Read Библия Церковнославянская Ѱалти́рь 94 Bible Online

Ѱалти́рь 94 - Библия Церковнославянская bible

Ѱалти́рь 94

¹ Прїиди́те, возра́дѹемсѧ гд҇еви, воскли́кнемъ бг҃ѹ сп҃си́телю на́шемѹ:

²предвари́мъ лицѐ є҆гѡ̀ во и҆сповѣ́данїи, и҆ во ѱалмѣ́хъ воскли́кнемъ є҆мѹ̀:

³ѩ҆́кѡ бг҃ъ ве́лїй гд҇ь, и҆ цр҃ь ве́лїй по все́й землѝ:

⁴ѩ҆́кѡ въ рѹцѣ̀ є҆гѡ̀ всѝ концы҄ землѝ, и҆ высѡты̀ го́ръ тогѡ̀ сѹ́ть.

⁵ѩ҆́кѡ тогѡ̀ є҆́сть мо́ре, и҆ то́й сотворѝ є҆̀, и҆ сѹ́шѹ рѹ́цѣ є҆гѡ̀ созда́стѣ.

⁶Прїиди́те, поклони́мсѧ и҆ припаде́мъ є҆мѹ̀, и҆ воспла́чемсѧ пред̾ гд҇емъ сотво́ршимъ на́съ:

⁷ѩ҆́кѡ то́й є҆́сть бг҃ъ на́шъ, и҆ мы̀ лю́дїе па́жити є҆гѡ̀ и҆ ѻ҆́вцы рѹкѝ є҆гѡ̀. Дне́сь а҆́ще гла́съ є҆гѡ̀ ѹ҆слы́шите,

⁸не ѡ҆жесточи́те серде́цъ ва́шихъ, ѩ҆́кѡ въ прогнѣ́ванїи, по днѝ и҆скѹше́нїѧ въ пѹсты́ни:

⁹въ ѻ҆́ньже {и҆дѣ́же} и҆скѹси́ша мѧ̀ ѻ҆тцы̀ ва́ши, и҆скѹси́ша мѧ̀, и҆ ви́дѣша дѣла̀ моѧ҄.

¹⁰Четы́редесѧть лѣ́тъ негодова́хъ ро́да тогѡ̀, и҆ рѣ́хъ: пр҇нѡ заблѹжда́ютъ се́рдцемъ, ті́и же не позна́ша пѹті́й мои́хъ:

¹¹ѩ҆́кѡ клѧ́хсѧ во гнѣ́вѣ мое́мъ, а҆́ще вни́дѹтъ въ поко́й мо́й.