Read Библия Церковнославянская Ѱалти́рь 8 Bible Online

Ѱалти́рь 8 - Библия Церковнославянская bible

Ѱалти́рь 8

¹Въ коне́цъ, ѡ҆ точи́лѣхъ, ѱало́мъ дв҃дѹ,

²Гд҇и гд҇ь на́шъ, ѩ҆́кѡ чѹ́дно и҆́мѧ твоѐ по все́й землѝ, ѩ҆́кѡ взѧ́тсѧ великолѣ́пїе твоѐ превы́ше нб҃съ.

³И҆з̾ ѹ҆́стъ младе́нєцъ и҆ ссѹ́щихъ соверши́лъ є҆сѝ хвалѹ̀, вра҄гъ твои́хъ ра́ди, є҆́же разрѹши́ти врага̀ и҆ ме́стника.

⁴ѩ҆́кѡ ѹ҆зрю̀ небеса̀, дѣла̀ пє́рстъ твои́хъ, лѹнѹ̀ и҆ ѕвѣ́зды, ѩ҆̀же ты̀ ѡ҆снова́лъ є҆сѝ:

⁵что̀ є҆́сть человѣ́къ, ѩ҆́кѡ по́мниши є҆го̀; и҆лѝ сы́нъ человѣ́чь, ѩ҆́кѡ посѣща́еши є҆го̀;

⁶Ѹ҆ма́лилъ є҆сѝ є҆го̀ ма́лымъ чи́мъ ѿ а҆́гг҃лъ, сла́вою и҆ че́стїю вѣнча́лъ є҆сѝ є҆го̀:

⁷и҆ поста́вилъ є҆сѝ є҆го̀ над̾ дѣ́лы рѹкѹ̀ твоє́ю, всѧ҄ покори́лъ є҆сѝ под̾ но́зѣ є҆гѡ̀:

⁸ѻ҆́вцы и҆ волы̀ всѧ҄, є҆ще́ же и҆ скоты̀ польскї҄ѧ,

⁹пти҄цы небє́сныѧ и҆ ры҄бы морскї҄ѧ, преходѧ́щыѧ стєзѝ морскї҄ѧ.

¹⁰Гд҇и гд҇ь на́шъ, ѩ҆́кѡ чѹ́дно и҆́мѧ твоѐ по все́й землѝ.