Read Библия Церковнославянская Ѱалти́рь 82 Bible Online

Ѱалти́рь 82 - Библия Церковнославянская bible

Ѱалти́рь 82

¹Пѣ́снь ѱалма̀ а҆са́фѹ,

²Бж҃е, кто̀ ѹ҆подо́битсѧ тебѣ̀; не премолчѝ, нижѐ ѹ҆кротѝ {нижѐ ѹ҆кроти́сѧ}, бж҃е:

³ѩ҆́кѡ сѐ, вразѝ твоѝ возшѹмѣ́ша, и҆ ненави́дѧщїи тѧ̀ воздвиго́ша главѹ̀.

⁴На лю́ди твоѧ҄ лѹка́вноваша во́лею, и҆ совѣща́ша на ст҃ы҄ѧ твоѧ҄.

⁵Рѣ́ша: прїиди́те и҆ потреби́мъ ѧ҆̀ ѿ ѩ҆зы҄къ, и҆ не помѧне́тсѧ и҆́мѧ ї҆и҃лево ктомѹ̀.

⁶ѩ҆́кѡ совѣща́ша є҆диномышле́нїемъ вкѹ́пѣ, на тѧ̀ завѣ́тъ завѣща́ша:

⁷селє́нїѧ ї҆дѹмє́йска и҆ ї҆сма́илїте, мѡа́въ и҆ а҆га́рѧне,

⁸гева́лъ и҆ а҆ммѡ́нъ и҆ а҆мали́къ, и҆ноплемє́нницы съ живѹ́щими въ тѵ́рѣ:

⁹и҆́бо и҆ а҆ссѹ́ръ прїи́де съ ни́ми, бы́ша въ застѹпле́нїе сыновѡ́мъ лѡ́тѡвымъ:

¹⁰сотворѝ и҆̀мъ ѩ҆́кѡ мадїа́мѹ и҆ сїса́рѣ, ѩ҆́кѡ ї҆аві́мѹ въ пото́цѣ кі́ссовѣ:

¹¹потреби́шасѧ во а҆ендѡ́рѣ, бы́ша ѩ҆́кѡ гно́й земны́й.

¹²Положѝ кнѧ́зи и҆́хъ ѩ҆́кѡ ѡ҆ри́ва и҆ зи́ва, и҆ зеве́а и҆ салма́на, всѧ҄ кнѧ҄зи и҆́хъ,

¹³и҆́же рѣ́ша: да наслѣ́димъ себѣ̀ ст҃и́лище бж҃їе.

¹⁴Бж҃е мо́й, положѝ ѧ҆̀ ѩ҆́кѡ ко́ло, ѩ҆́кѡ тро́сть пред̾ лице́мъ вѣ́тра.

¹⁵ѩ҆́кѡ ѻ҆́гнь попалѧ́ѧй дѹбра҄вы, ѩ҆́кѡ пла́мень пожига́ѧй го́ры:

¹⁶та́кѡ пожене́ши ѧ҆̀ бѹ́рею твое́ю, и҆ гнѣ́вомъ твои́мъ смѧте́ши ѧ҆̀.

¹⁷И҆спо́лни ли́ца и҆́хъ безче́стїѧ, и҆ взы́щѹтъ и҆́мене твоегѡ̀, гд҇и.

¹⁸Да постыдѧ́тсѧ и҆ смѧтѹ́тсѧ въ вѣ́къ вѣ́ка, и҆ посра́мѧтсѧ и҆ поги́бнѹтъ.

¹⁹И҆ да позна́ютъ, ѩ҆́кѡ и҆́мѧ тебѣ̀ гд҇ь, ты̀ є҆ди́нъ вы́шнїй по все́й землѝ.