Read Библия Церковнославянская Ѱалти́рь 83 Bible Online

Ѱалти́рь 83 - Библия Церковнославянская bible

Ѱалти́рь 83

¹Въ коне́цъ, ѡ҆ точи́лѣхъ, сынѡ́мъ коре́ѡвымъ, ѱало́мъ,

²Ко́ль возлю́блєнна селє́нїѧ твоѧ҄, гд҇и си́лъ.

³Жела́етъ и҆ скончава́етсѧ дѹша̀ моѧ̀ во дворы̀ гд҇ни: се́рдце моѐ и҆ пло́ть моѧ̀ возра́довастасѧ ѡ҆ бз҃ѣ жи́вѣ.

⁴И҆́бо пти́ца ѡ҆брѣ́те себѣ̀ хра́минѹ, и҆ го́рлица гнѣздо̀ себѣ̀, и҆дѣ́же положи́тъ птенцы̀ своѧ҄, ѻ҆лтари҄ твоѧ҄, гд҇и си́лъ, цр҃ю̀ мо́й и҆ бж҃е мо́й.

⁵Бл҃же́ни живѹ́щїи въ домѹ̀ твое́мъ: въ вѣ́ки вѣкѡ́въ восхва́лѧтъ тѧ̀.

⁶Бл҃же́нъ мѹ́жъ, є҆мѹ́же є҆́сть застѹпле́нїе є҆гѡ̀ ѹ҆ тебє̀: восхождє́нїѧ въ се́рдцы свое́мъ положѝ,

⁷во ю҆до́ль плаче́внѹю, въ мѣ́сто є҆́же положѝ {во ю҆до́ли плаче́внѣй, въ мѣ́стѣ, є҆́же положѝ}: и҆́бо блг҇ве́нїе да́стъ законополага́ѧй.

⁸По́йдѹтъ ѿ си́лы въ си́лѹ: ѩ҆ви́тсѧ бг҃ъ богѡ́въ въ сїѡ́нѣ.

⁹Гд҇и бж҃е си́лъ, ѹ҆слы́ши моли́твѹ мою̀, внѹшѝ, бж҃е ї҆а́кѡвль.

¹⁰Защи́тниче на́шъ, ви́ждь, бж҃е, и҆ при́зри на лицѐ хрїста̀ твоегѡ̀.

¹¹ѩ҆́кѡ лѹ́чше де́нь є҆ди́нъ во дво́рѣхъ твои́хъ па́че ты́сѧщъ: и҆зво́лихъ примета́тисѧ въ домѹ̀ бг҃а моегѡ̀ па́че, не́же жи́ти мѝ въ селе́нїихъ грѣ́шничихъ.

¹²ѩ҆́кѡ мл҇ть и҆ и҆́стинѹ лю́битъ гд҇ь, бг҃ъ блгдть и҆ сла́вѹ да́стъ: гд҇ь не лиши́тъ бл҃ги́хъ ходѧ́щихъ неѕло́бїемъ.

¹³Гд҇и бж҃е си́лъ, бл҃же́нъ человѣ́къ ѹ҆пова́ѧй на тѧ̀.