Read Библия Церковнославянская Ѱалти́рь 89 Bible Online

Ѱалти́рь 89 - Библия Церковнославянская bible

Ѱалти́рь 89

¹Мл҃тва мѡѷсе́а человѣ́ка бж҃їѧ,

²Гд҇и, прибѣ́жище бы́лъ є҆сѝ на́мъ въ ро́дъ и҆ ро́дъ.

³Пре́жде да́же гора́мъ не бы́ти и҆ созда́тисѧ землѝ и҆ вселе́ннѣй, и҆ ѿ вѣ́ка и҆ до вѣ́ка ты̀ є҆сѝ.

⁴Не ѿвратѝ человѣ́ка во смире́нїе, и҆ ре́клъ є҆сѝ: ѡ҆брати́тесѧ, сы́нове человѣ́честїи.

⁵ѩ҆́кѡ ты́сѧща лѣ́тъ пред̾ ѻ҆чи́ма твои́ма, гд҇и, ѩ҆́кѡ де́нь вчера́шнїй, и҆́же ми́мѡ и҆́де, и҆ стра́жа нощна́ѧ.

⁶Ѹ҆ничижє́нїѧ и҆́хъ лѣ҄та бѹ́дѹтъ: ѹ҆́трѡ ѩ҆́кѡ трава̀ ми́мѡ и҆́детъ, ѹ҆́трѡ процвѣте́тъ и҆ пре́йдетъ: на ве́черъ ѿпаде́тъ, ѡ҆жестѣ́етъ и҆ и҆́зсхнетъ:

⁷ѩ҆́кѡ и҆зчезо́хомъ гнѣ́вомъ твои́мъ, и҆ ѩ҆́ростїю твое́ю смѹти́хомсѧ.

⁸Положи́лъ є҆сѝ беззакѡ́нїѧ на҄ша пред̾ тобо́ю, вѣ́къ на́шъ въ просвѣще́нїе лица̀ твоегѡ̀.

⁹ѩ҆́кѡ всѝ дні́е на́ши ѡ҆скѹдѣ́ша, и҆ гнѣ́вомъ твои́мъ и҆зчезо́хомъ:

¹⁰лѣ҄та на҄ша ѩ҆́кѡ паѹчи́на поѹча́хѹсѧ: дні́е лѣ́тъ на́шихъ въ ни́хже се́дмьдесѧтъ лѣ́тъ, а҆́ще же въ си́лахъ, ѻ҆́смьдесѧтъ лѣ́тъ, и҆ мно́жае и҆́хъ трѹ́дъ и҆ болѣ́знь: ѩ҆́кѡ прїи́де кро́тость на ны̀, и҆ нака́жемсѧ.

¹¹Кто̀ вѣ́сть держа́вѹ гнѣ́ва твоегѡ̀, и҆ ѿ стра́ха твоегѡ̀ ѩ҆́рость твою̀ и҆зчестѝ;

¹²Десни́цѹ твою̀ та́кѡ скажи́ ми, и҆ ѡ҆кова҄нныѧ {и҆ нака҄занныѧ} се́рдцемъ въ мѹ́дрости.

¹³Ѡ҆брати́сѧ, гд҇и, доко́лѣ; и҆ ѹ҆моле́нъ бѹ́ди на рабы҄ твоѧ҄.

¹⁴И҆спо́лнихомсѧ заѹ́тра мл҇ти твоеѧ̀, гд҇и, и҆ возра́довахомсѧ и҆ возвесели́хомсѧ:

¹⁵во всѧ҄ дни҄ на́шѧ возвесели́хомсѧ, за дни҄, въ нѧ́же смири́лъ ны̀ є҆сѝ, лѣ҄та, въ нѧ́же ви́дѣхомъ ѕла҄ѧ.

¹⁶И҆ при́зри на рабы҄ твоѧ҄ и҆ на дѣла̀ твоѧ҄, и҆ наста́ви сы́ны и҆́хъ.

¹⁷И҆ бѹ́ди свѣ́тлость гд҇а бг҃а на́шегѡ на на́съ, и҆ дѣла̀ рѹ́къ на́шихъ и҆спра́ви на на́съ, и҆ дѣ́ло рѹ́къ на́шихъ и҆спра́ви.