Read Библия Церковнославянская Ѱалти́рь 80 Bible Online

Ѱалти́рь 80 - Библия Церковнославянская bible

Ѱалти́рь 80

¹Въ коне́цъ, ѡ҆ точи́лѣхъ, ѱало́мъ а҆са́фѹ,

²Ра́дѹйтесѧ бг҃ѹ помо́щникѹ на́шемѹ, воскли́кните бг҃ѹ ї҆а́кѡвлю:

³прїими́те ѱало́мъ и҆ дади́те тѷмпа́нъ, ѱалти́рь красе́нъ съ гѹ́сльми:

⁴вострѹби́те въ новом҇чїи трѹбо́ю, во бл҃гознамени́тый де́нь пра́здника ва́шегѡ:

⁵ѩ҆́кѡ повелѣ́нїе ї҆и҃леви є҆́сть, и҆ сѹдба̀ бг҃ѹ ї҆а́ковлю.

⁶Свидѣ́нїе во ї҆ѡ́сифѣ положѝ є҆̀, внегда̀ и҆зы́ти є҆мѹ̀ ѿ землѝ є҆гѵ́петскїѧ: ѧ҆зы́ка, є҆гѡ́же не вѣ́дѧше, ѹ҆слы́ша.

⁷Ѿѧ́тъ ѿ бре́мене хребе́тъ є҆гѡ̀: рѹ́цѣ є҆гѡ̀ въ кошѝ порабо́тастѣ.

⁸Въ ско́рби призва́лъ мѧ̀ є҆сѝ, и҆ и҆зба́вихъ тѧ̀: ѹ҆слы́шахъ тѧ̀ въ та́йнѣ бѹ́рнѣ: и҆скѹси́хъ тѧ̀ на водѣ̀ прерѣка́нїѧ.

⁹Слы́шите, лю́дїе моѝ, и҆ засвидѣ́телствѹю ва́мъ, ї҆и҃лю, а҆́ще послѹ́шаеши менє̀:

¹⁰не бѹ́детъ тебѣ̀ бо́гъ но́въ, нижѐ поклони́шисѧ бо́гѹ чѹжде́мѹ.

¹¹А҆́зъ бо є҆́смь гд҇ь бг҃ъ тво́й, и҆зведы́й тѧ̀ ѿ землѝ є҆гѵ́петскїѧ: разширѝ ѹ҆ста̀ твоѧ̀, и҆ и҆спо́лню ѧ҆̀.

¹²И҆ не послѹ́шаша лю́дїе моѝ гла́са моегѡ̀, и҆ ї҆и҃ль не внѧ́тъ мѝ:

¹³и҆ ѿпѹсти́хъ ѧ҆̀ по начина́нїємъ серде́цъ и҆́хъ, по́йдѹтъ въ начина́нїихъ свои́хъ.

¹⁴А҆́ще бы́ша лю́дїе моѝ послѹ́шали менє̀, ї҆и҃ль а҆́ще бы въ пѹти҄ моѧ҄ ходи́лъ:

¹⁵ни ѡ҆ чесо́мже ѹ҆́бѡ врагѝ є҆гѡ̀ смири́лъ бы́хъ, и҆ на ѡ҆скорблѧ́ющыѧ и҆̀хъ возложи́лъ бы́хъ рѹ́кѹ мою̀.

¹⁶Вразѝ гд҇ни солга́ша є҆мѹ̀, и҆ бѹ́детъ вре́мѧ и҆́хъ въ вѣ́къ:

¹⁷и҆ напита̀ и҆̀хъ ѿ тѹ́ка пшени́чна, и҆ ѿ ка́мене ме́да насы́ти и҆̀хъ.