Read Библия Церковнославянская Ѱалти́рь 87 Bible Online

Ѱалти́рь 87 - Библия Церковнославянская bible

Ѱалти́рь 87

¹Пѣ́снь ѱалма̀ сынѡ́мъ коре́ѡвымъ, въ коне́цъ, ѡ҆ маеле́ѳѣ є҆́же ѿвѣща́ти, ра́зѹма є҆ма́нѹ ї҆и҃лтѧнинѹ,

²Гд҇и бж҃е сп҇нїѧ моегѡ̀, во днѝ воззва́хъ и҆ въ нощѝ пред̾ тобо́ю:

³да вни́детъ пред̾ тѧ̀ моли́тва моѧ̀, приклонѝ ѹ҆́хо твоѐ къ моле́нїю моемѹ̀.

⁴ѩ҆́кѡ и҆спо́лнисѧ ѕѡ́лъ дѹша̀ моѧ̀, и҆ живо́тъ мо́й а҆́дѹ прибли́жисѧ.

⁵Привмѣне́нъ бы́хъ съ низходѧ́щими въ ро́въ: бы́хъ ѩ҆́кѡ человѣ́къ без̾ по́мощи,

⁶въ ме́ртвыхъ свобо́дь: ѩ҆́кѡ ѩ҆́звеннїи спѧ́щїи во гро́бѣ, и҆́хже не помѧнѹ́лъ є҆сѝ ктомѹ̀, и҆ ті́и ѿ рѹкѝ твоеѧ̀ ѿринове́ни бы́ша.

⁷Положи́ша мѧ̀ въ ро́вѣ преиспо́днѣмъ, въ те́мныхъ и҆ сѣ́ни сме́ртнѣй.

⁸На мнѣ̀ ѹ҆тверди́сѧ ѩ҆́рость твоѧ̀, и҆ всѧ҄ вѡ́лны твоѧ҄ наве́лъ є҆сѝ на мѧ̀.

⁹Ѹ҆да́лилъ є҆сѝ зна́емыхъ мои́хъ ѿ менє̀: положи́ша мѧ̀ ме́рзость себѣ̀: пре́данъ бы́хъ и҆ не и҆схожда́хъ.

¹⁰Ѻ҆́чи моѝ и҆знемого́стѣ ѿ нищеты̀: воззва́хъ къ тебѣ̀, гд҇и, ве́сь де́нь, воздѣ́хъ къ тебѣ̀ рѹ́цѣ моѝ.

¹¹Є҆да̀ ме́ртвыми твори́ши чѹдеса̀; и҆лѝ вра́чеве воскресѧ́тъ, и҆ и҆сповѣ́дѧтсѧ тебѣ̀;

¹²Є҆да̀ повѣ́сть кто̀ во гро́бѣ мл҇ть твою̀, и҆ и҆́стинѹ твою̀ въ поги́бели;

¹³Є҆да̀ позна҄на бѹ́дѹтъ во тмѣ̀ чѹдеса̀ твоѧ҄, и҆ пра́вда твоѧ̀ въ землѝ забве́ннѣй;

¹⁴И҆ а҆́зъ къ тебѣ̀, гд҇и, воззва́хъ, и҆ ѹ҆́трѡ моли́тва моѧ̀ предвари́тъ тѧ̀.

¹⁵Вскѹ́ю, гд҇и, ѿрѣ́еши дѹ́шѹ мою̀; ѿвраща́еши лицѐ твоѐ ѿ менє̀;

¹⁶Ни́щъ є҆́смь а҆́зъ, и҆ въ трѹдѣ́хъ ѿ ю҆́ности моеѧ̀: возне́сжесѧ смири́хсѧ и҆ и҆знемого́хъ.

¹⁷На мнѣ̀ преидо́ша гнѣ́ви твоѝ, ѹ҆страшє́нїѧ твоѧ҄ возмѹти́ша мѧ̀:

¹⁸ѡ҆быдо́ша мѧ̀ ѩ҆́кѡ вода̀ ве́сь де́нь, ѡ҆держа́ша мѧ̀ вкѹ́пѣ.

¹⁹Ѹ҆да́лилъ є҆сѝ ѿ менє̀ дрѹ́га и҆ и҆́скреннѧго, и҆ зна́емыхъ мои́хъ ѿ страсте́й.