Read Библия Церковнославянская Ѱалти́рь 85 Bible Online

Ѱалти́рь 85 - Библия Церковнославянская bible

Ѱалти́рь 85

¹ Приклонѝ, гд҇и, ѹ҆́хо твоѐ, и҆ ѹ҆слы́ши мѧ̀: ѩ҆́кѡ ни́щъ и҆ ѹ҆бо́гъ є҆́смь а҆́зъ.

²Сохранѝ дѹ́шѹ мою̀, ѩ҆́кѡ прпдбенъ є҆́смь: сп҃сѝ раба̀ твоего̀, бж҃е мо́й, ѹ҆пова́ющаго на тѧ̀.

³Поми́лѹй мѧ̀, гд҇и, ѩ҆́кѡ къ тебѣ̀ воззовѹ̀ ве́сь де́нь.

⁴Возвеселѝ дѹ́шѹ раба̀ твоегѡ̀: ѩ҆́кѡ къ тебѣ̀ взѧ́хъ дѹ́шѹ мою̀.

⁵ѩ҆́кѡ ты̀, гд҇и, бл҃гъ и҆ кро́токъ и҆ многомл҇тивъ всѣ҄мъ призыва́ющымъ тѧ̀.

⁶Внѹшѝ, гд҇и, моли́твѹ мою̀ и҆ вонмѝ гла́сѹ моле́нїѧ моегѡ̀.

⁷Въ де́нь ско́рби моеѧ̀ воззва́хъ къ тебѣ̀, ѩ҆́кѡ ѹ҆слы́шалъ мѧ̀ є҆сѝ.

⁸Нѣ́сть подо́бенъ тебѣ̀ въ бозѣ́хъ, гд҇и, и҆ нѣ́сть по дѣлѡ́мъ твои҄мъ.

⁹Всѝ ѩ҆зы́цы, є҆ли́ки сотвори́лъ є҆сѝ, прїи́дѹтъ и҆ покло́нѧтсѧ пред̾ тобо́ю, гд҇и, и҆ просла́вѧтъ и҆́мѧ твоѐ:

¹⁰ѩ҆́кѡ ве́лїй є҆сѝ ты̀ и҆ творѧ́й чѹдеса̀, ты̀ є҆сѝ бг҃ъ є҆ди́нъ.

¹¹Наста́ви мѧ̀, гд҇и, на пѹ́ть тво́й, и҆ пойдѹ̀ во и҆́стинѣ твое́й: да возвесели́тсѧ се́рдце моѐ боѧ́тисѧ и҆́мене твоегѡ̀.

¹²И҆сповѣ́мсѧ тебѣ̀, гд҇и бж҃е мо́й, всѣ́мъ се́рдцемъ мои́мъ и҆ просла́влю и҆́мѧ твоѐ въ вѣ́къ:

¹³ѩ҆́кѡ мл҇ть твоѧ̀ ве́лїѧ на мнѣ̀, и҆ и҆зба́вилъ є҆сѝ дѹ́шѹ мою̀ ѿ а҆́да преиспо́днѣйшагѡ.

¹⁴Бж҃е, законопрестѹ҄пницы воста́ша на мѧ̀, и҆ со́нмъ держа́вныхъ взыска́ша дѹ́шѹ мою̀, и҆ не предложи́ша тебѐ пред̾ собо́ю.

¹⁵И҆ ты̀, гд҇и бж҃е мо́й, ще́дрый и҆ мл҇тивый, долготерпѣли́вый и҆ многомл҇тивый и҆ и҆́стинный,

¹⁶при́зри на мѧ̀ и҆ поми́лѹй мѧ̀: да́ждь держа́вѹ твою̀ ѻ҆́трокѹ твоемѹ̀ и҆ сп҃сѝ сы́на рабы̀ твоеѧ̀.

¹⁷Сотворѝ со мно́ю зна́менїе во бл҃го: и҆ да ви́дѧтъ ненави́дѧщїи мѧ̀, и҆ постыдѧ́тсѧ, ѩ҆́кѡ ты̀, гд҇и, помо́глъ мѝ и҆ ѹ҆тѣ́шилъ мѧ̀ є҆сѝ.