Read Библия Церковнославянская При́тчей соломѡ́нихъ 10 Bible Online

При́тчей соломѡ́нихъ 10 - Библия Церковнославянская bible

При́тчей соломѡ́нихъ 10

¹Сы́нъ премѹ́дръ весели́тъ ѻ҆тца̀, сы́нъ же безѹ́менъ печа́ль ма́тери.

²Не по́льзѹютъ сокрѡ́вища беззако́нныхъ, пра́вда же и҆зба́витъ ѿ сме́рти.

³Не ѹ҆бїе́тъ гла́домъ гд҇ь дѹ́шѹ првднѹю, живо́тъ же нечести́выхъ низврати́тъ.

⁴Нищета̀ мѹ́жа смирѧ́етъ: рѹ́цѣ же мѹ́жественныхъ ѡ҆богаща́ютсѧ.

⁵Сы́нъ нака́занъ премѹ́дръ бѹ́детъ, безѹ́мный же слѹго́ю ѹ҆потреби́тсѧ: спасе́тсѧ ѿ зно́ѧ сы́нъ разѹ́мный, вѣтротлѣ́ненъ же быва́етъ на жа́твѣ сы́нъ беззако́нный.

⁶Блг҇ве́нїе гд҇не на главѣ̀ првднагѡ: ѹ҆ста́ же нечести́выхъ покры́етъ пла́чь безвре́менный.

⁷Па́мѧть првдныхъ съ похвала́ми: и҆́мѧ же нечести́выхъ ѹ҆гаса́етъ.

⁸Премѹ́дръ се́рдцемъ прїи́метъ за́пѡвѣди: непокрове́нный же ѹ҆стна́ма ѡ҆строптѣва́ѧ запне́тсѧ.

⁹И҆́же хо́дитъ про́стѡ, хо́дитъ надѣ́ѧсѧ: развраща́ѧ же пѹти҄ своѧ҄, позна́нъ бѹ́детъ.

¹⁰Намиза́ѧй ѻ҆́комъ съ ле́стїю собира́етъ мѹжє́мъ печа҄ли: ѡ҆блича́ѧй же со дерзнове́нїемъ миротвори́тъ.

¹¹И҆сто́чникъ жи́зни въ рѹцѣ̀ првднагѡ: ѹ҆ста́ же нечести́вагѡ покры́етъ па́гѹба.

¹²Не́нависть воздвиза́етъ ра́спрю: всѣ́хъ же нелюбопри́телныхъ покрыва́етъ любо́вь.

¹³И҆́же ѿ ѹ҆сте́нъ произно́ситъ премѹ́дрость, жезло́мъ бїе́тъ мѹ́жа безсерде́чна.

¹⁴Премѹ́дрїи скры́ютъ чѹ́вство, ѹ҆ста́ же проде́рзагѡ приближа́ютсѧ сокрѹше́нїю.

¹⁵Стѧжа́нїе бога́тыхъ гра́дъ тве́рдъ, сокрѹше́нїе же нечести́выхъ нищета̀.

¹⁶Дѣла̀ првдныхъ живо́тъ творѧ́тъ, пло́дове же нечести́выхъ грѣхѝ.

¹⁷Пѹти҄ жи́зни храни́тъ наказа́нїе: наказа́нїемъ же не ѡ҆бличе́ный заблѹжда́етъ.

¹⁸Покрыва́ютъ враждѹ̀ ѹ҆стнѣ̀ пра҄выѧ: и҆зносѧ́щїи же ѹ҆кори́знѹ безѹ́мнѣйшїи сѹ́ть.

¹⁹Ѿ многосло́вїѧ не и҆збѣжи́ши грѣха̀: щадѧ́ же ѹ҆стнѣ̀, разѹ́менъ бѹ́деши.

²⁰Сребро̀ разжже́ное ѧ҆зы́къ првднагѡ: се́рдце же нечести́вагѡ и҆сче́знетъ.

²¹Ѹ҆стнѣ̀ првдныхъ вѣ́дѧтъ высѡ́каѧ: безѹ́мнїи же въ скѹ́дости скончава́ютсѧ.

²²Блг҇ве́нїе гд҇не на главѣ̀ првднагѡ, сїѐ ѡ҆богаща́етъ, и҆ не и҆́мать приложи́тисѧ є҆мѹ̀ печа́ль въ се́рдцы.

²³Смѣ́хомъ безѹ́мный твори́тъ ѕла҄ѧ: премѹ́дрость же мѹ́жеви ражда́етъ ра́зѹмъ.

²⁴Въ поги́бели нечести́вый ѡ҆бно́ситсѧ: жела́нїе же првднагѡ прїѧ́тно.

²⁵Преходѧ́щей бѹ́ри, нечести́вый и҆счеза́етъ, првдный же ѹ҆клони́всѧ спаса́етсѧ во вѣ́ки.

²⁶ѩ҆́коже гро́здїе зеле́ное вре́дъ зѹбѡ́мъ и҆ ды́мъ ѻ҆чи́ма, та́кѡ законопрестѹпле́нїе творѧ́щымъ є҆̀.

²⁷Стра́хъ гд҇ень прилага́етъ дни҄: лѣ҄та же нечести́выхъ ѹ҆ма́лѧтсѧ.

²⁸Пребыва́етъ съ првдными весе́лїе, ѹ҆пова́нїе же нечести́выхъ погиба́етъ.

²⁹Ѹ҆твержде́нїе прпдбномѹ стра́хъ гд҇ень, сокрѹше́нїе же творѧ́щымъ ѕла҄ѧ.

³⁰Првдникъ во вѣ́ки не поколе́блетсѧ: нечести́вїи же не населѧ́тъ землѝ.

³¹Ѹ҆ста̀ првднагѡ ка́плютъ премѹ́дрость, ѧ҆зы́къ же непра́веднагѡ поги́бнетъ:

³²ѹ҆стнѣ̀ мѹже́й првдныхъ ка́плютъ бл҃года҄ти, ѹ҆ста́ же нечести́выхъ развраща́ютсѧ.