Read Библия Церковнославянская Ѱалти́рь 9 Bible Online

Ѱалти́рь 9 - Библия Церковнославянская bible

Ѱалти́рь 9

¹Въ коне́цъ, ѡ҆ та́йныхъ сы́на, ѱало́мъ дв҃дѹ,

²И҆сповѣ́мсѧ тебѣ̀, гд҇и, всѣ́мъ се́рдцемъ мои́мъ, повѣ́мъ всѧ҄ чѹдеса̀ твоѧ҄.

³Возвеселю́сѧ и҆ возра́дѹюсѧ ѡ҆ тебѣ̀, пою̀ и҆́мени твоемѹ̀, вы́шнїй.

⁴Внегда̀ возврати́тисѧ врагѹ̀ моемѹ̀ вспѧ́ть, и҆знемо́гѹтъ и҆ поги́бнѹтъ ѿ лица̀ твоегѡ̀.

⁵ѩ҆́кѡ сотвори́лъ є҆сѝ сѹ́дъ мо́й и҆ прю̀ мою̀: сѣ́лъ є҆сѝ на пр҇то́лѣ, сѹдѧ́й пра́вдѹ.

⁶Запрети́лъ є҆сѝ ѩ҆зы́кѡмъ, и҆ поги́бе нечести́вый: и҆́мѧ є҆гѡ̀ потреби́лъ є҆сѝ въ вѣ́къ и҆ въ вѣ́къ вѣ́ка.

⁷Врагѹ̀ ѡ҆скѹдѣ́ша ѻ҆рѹ҄жїѧ въ коне́цъ, и҆ гра́ды разрѹши́лъ є҆сѝ: поги́бе па́мѧть є҆гѡ̀ съ шѹ́момъ.

⁸И҆ гд҇ь во вѣ́къ пребыва́етъ, ѹ҆гото́ва на сѹ́дъ пр҇то́лъ сво́й:

⁹и҆ то́й сѹди́ти и҆́мать вселе́ннѣй въ пра́вдѹ, сѹди́ти и҆́мать лю́демъ въ правотѣ̀.

¹⁰И҆ бы́сть гд҇ь прибѣ́жище ѹ҆бо́гомѹ, помо́щникъ во бл҃говре́менїихъ, въ ско́рбехъ.

¹¹И҆ да ѹ҆пова́ютъ на тѧ̀ зна́ющїи и҆́мѧ твоѐ, ѩ҆́кѡ не ѡ҆ста́вилъ є҆сѝ взыска́ющихъ тѧ̀, гд҇и.

¹²По́йте гд҇еви, живѹ́щемѹ въ сїѡ́нѣ, возвѣсти́те во ѩ҆зы́цѣхъ начина҄нїѧ є҆гѡ̀:

¹³ѩ҆́кѡ взыска́ѧй крѡ́ви и҆́хъ помѧнѹ̀, не забы̀ зва́нїѧ ѹ҆бо́гихъ.

¹⁴Поми́лѹй мѧ̀, гд҇и, ви́ждь смире́нїе моѐ ѿ вра҄гъ мои́хъ, возносѧ́й мѧ̀ ѿ вра́тъ сме́ртныхъ:

¹⁵ѩ҆́кѡ да возвѣщѹ̀ всѧ҄ хвалы҄ твоѧ҄ во вратѣ́хъ дще́ре сїѡ́ни: возра́дѹемсѧ ѡ҆ сп҇нїи твое́мъ.

¹⁶Ѹ҆глѣбо́ша ѩ҆зы́цы въ па́гѹбѣ, ю҆́же сотвори́ша: въ сѣ́ти се́й, ю҆́же скры́ша, ѹ҆вѧзѐ нога̀ и҆́хъ.

¹⁷Зна́емь є҆́сть гд҇ь сѹдбы҄ творѧ́й: въ дѣ́лѣхъ рѹкѹ̀ своє́ю ѹ҆вѧзѐ грѣ́шникъ.

¹⁸Да возвратѧ́тсѧ грѣ҄шницы во а҆́дъ, всѝ ѩ҆зы́цы забыва́ющїи бг҃а.

¹⁹ѩ҆́кѡ не до конца̀ забве́нъ бѹ́детъ ни́щїй, терпѣ́нїе ѹ҆бо́гихъ не поги́бнетъ до конца̀.

²⁰Воскр҇нѝ, гд҇и, да не крѣпи́тсѧ человѣ́къ, да сѹ́дѧтсѧ ѩ҆зы́цы пред̾ тобо́ю.

²¹Поста́ви, гд҇и, законоположи́телѧ над̾ ни́ми, да разѹмѣ́ютъ ѩ҆зы́цы, ѩ҆́кѡ человѣ́цы сѹ́ть.

²²Вскѹ́ю, гд҇и, ѿстоѧ̀ дале́че, презира́еши во бл҃говре́менїихъ, въ ско́рбехъ;

²³Внегда̀ горди́тисѧ нечести́вомѹ, возгара́етсѧ ни́щїй: ѹ҆вѧза́ютъ въ совѣ́тѣхъ, ѩ҆̀же помышлѧ́ютъ.

²⁴ѩ҆́кѡ хвали́мь є҆́сть грѣ́шный въ по́хотехъ дѹшѝ своеѧ̀, и҆ ѡ҆би́дѧй благослови́мь є҆́сть.

²⁵Раздражѝ гд҇а грѣ́шный: по мно́жествѹ гнѣ́ва своегѡ̀ не взы́щетъ: нѣ́сть бг҃а пред̾ ни́мъ.

²⁶Ѡ҆сквернѧ́ютсѧ пѹтїѐ є҆гѡ̀ на всѧ́ко вре́мѧ: ѿе́млютсѧ сѹдбы҄ твоѧ҄ ѿ лица̀ є҆гѡ̀: всѣ́ми враги҄ свои́ми ѡ҆блада́етъ.

²⁷Рече́ бо въ се́рдцы свое́мъ: не подви́жѹсѧ ѿ ро́да въ ро́дъ без̾ ѕла̀:

²⁸є҆гѡ́же клѧ́твы ѹ҆ста̀ є҆гѡ̀ пѡ́лна сѹ́ть, и҆ го́рести и҆ льстѝ: под̾ ѧ҆зы́комъ є҆гѡ̀ трѹ́дъ и҆ болѣ́знь.

²⁹Присѣди́тъ въ лови́телствѣ съ бога́тыми въ та́йныхъ, є҆́же ѹ҆би́ти непови́ннаго: ѻ҆́чи є҆гѡ̀ на ни́щаго призира́етѣ.

³⁰Лови́тъ въ та́йнѣ ѩ҆́кѡ ле́въ во ѡ҆гра́дѣ свое́й, лови́тъ є҆́же восхи́тити ни́щаго, восхи́тити ни́щаго, внегда̀ привлещѝ и҆̀ въ сѣ́ти свое́й.

³¹Смири́тъ є҆го̀: преклони́тсѧ и҆ паде́тъ, внегда̀ є҆мѹ̀ ѡ҆блада́ти ѹ҆бо́гими.

³²Рече́ бо въ се́рдцы свое́мъ: забы̀ бг҃ъ, ѿвратѝ лицѐ своѐ, да не ви́дитъ до конца̀.

³³Воскр҇нѝ, гд҇и бж҃е мо́й, да вознесе́тсѧ рѹка̀ твоѧ̀, не забѹ́ди ѹ҆бо́гихъ твои́хъ до конца̀.

³⁴Чесѡ̀ ра́ди прогнѣ́ва нечести́вый бг҃а; рече́ бо въ се́рдцы свое́мъ: не взы́щетъ.

³⁵Ви́диши, ѩ҆́кѡ ты̀ болѣ́знь и҆ ѩ҆́рость смотрѧ́еши, да пре́данъ бѹ́детъ въ рѹ́цѣ твоѝ: тебѣ̀ ѡ҆ста́вленъ є҆́сть ни́щїй, си́рѹ ты̀ бѹ́ди помо́щникъ.

³⁶Сокрѹшѝ мы́шцѹ грѣ́шномѹ и҆ лѹка́вомѹ: взы́щетсѧ грѣ́хъ є҆гѡ̀ и҆ не ѡ҆брѧ́щетсѧ.

³⁷Гд҇ь цр҃ь во вѣ́къ и҆ въ вѣ́къ вѣ́ка: поги́бнете, ѩ҆зы́цы, ѿ землѝ є҆гѡ̀.

³⁸Жела́нїе ѹ҆бо́гихъ ѹ҆слы́шалъ є҆сѝ, гд҇и, ѹ҆гото́ванїю се́рдца и҆́хъ внѧ́тъ ѹ҆́хо твоѐ.

³⁹Сѹдѝ си́рѹ и҆ смире́нѹ, да не приложи́тъ ктомѹ̀ велича́тисѧ человѣ́къ на землѝ.