Read Библия Церковнославянская Ѱалти́рь 88 Bible Online

Ѱалти́рь 88 - Библия Церковнославянская bible

Ѱалти́рь 88

¹Ра́зѹма є҆ѳа́ма ї҆и҃лтѧнина,

²Мл҇ти твоѧ҄, гд҇и, во вѣ́къ воспою̀, въ ро́дъ и҆ ро́дъ возвѣщѹ̀ и҆́стинѹ твою̀ ѹ҆сты҄ мои́ми.

³Занѐ ре́клъ є҆сѝ: въ вѣ́къ мл҇ть сози́ждетсѧ: на нб҃сѣ́хъ ѹ҆гото́витсѧ и҆́стина твоѧ̀.

⁴Завѣща́хъ завѣ́тъ и҆збра҄ннымъ мои҄мъ, клѧ́хсѧ дв҃дѹ рабѹ̀ моемѹ̀:

⁵до вѣ́ка ѹ҆гото́ваю сѣ́мѧ твоѐ, и҆ сози́ждѹ въ ро́дъ и҆ ро́дъ пр҇то́лъ тво́й.

⁶И҆сповѣ́дѧтъ нб҃са̀ чѹдеса̀ твоѧ҄, гд҇и, и҆́бо и҆́стинѹ твою̀ въ цр҃кви ст҃ы́хъ.

⁷ѩ҆́кѡ кто̀ во ѡ҆́блацѣхъ ѹ҆равни́тсѧ гд҇еви; ѹ҆подо́битсѧ гд҇еви въ сынѣ́хъ бж҃їихъ;

⁸Бг҃ъ прославлѧ́емь въ совѣ́тѣ ст҃ы́хъ, ве́лїй и҆ стра́шенъ є҆́сть над̾ всѣ́ми ѡ҆кре́стными є҆гѡ̀.

⁹Гд҇и бж҃е си́лъ, кто̀ подо́бенъ тебѣ̀; си́ленъ є҆сѝ, гд҇и, и҆ и҆́стина твоѧ̀ ѡ҆́крестъ тебє̀.

¹⁰Ты̀ влдчествѹеши держа́вою морско́ю: возмѹще́нїе же во́лнъ є҆гѡ̀ ты̀ ѹ҆кроча́еши.

¹¹Ты̀ смири́лъ, є҆сѝ, ѩ҆́кѡ ѩ҆́звена, го́рдаго: мы́шцею си́лы твоеѧ̀ расточи́лъ є҆сѝ врагѝ твоѧ҄.

¹²Твоѧ҄ сѹ́тъ небеса̀, и҆ твоѧ̀ є҆́сть землѧ̀: вселе́ннѹю и҆ и҆сполне́нїе є҆ѧ̀ ты̀ ѡ҆снова́лъ є҆сѝ.

¹³Сѣ́веръ и҆ мо́ре ты̀ созда́лъ є҆сѝ: ѳавѡ́ръ и҆ є҆рмѡ́нъ ѡ҆ и҆́мени твое́мъ возра́дѹетасѧ.

¹⁴Твоѧ̀ мы́шца съ си́лою: да ѹ҆крѣпи́тсѧ рѹка̀ твоѧ̀, и҆ вознесе́тсѧ десни́ца твоѧ̀.

¹⁵Пра́вда и҆ сѹдба̀ ѹ҆гото́ванїе пр҇то́ла твоегѡ̀: мл҇ть и҆ и҆́стина пред̾и́детѣ пред̾ лице́мъ твои́мъ.

¹⁶Бл҃же́ни лю́дїе вѣ́дѹщїи воскликнове́нїе: гд҇и, во свѣ́тѣ лица̀ твоегѡ̀ по́йдѹтъ,

¹⁷и҆ ѡ҆ и҆́мени твое́мъ возра́дѹютсѧ ве́сь де́нь, и҆ пра́вдою твое́ю вознесѹ́тсѧ.

¹⁸ѩ҆́кѡ похвала̀ си́лы и҆́хъ ты̀ є҆сѝ, и҆ во бл҃говоле́нїи твое́мъ вознесе́тсѧ ро́гъ на́шъ:

¹⁹ѩ҆́кѡ гд҇не є҆́сть застѹпле́нїе, и҆ ст҃а́гѡ ї҆и҃лева цр҃ѧ̀ на́шегѡ.

²⁰Тогда̀ гл҃алъ є҆сѝ въ видѣ́нїи сыновѡ́мъ твои҄мъ, и҆ ре́клъ є҆сѝ: положи́хъ по́мощь на си́льнаго, вознесо́хъ и҆збра́ннаго ѿ люді́й мои́хъ:

²¹ѡ҆брѣто́хъ дв҃да раба̀ моего̀, є҆ле́емъ ст҃ы́мъ мои́мъ пома́захъ є҆го̀.

²²И҆́бо рѹка̀ моѧ̀ застѹ́питъ є҆го̀, и҆ мы́шца моѧ̀ ѹ҆крѣпи́тъ є҆го̀:

²³ничто́же ѹ҆спѣ́етъ вра́гъ на него̀, и҆ сы́нъ беззако́нїѧ не приложи́тъ ѡ҆ѕло́бити є҆го̀.

²⁴И҆ ссѣкѹ̀ ѿ лица̀ є҆гѡ̀ врагѝ є҆гѡ̀, и҆ ненави́дѧщыѧ є҆го̀ побѣждѹ̀:

²⁵и҆ и҆́стина моѧ̀ и҆ мл҇ть моѧ̀ съ ни́мъ, и҆ ѡ҆ и҆́мени мое́мъ вознесе́тсѧ ро́гъ є҆гѡ̀:

²⁶и҆ положѹ̀ на мо́ри рѹ́кѹ є҆гѡ̀, и҆ на рѣка́хъ десни́цѹ є҆гѡ̀.

²⁷То́й призове́тъ мѧ̀: ѻ҆ц҃ъ мо́й є҆сѝ ты̀, бг҃ъ мо́й и҆ застѹ́пникъ сп҇нїѧ моегѡ̀.

²⁸И҆ а҆́зъ пе́рвенца положѹ̀ є҆го̀, высока̀ па́че царе́й земны́хъ:

²⁹въ вѣ́къ сохраню̀ є҆мѹ̀ мл҇ть мою̀, и҆ завѣ́тъ мо́й вѣ́ренъ є҆мѹ̀:

³⁰и҆ положѹ̀ въ вѣ́къ вѣ́ка сѣ́мѧ є҆гѡ̀, и҆ пр҇то́лъ є҆гѡ̀ ѩ҆́кѡ дні́е не́ба.

³¹А҆́ще ѡ҆ста́вѧтъ сы́нове є҆гѡ̀ зако́нъ мо́й, и҆ въ сѹдба́хъ мои́хъ не по́йдѹтъ:

³²а҆́ще ѡ҆правда҄нїѧ моѧ҄ ѡ҆сквернѧ́тъ, и҆ за́повѣдїй мои́хъ не сохранѧ́тъ:

³³посѣщѹ̀ жезло́мъ беззакѡ́нїѧ и҆́хъ, и҆ ра́нами непра҄вды и҆́хъ,

³⁴мл҇ть же мою̀ не разорю̀ ѿ ни́хъ, ни превреждѹ̀ во и҆́стинѣ мое́й:

³⁵нижѐ ѡ҆скверню̀ завѣ́та моегѡ̀, и҆ и҆сходѧ́щихъ ѿ ѹ҆́стъ мои́хъ не ѿве́ргѹсѧ.

³⁶Є҆ди́ною клѧ́хсѧ ѡ҆ ст҃ѣ́мъ мое́мъ: а҆́ще дв҃дѹ солжѹ̀;

³⁷Сѣ́мѧ є҆гѡ̀ во вѣ́къ пребѹ́детъ, и҆ престо́лъ є҆гѡ̀ ѩ҆́кѡ со́лнце предо мно́ю,

³⁸и҆ ѩ҆́кѡ лѹна̀ соверше́на въ вѣ́къ, и҆ свидѣ́тель на нб҃сѝ вѣ́ренъ.

³⁹Ты́ же ѿри́нѹлъ є҆сѝ и҆ ѹ҆ничижи́лъ, негодова́лъ є҆сѝ пома́заннаго твоего̀:

⁴⁰разори́лъ є҆сѝ завѣ́тъ раба̀ твоегѡ̀, ѡ҆скверни́лъ є҆сѝ на землѝ ст҃ы́ню є҆гѡ̀:

⁴¹разори́лъ є҆сѝ всѧ҄ ѡ҆пло́ты є҆гѡ̀, положи́лъ є҆сѝ твє́рдаѧ є҆гѡ̀ стра́хъ.

⁴²Расхища́хѹ є҆го̀ всѝ мимоходѧ́щїи пѹте́мъ, бы́сть поноше́нїе сосѣ́дѡмъ свои҄мъ.

⁴³Возвы́силъ є҆сѝ десни́цѹ стѹжа́ющихъ є҆мѹ̀, возвесели́лъ є҆сѝ всѧ҄ врагѝ є҆гѡ̀:

⁴⁴ѿврати́лъ є҆сѝ по́мощь меча̀ є҆гѡ̀ и҆ не застѹпи́лъ є҆сѝ є҆го̀ во бра́ни:

⁴⁵разори́лъ є҆сѝ ѿ ѡ҆чище́нїѧ є҆гѡ̀, престо́лъ є҆гѡ̀ на зе́млю пове́рглъ є҆сѝ:

⁴⁶ѹ҆ма́лилъ є҆сѝ дни҄ вре́мене є҆гѡ̀, ѡ҆блїѧ́лъ є҆сѝ є҆го̀ стѹдо́мъ.

⁴⁷Доко́лѣ, гд҇и, ѿвраща́ешисѧ въ коне́цъ, разжже́тсѧ ѩ҆́кѡ ѻ҆́гнь гнѣ́въ тво́й;

⁴⁸Помѧнѝ, кі́й мо́й соста́въ: є҆да́ бо всѹ́е созда́лъ є҆сѝ всѧ҄ сы́ны человѣ́чєскїѧ;

⁴⁹Кто̀ є҆́сть человѣ́къ, и҆́же поживе́тъ и҆ не ѹ҆́зритъ сме́рти, и҆зба́витъ дѹ́шѹ свою̀ и҆з̾ рѹкѝ а҆́довы;

⁵⁰Гдѣ̀ сѹ́ть мл҇ти твоѧ҄ дрє́внїѧ, гд҇и, и҆́миже клѧ́лсѧ є҆сѝ дв҃дѹ во и҆́стинѣ твое́й;

⁵¹Помѧнѝ, гд҇и, поноше́нїе ра҄бъ твои́хъ, є҆́же ѹ҆держа́хъ въ нѣ́дрѣ мое́мъ мно́гихъ ѩ҆зы҄къ:

⁵²и҆́мже поноси́ша вразѝ твоѝ, гд҇и, и҆́мже поноси́ша и҆змѣне́нїю хрїста̀ твоегѡ̀.

⁵³Блг҇ве́нъ гд҇ь во вѣ́къ: бѹ́ди, бѹ́ди.