Read Библия Церковнославянская Ѱалти́рь 91 Bible Online

Ѱалти́рь 91 - Библия Церковнославянская bible

Ѱалти́рь 91

¹Ѱало́мъ пѣ́сни, въ де́нь сѹббѡ́тный,

²Бл҃го є҆́сть и҆сповѣ́датисѧ гд҇еви и҆ пѣ́ти и҆́мени твоемѹ̀, вы́шнїй:

³возвѣща́ти заѹ́тра мл҇ть твою̀ и҆ и҆́стинѹ твою̀ на всѧ́кѹ но́щь,

⁴въ десѧтострѹ́ннѣмъ ѱалти́ри съ пѣ́снїю въ гѹ́слехъ.

⁵ѩ҆́кѡ возвесели́лъ мѧ̀ є҆сѝ, гд҇и, въ творе́нїи твое́мъ, и҆ въ дѣ́лѣхъ рѹкѹ̀ твоє́ю возра́дѹюсѧ.

⁶ѩ҆́кѡ возвели́чишасѧ дѣла̀ твоѧ҄, гд҇и: ѕѣлѡ̀ ѹ҆глѹби́шасѧ помышлє́нїѧ твоѧ҄.

⁷Мѹ́жъ безѹ́менъ не позна́етъ, и҆ неразѹми́въ не разѹмѣ́етъ си́хъ.

⁸Внегда̀ прозѧбо́ща грѣ҄шницы ѩ҆́кѡ трава̀, и҆ пронико́ша всѝ дѣ́лающїи беззако́нїе, ѩ҆́кѡ да потребѧ́тсѧ въ вѣ́къ вѣ́ка:

⁹ты́ же вы́шнїй во вѣ́къ, гд҇и.

¹⁰ѩ҆́кѡ сѐ, вразѝ твоѝ, гд҇и, ѩ҆́кѡ сѐ, вразѝ твоѝ поги́бнѹтъ, и҆ разы́дѹтсѧ всѝ дѣ́лающїи беззако́нїе.

¹¹И҆ вознесе́тсѧ ѩ҆́кѡ є҆диноро́га ро́гъ мо́й, и҆ ста́рость моѧ̀ въ є҆ле́и масти́тѣ:

¹²и҆ воззрѣ̀ ѻ҆́ко моѐ на врагѝ моѧ҄, и҆ востаю́щыѧ на мѧ̀ лѹка́внѹющыѧ ѹ҆слы́шитъ ѹ҆́хо моѐ.

¹³Првдникъ ѩ҆́кѡ фі́нїѯъ процвѣте́тъ: ѩ҆́кѡ ке́дръ, и҆́же въ лїва́нѣ, ѹ҆мно́житсѧ.

¹⁴Насажде́ни въ домѹ̀ гд҇ни во дво́рѣхъ бг҃а на́шегѡ процвѣтѹ́тъ:

¹⁵є҆щѐ ѹ҆мно́жатсѧ въ ста́рости масти́тѣ, и҆ благопрїе́млюще бѹ́дѹтъ.

¹⁶Да возвѣстѧ́тъ, ѩ҆́кѡ пра́въ гд҇ь бг҃ъ на́шъ, и҆ нѣ́сть непра́вды въ не́мъ.