна́етъ ро́дъ и҆́нъ, сы́нове родѧ́щїисѧ, и҆ воста́нѹтъ и҆ повѣ́дѧтъ ѧ҆̀ сыновѡ́мъ свои҄мъ:

⁷да положа́тъ на бг҃а ѹ҆пова́нїе своѐ, и҆ не забѹ́дѹтъ дѣ́лъ бж҃їихъ, и҆ за́пѡвѣди є҆гѡ̀ взы́щѹтъ:

⁸да не бѹ́дѹтъ ѩ҆́коже ѻ҆тцы̀ и҆́хъ, ро́дъ стропти́въ и҆ преѡгорчева́ѧй, ро́дъ и҆́же не и҆спра́ви се́рдца своегѡ̀ и҆ не ѹ҆вѣ́ри съ бг҃омъ дѹ́ха своегѡ̀.

⁹Сы́нове є҆фрє́мли налѧца́юще и҆ стрѣлѧ́юще лѹ́ки возврати́шасѧ въ де́нь бра́ни:

¹⁰не сохрани́ша завѣ́та бж҃їѧ, и҆ въ зако́нѣ є҆гѡ̀ не восхотѣ́ша ходи́ти.

¹¹И҆ забы́ша бл҃годѣѧ҄нїѧ є҆гѡ̀ и҆ чѹдеса̀ є҆гѡ̀, ѩ҆̀же показа̀ и҆̀мъ

¹²пред̾ ѻ҆тцы҄ и҆́хъ, ѩ҆̀же сотворѝ чѹдеса̀ въ землѝ є҆гѵ́петстѣй, на по́ли танеѡ́сѣ:

¹³разве́рзе мо́ре и҆ проведѐ и҆̀хъ: предста́ви во́ды ѩ҆́кѡ мѣ́хъ,

¹⁴и҆ наста́ви ѧ҆̀ ѡ҆́блакомъ во днѝ и҆ всю̀ но́щь просвѣще́нїемъ ѻ҆гнѧ̀.

¹⁵Разве́рзе ка́мень въ пѹсты́ни и҆ напоѝ ѧ҆̀ ѩ҆́кѡ въ бе́зднѣ мно́зѣ:

¹⁶и҆ и҆зведѐ во́дѹ и҆з̾ ка́мене и҆ низведѐ ѩ҆́кѡ рѣ́ки во́ды.

¹⁷И҆ приложи́ша є҆щѐ согрѣша́ти є҆мѹ̀, преѡгорчи́ша вы́шнѧго въ безво́днѣй:

¹⁸и҆ и҆скѹси́ша бг҃а въ сердца́хъ свои́хъ, воспроси́ти бра҄шна дѹша́мъ свои҄мъ.

¹⁹И҆ клевета́ша на бг҃а и҆ рѣ́ша: є҆да̀ возмо́жетъ бг҃ъ ѹ҆гото́вати трапе́зѹ въ пѹсты́ни;

²⁰Поне́же поразѝ ка́мень, и҆ потеко́ша во́ды, и҆ пото́цы наводни́шасѧ: є҆да̀ и҆ хлѣ́бъ мо́жетъ да́ти; и҆лѝ ѹ҆гото́вати трапе́зѹ лю́демъ свои҄мъ;

²¹Сегѡ̀ ра́ди слы́ша гд҇ь и҆ презрѣ̀, и҆ ѻ҆́гнь возгорѣ́сѧ во ї҆а́кѡвѣ, и҆ гнѣ́въ взы́де на ї҆и҃лѧ:

²²ѩ҆́кѡ не вѣ́роваша бг҃ови, нижѐ ѹ҆пова́ша на сп҇нїе є҆гѡ̀.

²³И҆ заповѣ́да ѡ҆блакѡ́мъ свы́ше, и҆ двє́ри небесѐ ѿве́рзе:

²⁴и҆ ѡ҆дождѝ и҆̀мъ ма́ннѹ ѩ҆́сти, и҆ хлѣ́бъ небе́сный дадѐ и҆̀мъ.

²⁵Хлѣ́бъ а҆́гг҃лскїй ѩ҆дѐ человѣ́къ: бра́шно посла̀ и҆̀мъ до сы́тости.

²⁶Воздви́же ю҆́гъ съ небесѐ, и҆ наведѐ си́лою свое́ю лі́ва:

²⁷и҆ ѡ҆дождѝ на нѧ̀ ѩ҆́кѡ пра́хъ плѡ́ти, и҆ ѩ҆́кѡ песо́къ морскі́й пти҄цы перна҄ты.

²⁸И҆ нападо́ша посредѣ̀ ста́на и҆́хъ, ѡ҆́крестъ жили́щъ и҆́хъ.

²⁹И҆ ѩ҆до́ша и҆ насы́тишасѧ ѕѣлѡ̀, и҆ жела́нїе и҆́хъ пренесѐ и҆̀мъ.

³⁰Не лиши́шасѧ ѿ жела́нїѧ своегѡ̀: є҆щѐ бра́шнѹ сѹ́щѹ во ѹ҆стѣ́хъ и҆́хъ,

³¹и҆ гнѣ́въ бж҃їй взы́де на нѧ̀, и҆ ѹ҆бѝ мнѡ́жайшаѧ и҆́хъ, и҆ и҆збра҄ннымъ ї҆и҃лєвымъ запѧ́тъ.

³²Во всѣ́хъ си́хъ согрѣши́ша є҆щѐ и҆ не вѣ́роваша чѹдесє́мъ є҆гѡ̀:

³³и҆ и҆зчезо́ша въ сѹетѣ̀ дні́е и҆́хъ, и҆ лѣ҄та и҆́хъ со тща́нїемъ.

³⁴Є҆гда̀ ѹ҆бива́ше ѧ҆̀, тогда̀ взыска́хѹ є҆го̀ и҆ ѡ҆браща́хѹсѧ и҆ ѹ҆́треневахѹ къ бг҃ѹ:

³⁵и҆ помѧнѹ́ша, ѩ҆́кѡ бг҃ъ помо́щникъ и҆̀мъ є҆́сть, и҆ бг҃ъ вы́шнїй и҆зба́витель и҆̀мъ є҆́сть:

³⁶и҆ возлюби́ша є҆го̀ ѹ҆сты҄ свои́ми, и҆ ѧ҆зы́комъ свои́мъ солга́ша є҆мѹ̀:

³⁷се́рдце же и҆́хъ не бѣ̀ пра́во съ ни́мъ, нижѐ ѹ҆вѣ́ришасѧ въ завѣ́тѣ є҆гѡ̀.

³⁸То́й же є҆́сть ще́дръ, и҆ ѡ҆ч҇титъ грѣхѝ и҆́хъ, и҆ не растли́тъ: и҆ ѹ҆мно́житъ ѿврати́ти ѩ҆́рость свою̀, и҆ не разжже́тъ всегѡ̀ гнѣ́ва своегѡ̀.

³⁹И҆ помѧнѹ̀, ѩ҆́кѡ пло́ть сѹ́ть, дѹ́хъ ходѧ́й и҆ не ѡ҆браща́ѧйсѧ:

⁴⁰колькра́ты преѡгорчи́ша є҆го̀ въ пѹсты́ни, прогнѣ́ваша є҆го̀ въ землѝ безво́днѣй;

⁴¹и҆ ѡ҆брати́шасѧ, и҆ и҆скѹси́ша бг҃а, и҆ ст҃а́го ї҆и҃лева раздражи́ша:

⁴²и҆ не помѧнѹ́ша рѹкѝ є҆гѡ̀ въ де́нь, въ ѻ҆́ньже и҆зба́ви ѧ҆̀ и҆з̾ рѹкѝ ѡ҆скорблѧ́ющагѡ:

⁴³ѩ҆́коже положѝ во є҆гѵ́птѣ зна́мєнїѧ своѧ҄, и҆ чѹдеса̀ своѧ҄ на по́ли танеѡ́сѣ:

⁴⁴и҆ преложѝ въ кро́вь рѣ́ки и҆́хъ и҆ и҆сто́чники и҆́хъ, ѩ҆́кѡ да не пїю́тъ.

⁴⁵Посла̀ на нѧ̀ пє́сїѧ мѹ҄хи, и҆ поѧдо́ша ѧ҆̀, и҆ жа҄бы, и҆ растлѝ ѧ҆̀:

⁴⁶и҆ дадѐ ржѣ̀ плоды̀ и҆́хъ, и҆ трѹды̀ и҆́хъ прѹгѡ́мъ.

⁴⁷Ѹ҆бѝ гра́домъ вїногра́ды и҆́хъ и҆ черни́чїе и҆́хъ сла́ною:

⁴⁸и҆ предадѐ гра́дѹ скоты̀ и҆́хъ, и҆ и҆мѣ́нїе и҆́хъ ѻ҆гню̀.

⁴⁹Посла̀ на нѧ̀ гнѣ́въ ѩ҆́рости своеѧ̀, ѩ҆́рость и҆ гнѣ́въ и҆ ско́рбь, посла́нїе а҆́ггєлы лю́тыми.

⁵⁰Пѹтесотворѝ стезю̀ гнѣ́вѹ своемѹ̀, и҆ не пощадѣ̀ ѿ сме́рти дѹ́шъ и҆́хъ, и҆ скоты̀ и҆́хъ въ сме́рти заключѝ:

⁵¹и҆ поразѝ всѧ́кое перворо́дное въ землѝ є҆гѵ́петстѣй, нача́токъ всѧ́кагѡ трѹда̀ и҆́хъ въ селе́нїихъ ха́мовыхъ.

⁵²И҆ воздви́же ѩ҆́кѡ ѻ҆́вцы лю́ди своѧ҄, и҆ возведѐ ѧ҆̀ ѩ҆́кѡ ста́до въ пѹсты́ни:

⁵³и҆ наста́ви ѧ҆̀ на ѹ҆пова́нїе, и҆ не ѹ҆боѧ́шасѧ: и҆ врагѝ и҆́хъ покры̀ мо́ре.

⁵⁴И҆ введѐ ѧ҆̀ въ го́рѹ ст҃ы́ни своеѧ̀, го́рѹ сїю̀, ю҆́же стѧжа̀ десни́ца є҆гѡ̀.

⁵⁵И҆ и҆згна̀ ѿ лица̀ и҆́хъ ѩ҆зы́ки, и҆ по жре́бїю дадѐ и҆̀мъ (зе́млю) ѹ҆́жемъ жребодаѧ́нїѧ, и҆ вселѝ въ селе́нїихъ и҆́хъ кѡлѣ́на ї҆и҃лєва.

⁵⁶И҆ и҆скѹси́ша и҆ преѡгорчи́ша бг҃а вы́шнѧго, и҆ свидѣ́нїй є҆гѡ̀ не сохрани́ша:

⁵⁷и҆ ѿврати́шасѧ и҆ ѿверго́шасѧ, ѩ҆́коже и҆ ѻ҆тцы̀ и҆́хъ: преврати́шасѧ въ лѹ́къ развраще́нъ:

⁵⁸и҆ прогнѣ́ваша є҆го̀ въ хо́лмѣхъ свои́хъ, и҆ во и҆стѹка́нныхъ свои́хъ раздражи́ша є҆го̀.

⁵⁹Слы́ша бг҃ъ и҆ презрѣ̀, и҆ ѹ҆ничижѝ ѕѣлѡ̀ ї҆и҃лѧ:

⁶⁰и҆ ѿри́нѹ ски́нїю силѡ́мскѹю, селе́нїе є҆́же {селе́нїе своѐ, и҆дѣ́же} всели́сѧ въ человѣ́цѣхъ:

⁶¹и҆ предадѐ въ плѣ́нъ крѣ́пость и҆́хъ, и҆ добро́тѹ и҆́хъ въ рѹ́ки врагѡ́въ:

⁶²и҆ затворѝ во ѻ҆рѹ́жїи лю́ди своѧ҄ и҆ достоѧ́нїе своѐ презрѣ̀.

⁶³Ю҆́ношы и҆́хъ поѧдѐ ѻ҆́гнь, и҆ дѣ҄вы и҆́хъ не ѡ҆сѣ́тѡваны бы́ша:

⁶⁴свѧще́нницы и҆́хъ мече́мъ падо́ша, и҆ вдови́цы и҆́хъ не ѡ҆пла҄каны бѹ́дѹтъ.

⁶⁵И҆ воста̀ ѩ҆́кѡ спѧ̀ гд҇ь, ѩ҆́кѡ си́ленъ и҆ шѹ́менъ ѿ вїна̀:

⁶⁶и҆ поразѝ врагѝ своѧ҄ вспѧ́ть, поноше́нїе вѣ́чное дадѐ и҆̀мъ:

⁶⁷и҆ ѿри́нѹ селе́нїе ї҆ѡ́сифово, и҆ колѣ́но є҆фре́мово не и҆збра̀:

⁶⁸и҆ и҆збра̀ колѣ́но ї҆ѹ́дово, го́рѹ сїѡ́ню, ю҆́же возлюбѝ:

⁶⁹и҆ созда̀ ѩ҆́кѡ є҆диноро́га ст҃и́лище своѐ: на землѝ ѡ҆снова̀ и҆̀ въ вѣ́къ.

⁷⁰И҆ и҆збра̀ дв҃да раба̀ своего̀, и҆ воспрїѧ́тъ є҆го̀ ѿ ста́дъ ѻ҆́вчихъ:

⁷¹ѿ дои́лицъ поѧ́тъ є҆го̀, пастѝ ї҆а́кѡва раба̀ своего̀, и҆ ї҆и҃лѧ достоѧ́нїе своѐ.

⁷²И҆ ѹ҆пасѐ ѧ҆̀ въ неѕло́бїи се́рдца своегѡ̀, и҆ въ ра́зѹмѣхъ рѹкѹ̀ своє́ю наста́вилъ ѧ҆̀ є҆́сть.