Read Библия Церковнославянская При́тчей соломѡ́нихъ 12 Bible Online

При́тчей соломѡ́нихъ 12 - Библия Церковнославянская bible

При́тчей соломѡ́нихъ 12

¹Любѧ́й наказа́нїе лю́битъ чѹ́вство: ненави́дѧй же ѡ҆бличе́нїѧ безѹ́менъ.

²Лѹ́чше ѡ҆брѣты́й блгдть ѿ гд҇а бг҃а: мѹ́жъ же законопрестѹ́пенъ премолча́нъ бѹ́детъ.

³Не и҆спра́витсѧ человѣ́къ ѿ беззако́ннагѡ: корє́нїѧ же првдныхъ не ѿи́мѹтсѧ.

⁴Жена̀ мѹ́жественнаѧ вѣне́цъ мѹ́жѹ своемѹ̀: ѩ҆́коже въ дре́вѣ че́рвь, та́кѡ мѹ́жа погѹблѧ́етъ жена̀ ѕлотво́рнаѧ.

⁵Мы҄сли првдныхъ сѹдбы҄: ѹ҆правлѧ́ютъ же нечести́вїи лє́сти.

⁶Словеса̀ нечести́выхъ льсти҄ва въ кро́вь, ѹ҆ста́ же пра́выхъ и҆зба́вѧтъ и҆̀хъ.

⁷А҆́може ѡ҆брати́тсѧ нечести́вый, и҆счеза́етъ: хра҄мины же првдныхъ пребыва́ютъ.

⁸Ѹ҆ста̀ разѹ́мнагѡ хвали҄ма быва́ютъ ѿ мѹ́жа: слабосе́рдъ же порѹга́емь быва́етъ.

⁹Лѹ́чше мѹ́жъ въ безче́стїи рабо́таѧй себѣ̀, не́жели че́сть себѣ̀ ѡ҆бложи́въ и҆ лиша́ѧйсѧ хлѣ́ба.

¹⁰Првдникъ ми́лѹетъ дѹ́шы скотѡ́въ свои́хъ: ѹ҆трѡ́бы же нечести́выхъ неми́лѡстивны.

¹¹Дѣ́лаѧй свою̀ зе́млю и҆спо́лнитсѧ хлѣ́бѡвъ: гонѧ́щїи же сѹ́єтнаѧ лише́ни ра́зѹма. И҆́же є҆́сть сла́достенъ въ ві́ннѣмъ пребыва́нїи, во свои́хъ тверды́нехъ ѡ҆ста́витъ безче́стїе.

¹²Жела҄нїѧ нечести́выхъ ѕла҄: коре́нїе же бл҃гочести́выхъ въ тве́рдостехъ.

¹³За грѣ́хъ ѹ҆сте́нъ впа́даетъ въ сѣ҄ти грѣ́шникъ: и҆збѣга́етъ же ѿ ни́хъ првдникъ. Сматрѧ́ѧй кро́ткѡ поми́лованъ бѹ́детъ, а҆ срѣта́ѧй во вратѣ́хъ ѡ҆скорби́тъ дѹ́шы.

¹⁴Ѿ плодѡ́въ ѹ҆́стъ дѹша̀ мѹ́жа напо́лнитсѧ бл҃ги́хъ, воздаѧ́нїе же ѹ҆сте́нъ є҆гѡ̀ возда́стсѧ є҆мѹ̀.

¹⁵Пѹтїѐ безѹ́мныхъ пра́ви пред̾ ни́ми: послѹ́шаетъ совѣ́тѡвъ мѹ́дрый.

¹⁶Безѹ́мный а҆́бїе и҆сповѣ́сть гнѣ́въ сво́й: кры́етъ же своѐ безче́стїе хи́трый.

¹⁷ѩ҆вле́ннѹю вѣ́рѹ возвѣща́етъ првдный: свидѣ́тель же непра́ведныхъ льсти́въ.

¹⁸Сѹ́ть, и҆̀же глаго́люще ѹ҆ѧзвлѧ́ютъ а҆́ки мечи҄: ѧ҆зы́цы же премѹ́дрыхъ и҆сцѣлѧ́ютъ.

¹⁹Ѹ҆стнѣ̀ и҆́стинны и҆справлѧ́ютъ свидѣ́телство: свидѣ́тель же ско́ръ ѧ҆зы́къ и҆́мать непра́веденъ.

²⁰Ле́сть въ се́рдцы кѹю́щагѡ ѕла҄ѧ: хотѧ́щїи же ми́ра возвеселѧ́тсѧ.

²¹Ничто́же непра́ведное ѹ҆го́дно є҆́сть првдномѹ: нечести́вїи же и҆спо́лнѧтсѧ ѕлы́хъ.

²²Ме́рзость гд҇еви ѹ҆стнѣ̀ лжи҄вы: творѧ́й же вѣ́рнѡ прїѧ́тенъ є҆мѹ̀.

²³Мѹ́жъ разѹми́вый престо́лъ чѹ́вствїѧ: се́рдце же безѹ́мныхъ срѧ́щетъ клѧ҄твы.

²⁴Рѹка̀ и҆збра́нныхъ ѡ҆держи́тъ ѹ҆до́бь: льсти́вїи же бѹ́дѹтъ во плѣне́нїи.

²⁵Стра́шное сло́во се́рдце мѹ́жа првдна смѹща́етъ, вѣ́сть же бл҃га́ѧ весели́тъ є҆го̀.

²⁶Разѹми́въ првдникъ себѣ̀ дрѹ́гъ бѹ́детъ: мы҄сли же нечести́выхъ некрѡ́тки: согрѣша́ющихъ пости́гнѹтъ ѕла҄ѧ, пѹ́ть же нечести́выхъ прельсти́тъ ѧ҆̀.

²⁷Не ѹ҆лѹчи́тъ льсти́вый лови́твы: стѧжа́нїе же честно́е мѹ́жъ чи́стый.

²⁸Въ пѹте́хъ пра́вды живо́тъ, пѹтїе́ же ѕлопо́мнѧщихъ въ сме́рть.