Read Библия Церковнославянская Ѱалти́рь 78 Bible Online

Ѱалти́рь 78 - Библия Церковнославянская bible

Ѱалти́рь 78

¹ Бж҃е, прїидо́ша ѩ҆зы́цы въ достоѧ́нїе твоѐ, ѡ҆скверни́ша хра́мъ ст҃ы́й тво́й,

²положи́ша ї҆ер҇ли́мъ ѩ҆́кѡ ѻ҆во́щное храни́лище: положи́ша трѹ҄пїѧ ра҄бъ твои́хъ бра́шно пти́цамъ небє́снымъ, плѡ́ти прпдбныхъ твои́хъ ѕвѣрє́мъ земны́мъ:

³пролїѧ́ша кро́вь и҆́хъ ѩ҆́кѡ во́дѹ ѡ҆́крестъ ї҆ер҇ли́ма, и҆ не бѣ̀ погреба́ѧй.

⁴Бы́хомъ поноше́нїе сосѣ́дѡмъ на́шымъ, подражне́нїе и҆ порѹга́нїе сѹ́щымъ ѡ҆́крестъ на́съ.

⁵Доко́лѣ, гд҇и, прогнѣ́ваешисѧ до конца̀; разжже́тсѧ ѩ҆́кѡ ѻ҆́гнь рве́нїе твоѐ;

⁶Пролі́й гнѣ́въ тво́й на ѩ҆зы́ки незна́ющыѧ тебє̀, и҆ на ца҄рствїѧ, ѩ҆̀же и҆́мене твоегѡ̀ не призва́ша:

⁷ѩ҆́кѡ поѧдо́ша ї҆а́кѡва, и҆ мѣ́сто є҆гѡ̀ ѡ҆пѹстоши́ша.

⁸Не помѧнѝ на́шихъ беззако́нїй пе́рвыхъ: ско́рѡ да предварѧ́тъ ны̀ щедрѡ́ты твоѧ҄, гд҇и, ѩ҆́кѡ ѡ҆бнища́хомъ ѕѣлѡ̀.

⁹Помозѝ на́мъ, бж҃е, сп҃си́телю на́шъ, сла́вы ра́ди и҆́мене твоегѡ̀: гд҇и, и҆зба́ви ны̀ и҆ ѡ҆ч҇ти грѣхѝ на́шѧ и҆́мене ра́ди твоегѡ̀.

¹⁰Да не когда̀ рекѹ́тъ ѩ҆зы́цы: гдѣ̀ є҆́сть бг҃ъ и҆́хъ; и҆ да ѹ҆вѣ́стсѧ во ѩ҆зы́цѣхъ пред̾ ѻ҆чи́ма на́шима ѿмще́нїе кро́ве ра҄бъ твои́хъ пролиты́ѧ.

¹¹Да вни́детъ пред̾ тѧ̀ воздыха́нїе ѡ҆кова́нныхъ: по вели́чїю мы́шцы твоеѧ̀ снабдѝ сы́ны ѹ҆мерщвле́нныхъ.

¹²Возда́ждь сосѣ́дѡмъ на́шымъ седмери́цею въ нѣ́дро и҆́хъ поноше́нїе и҆́хъ, и҆́мже поноси́ша тѧ̀, гд҇и.

¹³Мы́ же лю́дїе твоѝ и҆ ѻ҆́вцы па́жити твоеѧ̀ и҆сповѣ́мысѧ тебѣ̀, бж҃е, во вѣ́къ, въ ро́дъ и҆ ро́дъ возвѣсти́мъ хвалѹ̀ твою̀.