Read Библия Церковнославянская Ѱалти́рь 98 Bible Online

Ѱалти́рь 98 - Библия Церковнославянская bible

Ѱалти́рь 98

¹ Гд҇ь воцр҃и́сѧ, да гнѣ́ваютсѧ лю́дїе: сѣдѧ́й на херѹві́мѣхъ, да подви́житсѧ землѧ̀.

²Гд҇ь въ сїѡ́нѣ вели́къ, и҆ высо́къ є҆́сть над̾ всѣ́ми людьмѝ.

³Да и҆сповѣ́дѧтсѧ и҆́мени твоемѹ̀ вели́комѹ, ѩ҆́кѡ стра́шно и҆ ст҃о є҆́сть.

⁴И҆ че́сть царе́ва сѹ́дъ лю́битъ: ты̀ ѹ҆гото́валъ є҆сѝ правоты҄, сѹ́дъ и҆ пра́вдѹ во ї҆а́кѡвѣ ты̀ сотвори́лъ є҆сѝ.

⁵Возноси́те гд҇а бг҃а на́шего и҆ покланѧ́йтесѧ подно́жїю нѡ́гѹ є҆гѡ̀, ѩ҆́кѡ ст҃о є҆́сть.

⁶Мѡѷсе́й и҆ а҆арѡ́нъ во ї҆ере́ехъ є҆гѡ̀, и҆ самѹи́лъ въ призыва́ющихъ и҆́мѧ є҆гѡ̀: призыва́хѹ гд҇а, и҆ то́й послѹ́шаше и҆̀хъ.

⁷Въ столпѣ̀ ѡ҆́блачнѣ гл҃аше къ ни҄мъ: ѩ҆́кѡ хранѧ́хѹ свидѣ҄нїѧ є҆гѡ̀ и҆ повелѣ҄нїѧ є҆гѡ̀, ѩ҆̀же дадѐ и҆̀мъ.

⁸Гд҇и бж҃е на́шъ, ты̀ послѹ́шалъ є҆сѝ и҆̀хъ: бж҃е, ты̀ мл҇тивъ быва́лъ є҆сѝ и҆̀мъ, и҆ мща́ѧ на всѧ҄ начина҄нїѧ и҆́хъ.

⁹Возноси́те гд҇а бг҃а на́шего и҆ покланѧ́йтесѧ въ горѣ̀ ст҃ѣ́й є҆гѡ̀: ѩ҆́кѡ ст҃ъ гд҇ь бг҃ъ на́шъ.