Read Библия Церковнославянская Ѱалти́рь 93 Bible Online

Ѱалти́рь 93 - Библия Церковнославянская bible

Ѱалти́рь 93

¹ Бг҃ъ ѿмще́нїй гд҇ь, бг҃ъ ѿмще́нїй не ѡ҆бинѹ́лсѧ є҆́сть.

²Вознеси́сѧ, сѹдѧ́й землѝ, возда́ждь воздаѧ́нїе гѡ́рдымъ.

³Доко́лѣ грѣ҄шницы, гд҇и, доко́лѣ грѣ҄шницы восхва́лѧтсѧ;

⁴Провѣща́ютъ и҆ возглаго́лютъ непра́вдѹ, возглаго́лютъ всѝ дѣ́лающїи беззако́нїе;

⁵Лю́ди твоѧ҄, гд҇и, смири́ша, и҆ достоѧ́нїе твоѐ ѡ҆ѕло́биша:

⁶вдови́цѹ и҆ си́ра ѹ҆мори́ша, и҆ прише́лца ѹ҆би́ша,

⁷и҆ рѣ́ша: не ѹ҆́зритъ гд҇ь, нижѐ ѹ҆разѹмѣ́етъ бг҃ъ ї҆а́кѡвль.

⁸Разѹмѣ́йте же, безѹ́мнїи въ лю́дехъ, и҆ бѹ́їи нѣ́когда, ѹ҆мѹдри́тесѧ:

⁹насажде́й ѹ҆́хо, не слы́шитъ ли; и҆лѝ созда́вый ѻ҆́ко, не сматрѧ́етъ ли;

¹⁰наказѹ́ѧй ѩ҆зы́ки, не ѡ҆бличи́тъ ли, ѹ҆ча́й человѣ́ка ра́зѹмѹ;

¹¹Гд҇ь вѣ́сть помышлє́нїѧ человѣ́чєскаѧ, ѩ҆́кѡ сѹ́ть сѹ́єтна.

¹²Бл҃же́нъ человѣ́къ, є҆го́же а҆́ще нака́жеши, гд҇и, и҆ ѿ зако́на твоегѡ̀ наѹчи́ши є҆го̀:

¹³ѹ҆кроти́ти є҆го̀ ѿ дні́й лю́тыхъ, до́ндеже и҆зры́етсѧ грѣ́шномѹ ѩ҆́ма.

¹⁴ѩ҆́кѡ не ѿри́нетъ гд҇ь люді́й свои́хъ, и҆ достоѧ́нїѧ своегѡ̀ не ѡ҆ста́витъ:

¹⁵до́ндеже пра́вда ѡ҆брати́тсѧ на сѹ́дъ, и҆ держа́щїисѧ є҆ѧ̀ всѝ пра́вїи срдцемъ.

¹⁶Кто̀ воста́нетъ мѝ на лѹка́внѹющыѧ; и҆лѝ кто̀ спредста́нетъ мѝ на дѣ́лающыѧ беззако́нїе;

¹⁷А҆́ще не гд҇ь помо́глъ бы мѝ, вма́лѣ всели́ласѧ бы во а҆́дъ дѹша̀ моѧ̀.

¹⁸А҆́ще глаго́лахъ: подви́жесѧ нога̀ моѧ̀, мл҇ть твоѧ̀, гд҇и, помога́ше мѝ:

¹⁹по мно́жествѹ болѣ́зней мои́хъ въ се́рдцы мое́мъ, ѹ҆тѣшє́нїѧ твоѧ҄ возвесели́ша дѹ́шѹ мою̀.

²⁰Да не пребѹ́детъ тебѣ̀ престо́лъ беззако́нїѧ, созида́ѧй трѹ́дъ на повелѣ́нїе.

²¹Ѹ҆ловѧ́тъ на дѹ́шѹ првдничѹ, и҆ кро́вь непови́ннѹю ѡ҆сѹ́дѧтъ.

²²И҆ бы́сть мнѣ̀ гд҇ь въ прибѣ́жище, и҆ бг҃ъ мо́й въ по́мощь ѹ҆пова́нїѧ моегѡ̀:

²³и҆ возда́стъ и҆̀мъ гд҇ь беззако́нїе и҆́хъ, и҆ по лѹка́вствїю и҆́хъ погѹби́тъ ѧ҆̀ гд҇ь бг҃ъ {на́шъ}.