Read Библия Церковнославянская Ѱалти́рь 84 Bible Online

Ѱалти́рь 84 - Библия Церковнославянская bible

Ѱалти́рь 84

¹Въ коне́цъ, сынѡ́мъ коре́ѡвымъ, ѱало́мъ,

²Бл҃говоли́лъ є҆сѝ, гд҇и, зе́млю твою̀, возврати́лъ є҆сѝ плѣ́нъ ї҆а́кѡвль.

³Ѡ҆ста́вилъ є҆сѝ беззакѡ́нїѧ люді́й твои́хъ, покры́лъ є҆сѝ всѧ҄ грѣхѝ и҆́хъ.

⁴Ѹ҆кроти́лъ є҆сѝ ве́сь гнѣ́въ тво́й, возврати́лсѧ є҆сѝ ѿ гнѣ́ва ѩ҆́рости твоеѧ̀.

⁵Возвратѝ на́съ, бж҃е сп҇нїй на́шихъ, и҆ ѿвратѝ ѩ҆́рость твою̀ ѿ на́съ.

⁶Є҆да̀ во вѣ́ки прогнѣ́ваешисѧ на ны̀; и҆лѝ простре́ши гнѣ́въ тво́й ѿ ро́да въ ро́дъ;

⁷Бж҃е, ты̀ ѡ҆бра́щьсѧ ѡ҆живи́ши ны̀, и҆ лю́дїе твоѝ возвеселѧ́тсѧ ѡ҆ тебѣ̀.

⁸ѩ҆вѝ на́мъ, гд҇и, мл҇ть твою̀, и҆ сп҇нїе твоѐ да́ждь на́мъ.

⁹Ѹ҆слы́шѹ, что̀ рече́тъ ѡ҆ мнѣ̀ гд҇ь бг҃ъ: ѩ҆́кѡ рече́тъ ми́ръ на лю́ди своѧ҄, и҆ на прпдбныѧ своѧ҄, и҆ на ѡ҆браща́ющыѧ сердца̀ къ немѹ̀.

¹⁰Ѻ҆ба́че бли́з̾ боѧ́щихсѧ є҆гѡ̀ сп҇нїе є҆гѡ̀, всели́ти сла́вѹ въ зе́млю на́шѹ.

¹¹Мл҇ть и҆ и҆́стина срѣто́стѣсѧ, пра́вда и҆ ми́ръ ѡ҆блобыза́стасѧ:

¹²и҆́стина ѿ землѝ возсїѧ̀, и҆ пра́вда съ нб҃сѐ прини́че:

¹³и҆́бо гд҇ь да́стъ бл҃гость, и҆ землѧ̀ на́ша да́стъ пло́дъ сво́й.

¹⁴Пра́вда пред̾ ни́мъ пред̾и́детъ, и҆ положи́тъ въ пѹ́ть стѡпы̀ своѧ҄.