Read Библия Церковнославянская При́тчей соломѡ́нихъ 11 Bible Online

При́тчей соломѡ́нихъ 11 - Библия Церковнославянская bible

При́тчей соломѡ́нихъ 11

¹Мѣ҄рила льсти҄ваѧ ме́рзость пред̾ гд҇емъ, вѣ́съ же првдный прїѧ́тенъ є҆мѹ̀.

²И҆дѣ́же а҆́ще вни́детъ досажде́нїе, та́мѡ и҆ безче́стїе: ѹ҆ста́ же смире́нныхъ поѹча́ютсѧ премѹ́дрости.

³Ѹ҆мира́ѧй првдникъ ѡ҆ста́ви раска́ѧнїе, ѹ҆до́бна же быва́етъ и҆ посмѣѧ́телна нечести́выхъ поги́бель.

⁴Соверше́нство пра́выхъ наста́витъ и҆̀хъ, и҆ поползнове́нїе ѿрица́ющихсѧ плѣни́тъ и҆̀хъ. Не ѹ҆по́льзѹютъ и҆мѣ҄нїѧ въ де́нь ѩ҆́рости: пра́вда же и҆зба́витъ ѿ сме́рти.

⁵Пра́вда непоро́чнагѡ и҆справлѧ́етъ пѹти҄, нече́стїе же впада́етъ въ непра́вдѹ.

⁶Пра́вда мѹже́й пра́выхъ и҆зба́витъ и҆̀хъ, безсовѣ́тїемъ же ѹ҆ловлѧ́ютсѧ беззако́ннїи.

⁷Сконча́вшѹсѧ мѹ́жѹ првднѹ, не поги́бнетъ наде́жда: похвала́ же нечести́выхъ поги́бнетъ.

⁸Првдный ѿ ло́ва ѹ҆бѣ́гнетъ, въ негѡ́же мѣ́сто предае́тсѧ нечести́вый.

⁹Во ѹ҆стѣ́хъ нечести́выхъ сѣ́ть гра́жданѡмъ, чѹ́вство же првдныхъ благопоспѣ́шно.

¹⁰Во бл҃ги́хъ првдныхъ и҆спра́витсѧ гра́дъ, и҆ въ поги́бели нечести́выхъ ра́дованїе.

¹¹Въ блг҇ве́нїи пра́выхъ возвы́ситсѧ гра́дъ, ѹ҆сты҄ же нечести́выхъ раскопа́етсѧ.

¹²Рѹга́етсѧ гра́жданѡмъ лише́нный ра́зѹма, мѹ́жъ же мѹ́дръ безмо́лвїе во́дитъ.

¹³Мѹ́жъ двоѧзы́ченъ ѿкрыва́етъ совѣ́ты въ со́нмищи, вѣ́рный же дѹ́хомъ таи́тъ ве́щы.

¹⁴И҆̀мже и҆ нѣ́сть ѹ҆правле́нїѧ, па́даютъ а҆́ки ли́ствїе, спасе́нїе же є҆́сть во мно́зѣ совѣ́тѣ.

¹⁵Лѹка́вый ѕлодѣ́йствѹетъ, є҆гда̀ сочетава́етсѧ съ првднымъ, ненави́дитъ же гла́са ѹ҆твержде́нїѧ.

¹⁶Жена̀ благода́тна возно́ситъ мѹ́жѹ сла́вѹ: престо́лъ же безче́стїѧ жена̀ ненави́дѧщаѧ пра́вды. Бога́тства лѣни́вїи скѹ́дни быва́ютъ, крѣ́пцыи же ѹ҆твержда́ютсѧ бога́тствомъ.

¹⁷Дѹшѝ свое́й благотвори́тъ мѹ́жъ ми́лостивый, погѹблѧ́етъ же тѣ́ло своѐ неми́лостивый.

¹⁸Нечести́вый твори́тъ дѣла̀ непра́вєднаѧ: сѣ́мѧ же првдныхъ мзда̀ и҆́стины.

¹⁹Сы́нъ првдный ражда́етсѧ въ живо́тъ: гоне́нїе же нечести́вагѡ въ сме́рть.

²⁰Ме́рзость гд҇еви пѹтїѐ развраще́нни, прїѧ́тни же є҆мѹ̀ всѝ непоро́чнїи въ пѹте́хъ свои́хъ.

²¹Въ рѹ́кѹ рѹ́цѣ вложи́въ непра́веднѡ, не без̾ мѹ́ки бѹ́детъ ѕлы́хъ: сѣ́ѧй же пра́вдѹ прїи́метъ мздѹ̀ вѣ́рнѹ.

²²ѩ҆́коже ѹ҆серѧ́зь златы́й въ но́здрехъ свинїѝ, та́кѡ женѣ̀ ѕлоѹ́мнѣй лѣ́пота.

²³Жела́нїе првдныхъ всѐ благо́е, наде́жда же нечести́выхъ поги́бнетъ.

²⁴Сѹ́ть, и҆̀же своѧ҄ сѣ́юще, мнѡ́жайшаѧ творѧ́тъ: сѹ́ть же и҆ собира́юще чѹжда҄ѧ, ѹ҆малѧ́ютсѧ.

²⁵Дѹша̀ блг҇ве́нна всѧ́каѧ проста́ѧ: мѹ́жъ ѩ҆́рый неблагоѡбра́зенъ.

²⁶Ѹ҆держава́ѧй пшени́цѹ ѡ҆ста́витъ ю҆̀ ѩ҆зы́кѡмъ: продаѧ́й пшени́цѹ скѹ́пѡ, ѿ наро́да про́клѧтъ, блг҇ве́нїе же гд҇не на главѣ̀ подава́ющагѡ.

²⁷Творѧ́й блага҄ѧ и҆́щетъ блгдти добры̀: и҆́щѹщаго же ѕла҄ѧ пости́гнѹтъ є҆го̀.

²⁸Надѣ́ѧйсѧ на бога́тство своѐ, се́й паде́тъ: застѹпа́ѧй же првдныхъ, то́й возсїѧ́етъ.

²⁹Не сматрѧ́ѧй своегѡ̀ до́мѹ наслѣ́дитъ вѣ́тры: порабо́таетъ же безѹ́мный разѹ́мномѹ.

³⁰Ѿ плода̀ пра́вды дре́во жи́зни прозѧба́етъ: ѿе́млютсѧ же безвре́меннѡ дѹ́ши беззако́нныхъ.

³¹А҆́ще првдный є҆два̀ спаса́етсѧ, нечести́вый же и҆ грѣ́шный гдѣ̀ ѩ҆ви́тсѧ;