Read Библия Церковнославянская Ѱалти́рь 95 Bible Online

Ѱалти́рь 95 - Библия Церковнославянская bible

Ѱалти́рь 95

¹ Воспо́йте гд҇еви пѣ́снь но́вѹ, воспо́йте гд҇еви всѧ̀ землѧ̀:

²воспо́йте гд҇еви, благослови́те и҆́мѧ є҆гѡ̀: благовѣсти́те де́нь ѿ днѐ сп҇нїе є҆гѡ̀.

³Возвѣсти́те во ѩ҆зы́цѣхъ сла́вѹ є҆гѡ̀, во всѣ́хъ лю́дехъ чѹдеса̀ є҆гѡ̀.

⁴ѩ҆́кѡ ве́лїй гд҇ь и҆ хва́ленъ ѕѣлѡ̀, стра́шенъ є҆́сть над̾ всѣ́ми бѡ́ги.

⁵ѩ҆́кѡ всѝ бо́зи ѩ҆зы҄къ бѣ́сове: гд҇ь же небеса̀ сотворѝ.

⁶И҆сповѣ́данїе и҆ красота̀ пред̾ ни́мъ, ст҃ы́нѧ и҆ великолѣ́пїе во ст҃и́лѣ є҆гѡ̀.

⁷Принеси́те гд҇еви, ѻ҆те́чєствїѧ ѩ҆зы҄къ, принеси́те гд҇еви сла́вѹ и҆ че́сть.

⁸Принеси́те гд҇еви сла́вѹ и҆́мени є҆гѡ̀: возми́те жє́ртвы и҆ входи́те во дворы̀ є҆гѡ̀.

⁹Поклони́тесѧ гд҇еви во дворѣ̀ ст҃ѣ́мъ є҆гѡ̀: да подви́житсѧ ѿ лица̀ є҆гѡ̀ всѧ̀ землѧ̀.

¹⁰Рцы́те во ѩ҆зы́цѣхъ, ѩ҆́кѡ гд҇ь воцр҃и́сѧ: и҆́бо и҆спра́ви вселе́ннѹю, ѩ҆́же не подви́житсѧ: сѹ́дитъ лю́демъ пра́востїю.

¹¹Да возвеселѧ́тсѧ нб҃са̀, и҆ ра́дѹетсѧ землѧ̀: да подви́житсѧ мо́ре и҆ и҆сполне́нїе є҆гѡ̀:

¹²возра́дѹютсѧ полѧ̀, и҆ всѧ҄ ѩ҆̀же на ни́хъ: тогда̀ возра́дѹютсѧ всѧ҄ древа̀ дѹбра҄внаѧ

¹³ѿ лица̀ гд҇нѧ, ѩ҆́кѡ грѧде́тъ, ѩ҆́кѡ грѧде́тъ сѹди́ти землѝ: сѹди́ти вселе́ннѣй въ пра́вдѹ, и҆ лю́демъ и҆́стиною свое́ю.