Read Библия Церковнославянская Ѱалти́рь 90 Bible Online

Ѱалти́рь 90 - Библия Церковнославянская bible

Ѱалти́рь 90

¹ Живы́й въ по́мощи вы́шнѧгѡ, въ кро́вѣ бг҃а нб҇нагѡ водвори́тсѧ,

²рече́тъ гд҇еви: застѹ́пникъ мо́й є҆сѝ и҆ прибѣ́жище моѐ, бг҃ъ мо́й, и҆ ѹ҆пова́ю на него̀.

³ѩ҆́кѡ то́й и҆зба́витъ тѧ̀ ѿ сѣ́ти ло́вчи и҆ ѿ словесѐ мѧте́жна:

⁴плещма̀ свои́ма ѡ҆сѣни́тъ тѧ̀, и҆ под̾ крилѣ҄ є҆гѡ̀ надѣ́ешисѧ: ѻ҆рѹ́жїемъ ѡ҆бы́детъ тѧ̀ и҆́стина є҆гѡ̀.

⁵Не ѹ҆бои́шисѧ ѿ стра́ха нощна́гѡ, ѿ стрѣлы̀ летѧ́щїѧ во днѝ,

⁶ѿ ве́щи во тмѣ̀ преходѧ́щїѧ, ѿ срѧ́ща {ѿ нападе́нїѧ} и҆ бѣ́са полѹ́деннагѡ.

⁷Паде́тъ ѿ страны̀ твоеѧ̀ ты́сѧща, и҆ тма̀ ѡ҆деснѹ́ю тебє̀, къ тебѣ́ же не прибли́житсѧ:

⁸ѻ҆ба́че ѻ҆чи́ма твои́ма смо́триши и҆ воздаѧ́нїе грѣ́шникѡвъ ѹ҆́зриши.

⁹ѩ҆́кѡ ты̀, гд҇и, ѹ҆пова́нїе моѐ: вы́шнѧго положи́лъ є҆сѝ прибѣ́жище твоѐ.

¹⁰Не прїи́детъ къ тебѣ̀ ѕло̀, и҆ ра́на не прибли́житсѧ тѣлесѝ твоемѹ̀ {селе́нїю твоемѹ̀}:

¹¹ѩ҆́кѡ а҆́гг҃лѡмъ свои҄мъ заповѣ́сть ѡ҆ тебѣ̀, сохрани́ти тѧ̀ во всѣ́хъ пѹте́хъ твои́хъ.

¹²На рѹка́хъ во́змѹтъ тѧ̀, да не когда̀ преткне́ши ѡ҆ ка́мень но́гѹ твою̀:

¹³на а҆́спїда и҆ васїлі́ска настѹ́пиши, и҆ попере́ши льва̀ и҆ ѕмі́ѧ.

¹⁴ѩ҆́кѡ на мѧ̀ ѹ҆пова̀, и҆ и҆зба́влю и҆̀: покры́ю и҆̀, ѩ҆́кѡ позна̀ и҆́мѧ моѐ.

¹⁵Воззове́тъ ко мнѣ̀, и҆ ѹ҆слы́шѹ є҆го̀: съ ни́мъ є҆́смь въ ско́рби, и҆змѹ̀ є҆го̀ и҆ просла́влю є҆го̀:

¹⁶долгото́ю дні́й и҆спо́лню є҆го̀ и҆ ѩ҆влю̀ є҆мѹ̀ сп҇нїе моѐ.